ସୁପ୍ରିମ୍କୋର୍ଟ ମୁଖ୍ୟ ବିଚାରପତି ରଞ୍ଜନ ଗୋଗୋଇଙ୍କ ବିରୋଧରେ ଚାଲିଥିବା ଯୌନ ନିର୍ଯାତନା ମାମଲାର ବିଚାର କରୁଥିବା ସ୍ବତନ୍ତ୍ର ଖଣ୍ଡପୀଠ ସିବିଆଇ ମୁଖ୍ୟ, ଦିଲ୍ଳୀ ପୋଲିସ୍ ମୁଖ୍ୟ ଏବଂ ଆଇବି ମୁଖ୍ୟଙ୍କ ସହିତ ଏକ ରୁଦ୍ଧଦ୍ବାର ବୈଠକ କରିଛନ୍ତି। ମୁଖ୍ୟ ବିଚାରପତିଙ୍କୁ ଏହି ମାମଲାରେ ଫସାଇବାକୁ ଏକ ବଡ ଷଡଯନ୍ତ୍ର କରାଯାଉଛି ବୋଲି ଉତ୍ସବ ବେଂଶ ଅଭିଯୋଗ କରିବା ପରେ ବୁଧବାର ଖଣ୍ଡପୀଠ ଏହି ନିଷ୍ପତ୍ତି ନେଇଛନ୍ତି। ଏହି ବୈଠକ ସମ୍ପର୍କରେ ଖଣ୍ଡପୀଠ କୌଣସି ସୂଚନା ପ୍ରଦାନ କରିନାହାନ୍ତି। ଏହି ବୈଠକକୁ ସମ୍ପୂର୍ଣ୍ଣ ଗୋପନ ରଖାଯିବ ବୋଲି ବିଚାରପତି ଅରୁଣ ମିଶ୍ର କହିଛନ୍ତି। ଅରୁଣ ମିଶ୍ରଙ୍କ ସହିତ ରୋହିଣ୍ଟନ୍ ନରିମାନ୍ ଏବଂ ଦୀପକ ଗୁପ୍ତା ଏହି ଖଣ୍ଡପୀଠର ସଦସ୍ୟ ରହିଛନ୍ତି। ଏହି ମାମଲରେ ଉତ୍ସବ ବେଂଶଙ୍କୁ ସମ୍ପୂର୍ଣ୍ଣ ପୋଲିସ୍ ସୁରକ୍ଷା ପ୍ରଦାନ ପାଇଁ ଦିଲ୍ଲୀ ପୋଲିସକୁ ନିର୍ଦ୍ଦେଶ ଦେଇଛନ୍ତି ଖଣ୍ଡପୀଠ। ନିଜର ଦ୍ବିତୀୟ ସତ୍ୟପାଠ ଦାଖଲ କରିବାକୁ ବେଂଶଙ୍କ ଆବେଦନ ଉପରେ ହାତଲେଖା ସତ୍ୟପାଠ ଦାଖଲ ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ। ସେହିପରି ବେଂଶଙ୍କ ସତ୍ୟପାଠର ସତ୍ୟତା ପରୀକ୍ଷଣ ପାଇଁ ସୁପ୍ରିମ୍କୋର୍ଟ ଏକ ସ୍ବତନ୍ତ୍ର ଟିମ୍ ଗଠନ କରିବେ ବୋଲି ଜଷ୍ଟିସ୍ ତୁଷାର ମେହେଟ୍ଟା ସୂଚନା ଦେଇଛନ୍ତି।
