ରାଜ୍ୟରେ ଆଉ ଗୋଟିଏ ପର୍ଯ୍ୟାୟ ନିର୍ବାଚନ ବାକି ରହିଛି। ଏହି ପର୍ଯ୍ୟାୟର ୬ଟି ଲୋକସଭା ଆସନ ଉପରେ ଉଭୟ ବିଜେଡ଼ି ଓ ବିଜେପିଙ୍କ ନଜର ରହିଛି। ଏବେବି ଉଭୟ ଦଳ ପକ୍ଷରୁ ଚାଲିଛି ଆରୋପ – ପ୍ରତ୍ୟାରୋପ। କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ୍ କରିଛନ୍ତି। ସେ କଟାକ୍ଷ କରି କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୋଦି ଓ ପରିବର୍ତ୍ତନ ଦୁଇଟି ଶବ୍ଦ ଶୁଣିଲେ ବିରକ୍ତ ହୋଇଯାଉଛନ୍ତି। ଆଜି ଭୁବନେଶ୍ୱର ସ୍ଥିତ ଦଳୀୟ ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ କଥା କହିବା ସହିତ ମୁଖ୍ୟମନ୍ତ୍ରୀଙ୍କୁ ଗଲା ୧୯ ବର୍ଷର ହିସାବ ମାଗିବା ସହିତ ଆଗାମୀ ୫ ବର୍ଷରେ କ’ଣ କରିବାକୁ ଯୋଜନା କରିଛନ୍ତି, ତା’ର ବି ଜବାବ ମାଗିଛନ୍ତି। ନବୀନଙ୍କୁ ସମାଲୋଚନା କରି ଧର୍ମେନ୍ଦ୍ର ଆହୁରି କହିଥିଲେ,“ଓଡ଼ିଶାର ଲୋକେ ଆପଣଙ୍କୁ ବହୁତ ବଡ଼ ସୁଯୋଗ ଦେଇଥିଲେ। ଆପଣ ୧୯ ବର୍ଷ ଧରି କ୍ଷମତାରେ ରହିଲେ। କିନ୍ତୁ ରାଜ୍ୟର ଯେମିତି ବିକାଶ ହେବା କଥା, ତାହା ହୋଇନାହିଁ। କାରଣ ଏଥିପାଇଁ ଆପଣଙ୍କ ପାଖରେ ରାଜନୈତିକ ଇଚ୍ଛାଶକ୍ତି ନାହିଁ। ରାଜ୍ୟରେ ଶିଶୁ ମୃତ୍ୟୁହାର ଓ କୁପୋଷଣ ଭଳି ସମସ୍ୟା ଦେଖାଯାଉଛି।’ ସେହିପରି ଚତୁର୍ଥ ପର୍ଯ୍ୟାୟର ଚର୍ଚ୍ଚାରେ କେନ୍ଦ୍ରବିନ୍ଦୁ ଥିବା କେନ୍ଦ୍ରାପଡାର ଲୋକସଭା ଆସନ ପାଇଁ ବିଜେଡ଼ିର ରଣନୀତିକୁ ମଧ୍ୟ ସମାଲୋଚନା କରିଛନ୍ତି ଧର୍ମେନ୍ଦ୍ର।
