ସମୀକ୍ଷା ବ୍ୟୁରୋ
ନବୀନଙ୍କ ସ୍ବାସ୍ଥ୍ୟ ଖରାପ ଅଛି ବୋଲି ଯେଉଁ ଅପପ୍ରଚାର ହୋଇଥିଲା, ତାହାର ଗୁମର ଖୋଲିଛନ୍ତି ଖୋଦ ନବୀନ ପଟ୍ଟନାୟକ। ଜାତୀୟ ଗଣମାଧ୍ୟମ ଏନଡିଟିଭିକୁ ଏକ ସାକ୍ଷାତକାର ଦେଇ ନବୀନ ବୈଜୟନ୍ତଙ୍କ ଷଢଯନ୍ତର ଖୁଲାସା କରିଛନ୍ତି। ନବୀନ କହିଛନ୍ତି ଯେ, ପୂର୍ବେ ମୋର ଦେହ ଖରାପ ଅଛି ବୋଲି ଗଣମାଧ୍ୟମରେ ଯେଉଁ ପ୍ରଚାର କରାଯାଇଥିଲା, ତାହାର ମୂଳରେ ଥିଲେ ବୈଜୟନ୍ତ ପଣ୍ଡା। ନବୀନଙ୍କ ଏପରି ଖୁଲାସା ପରେ ବର୍ତ୍ତମାନ ରାଜ୍ୟ ରାଜନିତୀରେ ଏହାକୁ ନେଇ ହଟଚମଟ ସୃଷ୍ଟି ହୋଇଛି। କାରଣ ନବୀନଙ୍କ ସ୍ବାସ୍ଥ୍ୟ ଖରାପ ଅଛି ବୋଲି ଅପପ୍ରଚାର କରି ତାଙ୍କର ଗୁରୁତ୍ବକୁ ହ୍ରାସ କରିବା ପାଇଁ ସେତେବେଳେ ବୈଜୟନ୍ତ ଚାହୁଁଥିଲେ ବୋଲି ଏଥିରୁ ସ୍ପଷ୍ଟ ହୋଇଛି।
ଏନଡିଟିଭିର ସାମ୍ବାଦିକ ଶ୍ରୀନିବାସ ଜୈନ ନବୀନ ନିବାସରେ ନବୀନଙ୍କ ସାକ୍ଷାତକାର ନେଇଛନ୍ତି। ଆଉ ସେ ଏପରି ସମୟରେ ନେଇଛନ୍ତି ଯେତେବେଳେ ନବୀନ ବ୍ୟାୟମ କରୁଥିଲେ। ଶ୍ରୀନିବାସ ପଚାରିଛନ୍ତି ଯେ, ସେ ଏପରି ବ୍ୟାୟମ ପ୍ରକୃତରେ କରନ୍ତି ନା ଆଜି କ୍ୟାମେରା ପାଇଁ ଏପରି କରୁଛନ୍ତି। ଏହାର ଉତ୍ତରରେ ନବୀନ କହିଥିଲେ ଯେ ନା ସେ ପ୍ରାୟ ଏପରି ବ୍ୟାୟମ ବହୁ ବର୍ଷ ଧରି କରିଆସୁଛନ୍ତି। ଏହାପରେ ଶ୍ରୀନିବାସଙ୍କ ପ୍ରଶ୍ନ ଥିଲା ଯେ, ତେବେ ହଠାତ ଗଣମାଧ୍ୟମରେ ଆପଣଙ୍କ ସ୍ବାସ୍ଥ୍ୟ ଖରାପ ଅଛି ବୋଲି ଏକ ପ୍ରଚାର କରାଯାଇଥିଲା। ତାହାର ଉତ୍ତରରେ ନବୀନ ଖୋଲାଖୋଲି ବୈଜୟନ୍ତଙ୍କ ଷଢଯନ୍ତ୍ର ବୋଲି କହିଥିଲେ।
ଗତ 2017 ମସିହା ଫେବୃୟାରୀ 17 ତାରିଖରେ ଏକ ଡିଜିଟାଲ ମିଡିଆରେ ପ୍ରକାଶ ପାଇଲା ଯେ, ନବୀନ ପଟ୍ଟନାୟକଙ୍କ ସ୍ବାସ୍ଥ୍ୟ ଗୁରୁତର ହୋଇପଡିଛି। ସେ ଆଉ ଚଳପ୍ରଚଳ କରିପାରୁ ନାହାଁନ୍ତି। ନୂଆଦିଲ୍ଲୀ ଯାଇ ଚିକିତ୍ସା କରିବା ପାଇଁ ବନ୍ଦୋବସ୍ତ ଚାଲିଛି। ଏହି ଖବର ପ୍ରକାଶିତ ହେବା ପରେ ତାକୁ ଆଧାର କରି ବୈଜୟନ୍ତଙ୍କ ଗଣମାଧ୍ୟମ ସେତେବେଳେ ଏହି ଖବରକୁ ବାରମ୍ବାର ପ୍ରସାରଣ କରିଥିଲା। ଏପରିକି ଏହି ଚ୍ୟାନେଲରେ ରିପୋର୍ଟରଙ୍କ ଲାଇଭ ଏପରି ନିଆଯାଇଥିଲା ଯେ, ଲାଗିଲା ସତେ ଯେମିତି ନବୀନଙ୍କ ସ୍ବାସ୍ଥ୍ୟ ବହୁ ଗୁରୁତର ହୋଇପଡିଛି। ଏପରି ଖବର ପରେ ଖୋଦ ନବୀନ ବାହାରକୁ ଆସି ତାଙ୍କ ସ୍ବାସ୍ଥ୍ୟ ଭଲ ଅଛି ବୋଲି ସଫେଇ ଦେବାକୁ ବାଧ୍ୟ ହୋଇଥିଲେ।
ସେତେବେଳେ ଏହି ଖବର ବୈଜୟନ୍ତଙ୍କ ଚ୍ୟାନେଲରେ ବାରମ୍ବାର ପ୍ରସାରଣ ହେବାର ଯେଉଁମାନେ ଦେଖିଛନ୍ତି ସେମାନେ ମଧ୍ୟ ଆଶ୍ଚର୍ଯ୍ୟ ହୋଇପଡିଥିଲେ। କାରଣ ଥିଲା ସତରେ ଯଦି ନବୀନଙ୍କ ସ୍ବାସ୍ଥ୍ୟ ଖରାପ ଅଛି ତେବେ ଅନ୍ୟ ନ୍ୟୁଜ ଚ୍ୟାନେଲ ମଧ୍ୟ ଏହାକୁ ପ୍ରସାରଣ କରୁଥିବେ। ହେଲେ ସେତେବେଳେ କେବଳ ବୈଜୟନ୍ତଙ୍କ ଚ୍ୟାନେଲକୁ ଛାଡିଦେଲେ ଅନ୍ୟମାନେ ଏହି ଖବର ନେଉ ନ ଥିଲେ। ଫଳରେ ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା। ଏହି ଖବର ପରେ ମୁଖ୍ୟମନ୍ତ୍ରୀ କାର୍ଯ୍ୟାଳୟ ମଧ୍ୟ ତନାଘନା କରି ବୈଜୟନ୍ତ ପଣ୍ଡାଙ୍କ ଉପରେ ହିଁ ସନ୍ଦେହ କରିଥିଲା। ବୈଜୟନ୍ତଙ୍କ ହାବଭାବ ଉପରେ ମୁଖ୍ୟମନ୍ତ୍ରୀ କାର୍ଯ୍ୟାଳୟ ସେହି ଦିନଠାରୁ ଅନୁଧ୍ୟାନ କରିଆସୁଥିଲେ। ପ୍ରମାଣ ଥାଉ କି ନ ଥାଉ ବୈଜୟନ୍ତଙ୍କ ଏପରି କାରାସାଦୀର ମୁଖ୍ୟ ଉଦ୍ଦେଶ୍ୟ ଥିଲା ଯେ, ନବୀନଙ୍କ ପରେ ସେ ବିଜେଡିର ମଙ୍ଗ ଧରିବେ। ଏହା ଖୋଦ ନବୀନ ଜାଣିବା ପରେ ଟାଣୁଆ ବୈଜୟନ୍ତଙ୍କ ଟାଣ ପଣ ଭାଙ୍ଗି ଦଳରୁ ବହିସ୍କାର କରିଦେଲେ।
( ମୋବାଇଲରେ ଫଟାଫଟ ଖବର ଜାଣିବା ପାଇଁ ଡାଉନଲୋଡ କରନ୍ତୁ SANKHIPTA, ଏହି ଆପ୍ ଡାଇନଲୋଡ ପରେ ଟିପରେ ସ୍କ୍ରନକୁ ଠେଲି ପଢି ଚାଲନ୍ତୁ ଖବର ପରେ ଖବର )