ଭୁବନେଶ୍ୱର: ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ନୂତନ କୃଷିନୀତି ବାତିଲ ଦାବୀରେ ଚାଲିଥିବା ସର୍ବଭାରତୀୟ ଅନ୍ଦୋଳନ ସମର୍ଥନରେ ଆହୂତ ୪ ଘଣ୍ଟିଆ ରେଳରୋକରେ ଆଜି ସାମିଲ ହୋଇଥିଲା ‘ଆମ ଅଧିକାର’।
ଏହି କୃଷକ ଆନ୍ଦୋଳନ ସମର୍ଥନରେ ଓଡ଼ିଶାରୁ ସର୍ବପ୍ରଥମେ ୨୦ ଜଣିଆ ପ୍ରତିନିଧି ମଣ୍ଡଳୀ ନେଇ ସିନ୍ଧୁ ସୀମାରେ ସାମିଲ ହୋଇଥିବା ‘ଆମ ଅଧିକାର’ ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ପୂର୍ବରୁ ଦିଆଯାଇଥିବା ସାଧାରଣ ହରତାଳ, ଭାରତ ବନ୍ଦ, ଚକା ଜାମ୍ ଏବଂ ସହିଦ୍ କୃଷକଙ୍କ ସମର୍ଥନରେ ଦୀପ ପ୍ରଜ୍ଜ୍ୱଳନ ଆଦି ପ୍ରତିଟି ଡ଼ାକରାରେ ସାମିଲ ହୋଇ ଆସୁଥିବା ‘ଆମ ଅଧିକାର’ ପକ୍ଷରୁ ଆବାହକ ଅମିୟ ପାଣ୍ଡବ, ସାଧାରଣ ସମ୍ପାଦକ ଗଣେଶ ଦାଶ, ସମ୍ପାଦକ ପାର୍ଥସାରଥୀ ଜେନାଙ୍କ ନେତୃତ୍ୱରେ ବରିଷ୍ଠ କର୍ମକର୍ତ୍ତା ସର୍ବଶ୍ରୀ ସଞ୍ଜୟ ପରିଡ଼ା, କ୍ରିଷ୍ଣା ଶତପଥୀ ଏବଂ ବିଶ୍ୱଭୂଷଣ ମହାପାତ୍ରଙ୍କ ସମେତ ବହୁ ସାଥୀ ଆଜି ଭୁବନେଶ୍ୱର ରେଳଷ୍ଟେସନରେ ରେଳ ରୋକ କରିଥିଲେ।
ପ୍ରଥମେ ଏକ ଶୋଭାଯାତ୍ରାରେ ଆସି ସମଗ୍ର ଷ୍ଟେସନ ପରିକ୍ରମା କରି କେନ୍ଦ୍ର ସରକାରଙ୍କ ଆଭିମୁଖ୍ୟ ବିରୋଧରେ ସ୍ଲୋଗାନ ଦେବା ସହ ୧ନମ୍ବର ପ୍ଲାଟଫର୍ମରେ ରେଳରୋକ କରିଥିଲେ ଏବଂ ଏହି କୃଷକ ବିରୋଧୀ କଳା ଆଇନ ପ୍ରତ୍ୟାହାର ନ ହେବାଯାଏ ଆନ୍ଦୋଳନ ଚାଲୁ ରହିବ ବୋଲି ଘୋଷଣା କରିଥିଲେ।
