ବବୁଲୁ ସାହୁ
କଳାହାଣ୍ଡି : କଳାହାଣ୍ଡି ଜିଲ୍ଲା କେଗାଁ ଥାନା ଅଧିନସ୍ଥ ନୂଆଗାଁ ପଂଚାୟତ ପଦ୍ମପୁର ଗ୍ରାମର ପୂର୍ଣ୍ଣ ଶବରର ମୃତଦେହ ସେହି ଗ୍ରାମର ଜଗବନ୍ଧୁ ଶବରଙ୍କ କୂଅରେ ଭାସୁଥିବା ଅବସ୍ଥାରେ ପୋଲିସ ଉଦ୍ଧାର କରିଛି । କୂଅରେ ଏକ ଶବ ଭାସୁଥିବାର ଦେଖି ଜଗବନ୍ଧୁ ପାଖ ପଡୋଶୀ ଏବଂ ପୋଲିସକୁ ଖବର ଦେଇଥିଲେ । ସଂଧ୍ୟା ସମୟରେ ପୋଲିସ ଶବ ଉଦ୍ଧାର କରିନପାରି ଆରଦିନ ସକାଳୁ ଅଗ୍ନିଶମ ବିଭାଗ ସହାୟତାରେ କୂଅ ଭିତରୁ ଶବକୁ ଉଦ୍ଧାର କରି ଚିହ୍ନଟ ହେବାପରେ ଡାକ୍ତରୀ ମାଇନା ପାଇଁ ଧର୍ମଗଡ ପଠାଯାଇଥିବା ପୋଲିସ ସୂତ୍ରରୁ ପ୍ରକାଶ ।
୩୮ ବର୍ଷୀୟ ପୂର୍ଣ୍ଣ ଶବର କେଗାଁ ଆସି ବ୍ୟାଙ୍କରୁ ଟଙ୍କା ଉଠାଣ କରିବା ପରେ ଘରକୁ ଫେରିନଥିବା ବେଳେ ଘର ଲୋକେ ଖୋଜାଖୋଜି କରୁଥିଲେ । ନିଜ ଗ୍ରାମର ଜଗବନ୍ଧୁ ଶବରଙ୍କ କୂଅରେ ଶବ ପଡିଥିବା ବେଳେ ମୃତ ଶରୀରରେ କ୍ଷତଚିହ୍ନ ଓ ଆଖିପତାରେ ରକ୍ତବର୍ଣ୍ଣ ଥିବାର ପ୍ରତ୍ୟକ୍ଷଦର୍ଶୀ ମାନଙ୍କ ସୂତ୍ରରୁ ପ୍ରକାଶ । ପରିବାର ପକ୍ଷରୁ ଏହା ଏକ ସୁଚିନ୍ତିତ ହତ୍ୟା କାଣ୍ଡ ହୋଇଥାଇ ପାରେ ବୋଲି ପରିବାର ଲୋକେ ଏବଂ ଗ୍ରାମବାସୀ ସନ୍ଦେହ ପ୍ରକାଶ କରୁଥିବାର ଜଣାପଡିଛି ।
