ସୀତାରାମ ଅଗ୍ରୱାଲ
ଚିଲିକା: ଖୋର୍ଦ୍ଧା ଜିଲ୍ଲା ନାଚୁଣି ଫାଣ୍ଡି ଅଞ୍ଚଳରେ ସଡ଼କ ଦୁର୍ଘଟଣାରେ ଜଣେ ଯୁବକ ପ୍ରାଣ ହରାଇଛନ୍ତି। ଏନେଇ ନାଚୁଣି ଫାଣ୍ଡି ପୋଲିସ ସୂଚନା ଦେଇଛି।
ନାଚୁଣି ଫାଣ୍ଡି ଅଧିକାରୀ ଉମାକାନ୍ତ ସାହୁଙ୍କ ସୂଚନା ମୁତାବକ ଆଜି ସକାଳେ ନାଚୁଣି ଓଭର ବ୍ରିଜ ନିକଟରେ ଜଣେ ମୃତ ବ୍ୟକ୍ତି ପଡିଥିବାର ଖବର ପାଇଥିଲା ପୋଲିସ। ଦୁର୍ଘଟଣା କାରଣରୁ ଉକ୍ତ ବ୍ୟକ୍ତିଙ୍କ ମୃତ୍ୟୁ ହୋଇଥିବା ପୋଲିସ ଜାଣିବାକୁ ପାଇଥିଲା। ମୃତ ବ୍ୟକ୍ତିଙ୍କ ନାମ ହେଉଛି ଗୋପୀନାଥ ମୁଦୁଲି (୩୫)। ତାଙ୍କ ନିଜଘର ସୁନଖଳା ଗ୍ରାମ ହୋଇଥିବାବେଳେ ସେ କିନ୍ତୁ ନାଚୁଣିରେ ରହୁଥିଲେ।
ସବୁଦିନ ପରି ଆଜି ସକାଳେ ଗୋପୀନାଥ ଶୌଚ ହେବା ନିମନ୍ତେ ନାଚୁଣି ଓଭର ବ୍ରିଜ ନିକଟକୁ ଯାଇଥିବାବେଳେ କୌଣସି କାରଣ ବଶତଃ ଏକ ଯାନ ତାଙ୍କୁ ଧକ୍କା ଦେଇ ଫେରାର ହୋଇଯାଇଥିଲା। ଫଳରେ ଘଟଣାସ୍ଥଳରେ ଗୋପୀନାଥ ଙ୍କର ମୃତ୍ୟୁ ହୋଇଛି।
ପୋଲିସ ଠାରୁ ସୂଚନା ପାଇ ଗଙ୍ଗାଧରପୁର ଅଗ୍ନିଶମ ବହିନୀ ଉକ୍ତ ମୃତ ବ୍ୟକ୍ତିଙ୍କ ଶବକୁ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବର୍ତ୍ତମାନ ନାଚୁଣି ଫାଣ୍ଡି ପୋଲିସ ଏ ସଂକ୍ରାନ୍ତରେ ବାଣପୁର ଥାନାରେ ୨୯୧/୨୧ ଏକ ମାମଲା ରୁଜୁ କରି ଶବ ବ୍ୟବଚ୍ଛେଦ ନିମନ୍ତେ ବାଣପୁର ପଠେଇଦେଇଛି। ଏହା ଉପରେ ଅଧିକ ତଦନ୍ତ ଜାରି ରହିଛି ବୋଲି ନାଚୁଣି ଫାଣ୍ଡି ଅଧିକାରୀ ଶ୍ରୀ ସାହୁ ସୂଚନା ଦେଇଛନ୍ତି।
