ହରିୟାଣା ସିଙ୍ଗର ଓ ଚର୍ଚ୍ଚିତ ଡ୍ୟାନ୍ସର ସପନା ଚୌଧୁରୀ କଂଗ୍ରେସରେ ସାମିଲ ହୋଇଥିବା ଖବରକୁ ଖଣ୍ଡନ କରିଛନ୍ତି । ଗତକାଲି ଉତ୍ତର ପ୍ରଦେଶ କଂଗ୍ରେସ କମିଟିର ପ୍ରଦେଶ ସଂଗଠନ ମନ୍ତ୍ରୀ ନରେନ୍ଦ୍ର ରାଠି ଦିଲ୍ଲୀରେ ରାଜ ବବ୍ବରଙ୍କ ବାସଭବନରେ ସପନାଙ୍କୁ ପାର୍ଟିର ସଦସ୍ୟତା ଗ୍ରହଣ କରିଛନ୍ତି ବୋଲି ସୂଚନା ଦେଇଥିଲେ ଏବଂ ସେ ମଥୁରା ଲୋକସଭା ସିଟରୁ ବିଜେପି ପ୍ରାର୍ଥୀ ହେମା ମାଳିନୀଙ୍କ ବିରୋଧରେ ପ୍ରାର୍ଥୀ ହେବେ ବୋଲି ମଧ୍ୟ ଶୁଣିବାକୁ ମିଳିଥିଲା । କିନ୍ତୁ ଆଜି ସପ୍ନା ଏକ ସାକ୍ଷାତକାରରେ କଂଗ୍ରେସରେ ଯୋଗଦେବା ନେଇ ଉତ୍ତର ରଖିଛନ୍ତି । ସେ କଂଗ୍ରେସରେ ଯୋଗ ଦେଇନାହାନ୍ତି ବୋଲି କହିବା ସହିତ ପ୍ରିୟଙ୍କାଙ୍କ ସହ ତାଙ୍କର ପୁରୁଣା ଫଟୋ ବୋଲି ସେ କହିଥିଲେ । ସେ ରାଜନୀତିରେ ରୁଚି ରଖିନାହାନ୍ତି ଏବଂ ତାଙ୍କ ପାଇଁ ସବୁ ଦଳ ସମାନ ବୋଲି ସେ କହିଛନ୍ତି । ସେ କୌଣସି ପାର୍ଟି ପାଇଁ ମଧ୍ୟ ପ୍ରଚାର କରିବେ ନାହିଁ ବୋଲି କହିଛନ୍ତି । ହରିୟାଣାର ଏହି ଲୋକପ୍ରିୟ ଡ୍ୟାନ୍ସର ଜଣକ ‘ବିଗବସ୍’ ସିଜନ୍ ୧୧ରେ ଯୋଗଦେଇ ବେଶ୍ ଚର୍ଚ୍ଚାରେ ରହିଥିଲେ ।
