ସୀତାରାମ ଅଗ୍ରୱାଲ
ଚିଲିକା: ଆସନ୍ତା ୨୮ ତାରିଖ ଦିନ ଚିଲିକାରେ ବିଧାୟକ ପ୍ରଶାନ୍ତ ଜଗଦ୍ଦେବ ଶକ୍ତି ପ୍ରଦର୍ଶନ କରିବେ। ସେହି ଉପଲକ୍ଷେ ବଡପୋଖରିଆ ସ୍ଥିତ ନିଜ ବାସଭବନରେ ଆଜି ତାହାର ରୂପରେଖ ପ୍ରସ୍ତୁତି ନିମନ୍ତେ ଏକ ବୈଠକ ଅନୁଷ୍ଠିତ ହୋଇଥିଲା।
ଉକ୍ତ ବୈଠକରେ ଚିଲିକା ନିର୍ବାଚନମଣ୍ଡଳୀର ବିଜେଡି ନେତା ଉତ୍ପଳ ପାଇକରାୟ, ପ୍ରଭାସ ସୁନ୍ଦରାୟ, ମନୋଜ ପ୍ରଧାନଙ୍କ ସମେତ ପ୍ରାୟ ୫୦୦ ରୁ ଉର୍ଦ୍ଧ୍ଵ ଆଗଧାଡିର କର୍ମୀମାନେ ଯୋଗ ଦେଇଥିଲେ। ନେତା ଓ ନେତ୍ରୀମାନେ ବୈଠକରେ ପ୍ରଶାନ୍ତ ଜଗଦ୍ଦେବଙ୍କୁ ବିଜେଡିର ଜଣେ ଯୋଦ୍ଧା ଭାବରେ ଅଭିହିତ କରିବା ସହ ତାଙ୍କର ଗୁଣଗାନ କରିଥିଲେ।
ଜୁଲାଇ ୨୮ ତାରିଖରେ ବିଧାୟକ ନିର୍ବାଚନ ମଣ୍ଡଳୀକୁ ଗ୍ରାଣ୍ଡ ଏଣ୍ଟ୍ରି କରିବାକୁ ଥିବାବେଳେ ସମସ୍ତ ନେତୃବୃନ୍ଦ ଉକ୍ତଦିନ ପ୍ରବଳ ଜନସମାଗମ କରିବାକୁ ଉପସ୍ଥିତ କର୍ମୀମାନଙ୍କୁ ଆହ୍ୱାନ ଦେଇଥିଲେ ବିଧାୟକ। ବିଧାୟକଙ୍କ ଶକ୍ତି ପ୍ରଦର୍ଶନକୁ ବିଜେଡି ଦଳ ଏବଂ ମୁଖ୍ୟମନ୍ତ୍ରୀ ଦେଖି ବିଧାୟକଙ୍କୁ ଆଜିବି କର୍ମୀମାନେ ଭଲପାଉଛନ୍ତି ବୋଲି ଅନୁଭବ କରିବେ।
ବିଧାୟକ ଜଗଦ୍ଦେବଙ୍କର ଦକ୍ଷତା ଦେଖି ତାଙ୍କୁ ନବୀନ ପଟ୍ଟନାୟକ ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ବିରୋଧରେ ଲଢ଼ିବା ପାଇଁ ବେଗୁନିଆରେ ଦାଇତ୍ୱ ଦେଇଥିଲେ। ପୁଣି ୨୦୧୯ ରେ ବିଜେପିର ଗଡ଼ ବୋଲାଉଥିବା ଚିଲିକା ନିର୍ବାଚନମଣ୍ଡଳୀକୁ ଲଢ଼ିବା ପାଇଁ ପଠାଇଥିଲେ। ତେଣୁ ଆଗକୁ ବଢ଼ିବା ଲାଗି ବିଧାୟକଙ୍କୁ କୌଣସି ଶକ୍ତି ରୋକି ପାରିବ ନାହିଁ ବୋଲି ସମସ୍ତ ନେତୃବୃନ୍ଦ ସଭାରେ ମତବ୍ୟକ୍ତ କରିଥିଲେ।
ପ୍ରକାଶ ଥାଉକି ବାଣପୁର ପଞ୍ଚାୟତ ନିର୍ବାଚନ ସମୟରେ ବ୍ଲକ ଅଫିସ ସମ୍ମୁଖରେ ଜନତାଙ୍କୁ ଗାଡ଼ି ମଡାଇଦେବା ଅଭିଯୋଗରେ ବିଧାୟକ ଜଗଦ୍ଦେବଙ୍କୁ ବିଜେଡିରୁ ନିଲମ୍ବନ ଓ ସୁପ୍ରିମକୋର୍ଟ ଦ୍ୱାରା ଏକ ବର୍ଷ ପର୍ଯ୍ୟନ୍ତ ନିର୍ବାଚନମଣ୍ଡଳୀକୁ ଯିବା ଏବଂ ସଭା ସମିତି କରିବା ଉପରେ ରୋକ ଲଗାଯାଇଥିଲା। ଉକ୍ତ ଦିନଠାରୁ ବିଧାୟକ ଜଗଦ୍ଦେବ ନିର୍ବାଚନ ମଣ୍ଡଳୀକୁ ଯାଉନାହାନ୍ତି।
ଆସନ୍ତା ୨୪ ତାରିଖରେ ସୁପ୍ରିମକୋର୍ଟର କଣ୍ଟ ପୂରଣ ହେଉଥିବାବେଳେ ବିଧାୟକଙ୍କ ଗ୍ରାଣ୍ଡ ଏଣ୍ଟ୍ରିକୁ କର୍ମୀମାନେ ଚାହିଁ ବସିଛନ୍ତି। କର୍ମୀମାନଙ୍କର ବିଧାୟକଙ୍କ ପ୍ରତି ଆଜିବି ଅତୁଟ ସମର୍ଥନ ଅଛି ଏବଂ ତାହା ପ୍ରଦର୍ଶନ କରିବାକୁ ଅଣ୍ଟା ଭିଡିଛନ୍ତି ବିଧାୟକ ଓ ବିଜେଡି ନେତୃବୃନ୍ଦ।
ତେବେ ଉକ୍ତ ଦିନ ବିଧାୟକଙ୍କ ଅନୁଦାନ ପାଣ୍ଠିରୁ ଦିଆଯାଇଥିବା କାର୍ଯ୍ୟଗୁଡିକର ଶୁଭ ମଧ୍ୟ ଦିଆଯିବା କାର୍ଯ୍ୟକ୍ରମ ଥିବା ବିଧାୟକ ବୈଠକରେ କହିଛନ୍ତି। ତେବେ ଆଶ୍ଚର୍ଯ୍ୟ ବିଧାୟକଙ୍କ ଘନିଷ୍ଠ ବୋଲାଉଥିବା ବାଣପୁର ଏନଏସି ଅଧ୍ୟକ୍ଷ ମିଟୁ ନାୟକ, ବାଲୁଗାଁ ଏନଏସି ଅଧ୍ୟକ୍ଷା ସୁକାନ୍ତି ପାଇକରାୟ, ଜିଲ୍ଲା ପରିଷଦ ଉପାଧ୍ୟକ୍ଷ ଗୋପୀନାଥ ମହାରଣା, ତୋରସିଂହ ପଞ୍ଚାୟତ ସମିତିସଭ୍ୟ ଜଗତ ବଲ୍ଲଭ ମହାରଥା ଏବଂ ପୂର୍ବତନ ବାଣପୁର ବ୍ଲକ ଅଧ୍ୟକ୍ଷ ମାନସ ପ୍ରଧାନ ଆଦି ଉକ୍ତ ବୈଠକରେ ଅନୁପସ୍ଥିତ ଥିଲେ। ଯାହାକୁ ନେଇ ବର୍ତ୍ତମାନ ଚର୍ଚ୍ଚା ଜୋର ଧରିଛି।
