କନ୍ଦର୍ପ ବେହେରା
ରେଢାଖୋଲ: ରେଢାଖୋଲରେ ଦିନକୁ ଦିନ ହାତୀ ପ୍ରାଦୁର୍ଭାବରେ ଲୋକମାନେ ଅତିଷ୍ଠ ହୋଇପଡୁଥିବା ବେଳେ ବହୁ ଧନ ଜୀବନ ତଥା ଫସଲ ହାନୀ ହେଉଛି । ଏ ଦିଗରେ ବନ ବିଭାଗ ଆଖିଦୃଷ୍ଟିଆ ପଦକ୍ଷେପ ନେଉ ନ ଥିବା ଅଭିଯୋଗ ହେଉଛି । କେଉଁଠି ହାତୀକୁ ମଣିଷ ମାରୁଛି ତ ଆଉ କେଉଁଠି ହାତୀ ମଣିଷକୁ ମାରୁଛି । ଏପରିକି ହାତୀ ମାନେ ପରିତ୍ୟକ୍ତ କୁଅରେ ପଡୁଛନ୍ତି । ଏଭଳି ଏକ ଘଟଣା ଘଟିଛି ଗତକାଲି ରାତି ୮ ଟାରେ ରେଢାଖୋଲ ବନଖଣ୍ଡ ବଡବାହାଳ ରେଞ ଅଧିନସ୍ଥ କୁକୁଡାବାହାଳୀ ପଂଚାୟତର ବଡକଷିବାହାଳ ଗ୍ରାମରେ ।
ପ୍ରକାଶ ଯେ , ବଡକଷିବାହାଳ ଗ୍ରାମରେ ପାଖାପାଖି ରାତି ୮ ଟାରେ ଗ୍ରାମର ଜଙ୍ଗଲ ସନ୍ନିକଟ ଏକ ପରିତ୍ୟକ୍ତ କୂଅ ଭିତରେ ଏକ ଛୋଟ ମାଈ ହାତୀ ପଡିଯାଇଥିଲା । ବହୁ ଚେଷ୍ଟା ସତ୍ୱେ ସେ ବାହାରକୁ ଆସିବାରେ ସକ୍ଷମ ହୋଇପାରି ନ ଥିଲା । ଅନ୍ୟ ହାତୀମାନେ ବାହାରକୁ ଆଣିବାକୁ ଚେଷ୍ଟା କରି ମଧ୍ୟ ବାହାରକରି ପାରି ନଥିଲେ । ପାଖାପାଖି ୨୫ ଘର ହାତୀ ସେଇ କୂଅ ପାଖରେ ରୁଣ୍ଡ ହୋଇ ବହୁତ ଗର୍ଜନ କଲେ । ସେ ପଟେ ବଡକଷିବାହାଳ ଗ୍ରାମବାସୀ ହାତୀର ଚିତ୍କାରରେ ଭୟଭୀତ ହେବା ସହ ଅତିଷ୍ଟ ହୋଇ ପଡିଥିଲେ । ବନ ବିଭାଗକୁ ଗ୍ରାମବାସୀ ଖବର ଦେଇଥିଲେ ହେଲେ ବହୁ ବିଳମ୍ବରେ ବନ ବିଭାଗ ସେଠାକୁ ପହଂଚି ହାତୀ ଛୁଆଟିକୁ ଉଦ୍ଧାର କରିବାରେ ସଫଳ ହୋଇଥିଲେ । ଘଟଣା ସ୍ଥଳରେ ରେଢାଖୋଲ ଡିଏଫ୍ଓ , ରେଢାଖୋଲ ଥାନାଧିକାରୀ ଏବଂ ଦମକଳ ବାହିନୀ ଉପସ୍ଥିତ ଥିଲେ ।
ଦୀର୍ଘ ୨୯ ଦିନ ହେଲା କୁକୁଡାବାହାଳି , ବଡ କଷିବାହାଳ , କୁହ୍ଲମହ୍ଳିଆ, ସାନନୂଆଁପଡା , ଶିଶୁପର୍ଣ ଆଦି ଗ୍ରାମରେ ହାତୀମାନଙ୍କର ଆତଙ୍କରାଜ ଚାଲିଛି । ବହୁ ଧାନ ଫସଲ ନଷ୍ଟ କରି ଦେଉଛନ୍ତି । ଏ ଦିଗରେ ଜଙ୍ଗଲ ବିଭାଗ ସେତେଟା ଧ୍ୟାନ ଦେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି । ଯେତିକି ପରିମାଣର ଧାନ ଫସଲ ନଷ୍ଟ ହେଉଛି ଜଙ୍ଗଲ ବିଭାଗର କ୍ଷତି ପୂରଣ ସମୁଦ୍ରକୁ ଶଙ୍ଖେ ଭଳି । ଯା ଫଳରେ ଏଠାକାର ଗ୍ରାମବାସୀ ବହୁତ କ୍ଷତି ସହୁଛନ୍ତି ଦାନ ଚାଷ କରି । ସରକାର ଉଚିତ୍ କ୍ଷତିପୂରଣ ଦେବାକୁ ଗ୍ରାମବାସୀମାନେ ଦାବୀ କରୁଛନ୍ତି । ହାତୀକୁ ଘଉଡାଇବାକୁ ମଧ୍ୟ ଅଂଚଳବାସୀ ଦାବୀ କରୁଛନ୍ତି ।