ବରିଷ୍ଠ କଂଗ୍ରେସ ନେତା ଦିଗ୍ବିଜୟ ସିଂ ମାସୁଦ୍ ଆଝାରକୁ ବିଶ୍ବ ଆତଙ୍କବାଦୀ ଘୋଷଣା ଉପରେ ପ୍ରଶ୍ନ ଉଠାଇଛନ୍ତି । ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ବନ୍ଧୁତ୍ବ ଅତ୍ୟନ୍ତ ନିବିଡ ଏପରି ସ୍ଥଳେ ବିଶ୍ବ ଆତଙ୍କବାଦୀ ଘୋଷଣା କୌଣସି ପ୍ରଭାବ ପକାଇବ ନାହଁ ବୋଲି ଦିଗ୍ବିଜୟ କହିଛନ୍ତି । ସୂଚନାଯୋଗ୍ୟ ଯେ, ଗତକାଲି ମିଳିତ ଜାତିସଂଘ ପକ୍ଷରୁ ଜୈସ ଏ ମହମ୍ମଦ ମୁଖ୍ୟ ମାସୁଦ ଆଝାରକୁ ବିଶ୍ବ ଆତଙ୍କବାଦୀ ଘୋଷଣା କରାଯାଇଥିଲା । ଦାଉଦ୍ ଇବ୍ରାହିମ୍, ମାସୁଦ୍ ଆଝାର ଏବଂ ହଫିଜ୍ ସଇଦ୍ଙ୍କୁ ତୁରନ୍ତ ଭାରତକୁ ପ୍ରତ୍ୟର୍ପଣ କରାଯିବା ଉଚିତ୍ ବୋଲି ଭୋପାଳରେ ଏକ ନିର୍ବାଚନୀ ରାଲିରେ କହିଛନ୍ତି ଦିଗ୍ବିଜୟ । ଆଝାର ଉପରେ ବିଶ୍ବ ସମୁଦାୟର ବାସନ୍ଦାଦେଶକୁ କଂଗ୍ରେସ ସ୍ବାଗତ କରୁଛି ଏବଂ ସରକାର ବର୍ତ୍ତମାନ ଆଝାର ଉପରେ ପୁରସ୍କାର ରାଶି ଘୋଷଣା କରିବା ଉଚିତ୍ ବୋଲି କହିଛନ୍ତି ଦିଗ୍ବିଜୟ । ଉଲ୍ଲେଖଯୋଗ୍ୟ ଯେ, ପୁଲଓ୍ବାମାରେ ଫେବୃୟାରୀ ମାସରେ ହୋଇଥିବା ଆକ୍ରମଣରେ ୪୦ ଭାରତୀୟ ଯବାନ୍ପ୍ରାଣ ହରାଇଥିଲେ ଏହି ଆକ୍ରମଣରେ ଆଝାର ସମ୍ପୃକ୍ତ ଥିଲା ।
