ସୀତାରାମ ଅଗ୍ରୱାଲ
ବାଣପୁର: ଟୀକାନେବାକୁ ନେଇ ବାଣପୁରରେ ପ୍ରତିଦିନ ବିଭିନ୍ନ ହୃଦୟ ବିଦାରକ ଦୃଶ୍ୟ ସାମ୍ନାକୁ ଆସୁଛି। ନାଗରିକମାନେ ଦିନ ଦିନ ଧରି ଟୀକା ନେବାପାଇଁ ଧାଡିରେ ଅପେକ୍ଷା କରୁଥିବାର ଦେଖାଯାଇଛି। ବେଆଇନ ଭାବେ ଦିନକ ପୂର୍ବରୁ କେତେକ ବ୍ୟକ୍ତି ଟୀକା କେନ୍ଦ୍ର ସମ୍ମୁଖରେ ନିଜର ଆଧାର କାର୍ଡର ନକଲରେ ମୋବାଇଲ ନମ୍ବର ଲେଖି ଥୋଇ ଦେଇ ଜାଗା ମାଡ଼ିବସୁଛନ୍ତି। ଯାହାଫଳରେ ଟୀକାକରଣ ଦିନ ସଠିକ ସମୟରେ ଆସୁଥିବା ବ୍ୟକ୍ତି ଟୀକା ପାଇପାରୁନାହାନ୍ତି। ଅପରପକ୍ଷରେ ଏହାଦ୍ୱାରା ସାଇବର ଠକେଇର ଶିକାର ବି ଜନସାଧାରଣମାନେ ହେବାର ବହୁ ସମ୍ଭାବନା ରହୁଛି। ସେହିପରି ଭାବେ ଅନ୍ୟ କେତେକ ଟୀକାକେନ୍ଦ୍ର ସମ୍ମୁଖରେ ଟୀକାର କଳାବଜାରୀ ହେଉଥୁବାର ମଧ୍ୟ ଅଭିଯୋଗ ହେଉଛି।
ତେବେ ଏସବୁ ସମସ୍ୟାକୁ ସ୍ଥାନୀୟ ପୋଲିସ ଏବଂ ପ୍ରଶାସନ ଗୁରୁତର ସହ ନେଇଛି। ବାଣପୁର ବ୍ଲକ ଏବଂ ଏନଏସି ଅଞ୍ଚଳରେ ଟୀକାକରଣ ପ୍ରକ୍ରିୟାକୁ ସରଳିକରଣ କରିବା ପାଇଁ ପାଇଁ ସ୍ଥାନୀୟ ପ୍ରଶାସନ ଏକ ବଡ ପଦକ୍ଷେପ ନେଇଛି।
ଏହି ପରିପ୍ରେକ୍ଷୀରେ ଆଜି ଅପରାହ୍ନରେ ବାଣପୁର ତହସିଲଦାରଙ୍କ କାର୍ଯ୍ୟାଳୟରେ ଏକ ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ଅଗାମୀ ଦିନରେ ବାଣପୁର ବ୍ଲକରେ ପଞ୍ଚାୟତ ସ୍ତରୀୟ ଏବଂ ଏନଏସି ରେ ୱାର୍ଡ ସ୍ତରୀୟ ଟୀକାକରଣ ପାଇଁ ନିଷ୍ପତ୍ତି କରାଯାଇଛି। ଏଥି ନିମନ୍ତେ ନିମ୍ନଲିଖିତ ପଦକ୍ଷେପ ଗୁଡ଼ିକ ଗ୍ରହଣ କରାଯିବା ପାଇଁ ନିଷ୍ପତ୍ତି ନିଆଯାଇଛି।
ବାଣପୁର ବିଡ଼ିଓ ପ୍ରତି ପଞ୍ଚାୟତର ଟୀକାକରଣ କେନ୍ଦ୍ରର ସୂଚୀ ପ୍ରସ୍ତୁତ କରିବେ। ଏବଂ ଏହାର ବ୍ୟବସ୍ଥା ମଧ୍ୟ ବୁଝିବେ। ସମାନ ଜିନିଷ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ମଧ୍ୟ ପ୍ରତି ୱାର୍ଡରେ କରିବେ ଉଭୟ ଅଧିକାରୀ ପ୍ରତି ଟୀକାକରଣ କେନ୍ଦ୍ରରେ ବ୍ୟାରିକେଡ଼ ସହ ପିଇବା ପାଣି ବ୍ୟବସ୍ଥା କରାଇବେ। ବାଣପୁର ଥାନାଧିକାରୀ ସବୁ ଟୀକା କେନ୍ଦ୍ରରେ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ ନିମନ୍ତେ ପୋଲିସ କର୍ମଚାରୀ ନିୟୋଜିତ କରିବେ।
ସମସ୍ତ ଅଧିକାରୀମାନେ ନିୟମିତ ଭାବେ ଟୀକା କେନ୍ଦ୍ର ସମ୍ମୁଖରେ ବେଆଇନ ଭାବେ ରଖାଯାଉଥିବା ଆଧାର କାର୍ଡ ନକଲ ଏବଂ ମୋବଇଲ ନମ୍ବରକୁ ଯାଞ୍ଚ କରିବେ। ଯଦ୍ବାରା ସାଇବର ଠକଙ୍କ ଠାରୁ ଜନସାଧାରଣଙ୍କୁ ରକ୍ଷା କରାଯାଇପାରିବ।
ବାଣପୁର ମେଡିକାଲ ଏବଂ ଏନଏସି ପ୍ରଶାସନ ଟୀକାକରଣର ବହୁ ପୂର୍ବରୁ ମହଜୁଦ ଥିବା ଟୀକାର ସୂଚନା ଜନସାଧାରଣଙ୍କୁ ବିଭିନ୍ନ ମାଧ୍ୟମରେ ଜଣାଇବେ।
ସରପଞ୍ଚ/ୱାର୍ଡ ମେମ୍ବର /ୱାର୍ଡ ଅଫିସର(ଏନଏସି) ମାନେ ଟୀକାକରଣର ବିସ୍ତୃତ ସୂଚନା ଜନସାଧାରଣଙ୍କ ନିକଟରେ ପହଞ୍ଚାଇବା ପାଇଁ ପ୍ରଶାସନ ଅନୁରୋଧ କରିଛି।
ତେବେ ଟୀକାକେନ୍ଦ୍ରରେ ସ୍ଥାନୀୟ ବ୍ୟକ୍ତିଙ୍କୁ ଚି଼ହ୍ନଟ ଏବଂ ବାହ୍ୟ ବ୍ୟକ୍ତିଙ୍କ ପ୍ରବେଶ କୁ ରୋକିବା ନିମନ୍ତେ ଆଗକୁ ସରପଞ୍ଚ/ୱାର୍ଡ ମେମ୍ବର/ୱାର୍ଡ ଅଫିସରଙ୍କ ସହ ପ୍ରଶାସନର ଆଉ ଗୋଟାଏ ବୈଠକ ହେବ ବୋଲି ସୂଚନା ମିଳିଛି।
ଏହି ବୈଠକରେ ତହସିଲଦାର, ଅତିରିକ୍ତ ତହସିଲଦାର, ବିଡ଼ିଓ, ବାଲୁଗାଁ ଏସଡ଼ିପିଓ, ବାଣପୁର ଆଇଆଇସି, ଏନଏସି କାର୍ଯ୍ୟନିର୍ବାହୀ ଅଧିକାରୀ ଆଦି ସାମିଲ ଥିଲେ।