ସୀତାରାମ ଅଗ୍ରୱାଲ
ବାଣପୁର: କାଠଚୁଲିରୁ ନିଆଁ ଧରି ଘର ଜଳିଯାଇଛି। ଏହି ଅଗ୍ନିକାଣ୍ଡରୁ ବୃଦ୍ଧ ଦମ୍ପତି ଦ୍ୱୟ ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି। ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ନୀଳାଦ୍ରିପ୍ରସାଦ ଗ୍ରାମରେ ଏପରି ଏକ ଦୁଃଖଦ ଘଟଣା ଘଟିଯାଇଛି।
ହସ୍ତଗତ ହୋଇଥିବା ତଥ୍ୟ ମୁତାବକ ନୀଳାଦ୍ରିପ୍ରସାଦ ଗ୍ରାମର ଗଙ୍ଗାଧର ନାୟକ ଏବଂ ଅନ୍ନପୂର୍ଣ୍ଣା ନାୟକ ନାମକ ବୃଦ୍ଧ ଦମ୍ପତି ଏକ ଛୋଟ ଚାଳ ଘରେ ବସବାସ କରନ୍ତି। ତେବେ ଆଜି ପୂର୍ବାହ୍ନ ୧୧.୩୦ ଘଟିକାରେ ଅନ୍ନପୂର୍ଣ୍ଣା କାଠ ଚୁଲିରେ ରୋଷେଇ କରୁଥିବା ବେଳେ କୌଣସି କରଣ ବଶତଃ ଚୁଲିରୁ ନିଆଁ ଚାଳକୁ ଲାଗିଯାଇଥିଲା। ଏବଂ ଦେଖୁ ଦେଖୁ ସାରା ଘରେ ନିଆଁ ଧରିଦେଇଥିଲା। ଉଭୟ ବୃଦ୍ଧ ସ୍ୱାମୀ ସ୍ତ୍ରୀ ଚିତ୍କାର କରିବାରୁ ଗ୍ରାମବାସୀ ମାନେ ସଙ୍ଗେସଙ୍ଗେ ପାଣି ଆଣି ନିଆଁ ଲିଭାଇବାକୁ ଚେଷ୍ଟା ଜାରିରଖିଥିବା ବେଳେ ଅଗ୍ନିଶମ ବିଭାଗକୁ ମଧ୍ୟ ଖବର ଦେଇଥିଲେ।
ସୂଚନା ମୁତାବକ ଘରର ସତୁରି ଭାଗ ପୋଡି ପାଉଁଶ ହୋଇଯାଇଛି। ତେବେ ଗଙ୍ଗାଧର ନିହାତି ଗରିବ ହୋଇଥିବାରୁ ସରକାରଙ୍କ ପକ୍ଷରୁ ତାଙ୍କ ପରିବାରକୁ ସାହାଯ୍ୟ ପାଇଁ ସାଧାରଣରେ ଦାବି ହେଉଛି।
