ଲୋକସଭା ନିର୍ବାଚନ ଚାଲୁଥିବା ସମୟରେ ପଂଜାବ ନ୍ୟାସନାଲ୍ ବ୍ୟାଙ୍କ୍ ଘୋଟାଲା ମାମଲାରେ କେନ୍ଦ୍ର ସରକାରଙ୍କୁ ଝଟ୍କା ଲାଗିଛି । ଏହି ଘୋଟାଲାର ମୁଖ୍ୟ ଆରୋପୀ ମେହୁଲ୍ ଚୋକ୍ସୀଙ୍କୁ ଆଣ୍ଟିଗୁଆ ପ୍ରଶାସନ ଗିରଫ କରିବାକୁ ମନା କରିଛନ୍ତି । ଚୋକ୍ସୀଙ୍କ ଉପରେ ସାଢେ ୧୩ କୋଟି ଅର୍ଥରାଶି ଘୋଟାଲାର ଅଭିଯୋଗ ରହିଛି । ମେହୁଲ୍ ଭାରତରୁ ଫେରାର୍ ହୋଇ ଆଣ୍ଟିଗୁଆରେ ରହୁଛନ୍ତି । ଭାରତୀୟ ଯାଞ୍ଚ ଏଜେନ୍ସି ଇଣ୍ଟରପୋଲ୍ଠୁ ଆଣିଥିବା ରିପୋର୍ଟରେ ଆଣ୍ଟିଗୁଆର ଇଣ୍ଟରପୋଲ୍ର ପବ୍ଲିକ୍ ପ୍ରୋସିକ୍ୟୁସନର ନିର୍ଦ୍ଦେଶକ ଏହି ସମ୍ବନ୍ଧୀୟ ଲିଖିତ ସୂଚନା ଦେଇଛନ୍ତି । ଏହି ରିପୋର୍ଟରେ ଆଣ୍ଟିଗୁଆ ସରକାର ଚୋକ୍ସୀଙ୍କୁ ଗିରଫ କରିବାକୁ ସିଧାସଳଖ ମନା କରିଛନ୍ତି । ଏହି ଘଟଣା ପରେ ଭାରତୀୟ ବିଦେଶ ମନ୍ତ୍ରାଳୟର ଅତିରିକ୍ତ ସଚିବ ମନପ୍ରୀତ୍ ବୋରା ଓ ଆଣ୍ଟିଗୁଆ ପ୍ରଶାସନଙ୍କ ସହିତ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛନ୍ତି । ଏଥିରେ ମେହୁଲ୍ ଚୋକ୍ସୀଙ୍କ ନୂଆ ଡେଜିୟାର୍ ଆଣ୍ଟିଗୁଆ ପ୍ରଶାସନକୁ ଦିଆଯାଇଛି । ଏଥିରେ ମେହୁଲ୍ଙ୍କୁ ପାସପୋର୍ଟ ରଦ୍ଦ କରିବା ସହିତ ଔପଚାରିକ ଭାବେ ଗିରଫ୍ କରି ଭାରତକୁ ପ୍ରତ୍ୟର୍ପଣ କରିବାକୁ କୁହାଯାଇଛି । ଚୋକ୍ସୀ ୨୦୧୭ରେ ଆଣ୍ଟିଗୁଆର ନାଗରିକତ୍ବ ହାସଲ କରିଥିଲେ । ପିଏନ୍ବି ଘୋଟାଲ୍ରେ ମେହୁଲ୍ ଚୋକ୍ସୀ ଓ ତାଙ୍କ ଭଣଜା ନିରବ ମୋଦି ମୁଖ୍ୟ ଆରୋପୀ ରହିଥିଲେ । ଦୁହିଁଜଣ ଯାକ ଏହି ଘଟଣା ପରେ ଭାରତରୁ ପଳାୟନ କରିଥିଲେ । ଏହି ଘଟଣାର ଯାଞ୍ଚ ସିବିଆଇ ଓ ଇଡିର ଟିମ୍ ମିଳିତ ଭାବେ କରୁଛନ୍ତି । ପିଏନ୍ବି ଘୋଟାଲାର ଦୁଇ ପ୍ରମୁଖ ଆରୋପୀ ମେହୁଲ୍ ଚୋକ୍ସୀ ଓ ନିରବ ମୋଦିଙ୍କ ବିଦେଶ ପଳାୟନ ଚଳିତ ଥରର ଲୋକସଭା ନିର୍ବାଚନରେ ବେଶ୍ ଚର୍ଚ୍ଚାର ଶରବ୍ୟ ହୋଇଛି । ବିପକ୍ଷ ଏହି ପ୍ରସଙ୍ଗକୁ ନେଇ ବିଜେପି ସରକାରକୁ ଘେରିଛନ୍ତି ।
