ଆସନ୍ତା ନିର୍ବାଚନ ପାଇଁ ପ୍ରାୟ ସବୁ ଦଳର ପ୍ରାର୍ଥୀ ତାଲିକା ପ୍ରକାଶ ପାଇସାରିଲାଣି। ଏହି ପ୍ରାର୍ଥୀ ତାଲିକା ପ୍ରକାଶିତ ହେବା ପରେ ଦଳୀୟ ଅସନ୍ତୋଷ ବଢିବାରେ ଲାଗିଛି। କେଉଁଠି ନେତାମାନେ ଟିକେଟ ନ ପାଇ କ୍ଷୋଭ ପ୍ରକାଶ କରି ଦଳ ପରିବର୍ତ୍ତନ କରୁଛନ୍ତି ତ ଆଉ କେଉଁଠି ମୁହାମୁହିଁ ହେଉଛନ୍ତି। ବାଲେଶ୍ବର ଜିଲ୍ଲା ନୀଳଗିରିରେ କଂଗ୍ରେସ ପ୍ରାର୍ଥୀ ମନୋଜା ମଞ୍ଜରୀ ଦେବୀଙ୍କୁ ବିରୋଧ କରାଯାଇଛି। ଏହି ଆସନ ପାଇଁ ଆଶାୟୀ ପ୍ରାର୍ଥୀ ପିସିସି ସଦସ୍ୟ ଚିତ୍ତରଞ୍ଜନ ଷଡଙ୍ଗୀଙ୍କ ସମର୍ଥକମାନେ ମନୋଜାଙ୍କ ପ୍ରାର୍ଥୀତ୍ବକୁ ବିରୋଧ କରିବା ସହ ଉଭୟ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଛନ୍ତି। ଗତକାଲି ପ୍ରକାଶିତ କଂଗ୍ରେସ ପ୍ରାର୍ଥୀ ତାଲିକାରେ ନୀଳଗିରି ରାଜ ପରିବାରର ମନୋଜା ମଞ୍ଜରୀ ଦେବୀଙ୍କୁ ଦଳ ଟିକେଟ ଦେଇଛି। ଏହି ଟିକେଟ ପାଇବା ପରେ ମନୋଜା ମଞ୍ଜରୀ ଚିତ୍ତରଞ୍ଜନ ତାଙ୍କୁ ସମର୍ଥନ କରୁଛନ୍ତି ଓ ତାଙ୍କ ନିର୍ବାଚନରେ ସହଯୋଗ କରିବେ ବୋଲି କହିଥିଲେ। କିନ୍ତୁ ଆଜି ଏଠାରେ ବିଷମ ପରିସ୍ଥିତି ଦେଖିବାକୁ ମିଳିଛି। ତାଙ୍କ ପ୍ରାର୍ଥୀତ୍ବକୁ ନେଇ ବିରୋଧ କରାଯାଇଛି।
