ରାୟପୁର: ଛତିଶଗଡ ରାଜ୍ୟପାଳ ବିଶ୍ବଭୂଷଣ ହରିଚନ୍ଦନ ୬ ଦିନିଆ ଓଡିଶା ଗସ୍ତରେ ଆସୁଥିବାର ରାଜଭବନ ସୁତ୍ରରୁ ଜଣାପଡିଛି। ସେ ଆସନ୍ତାକାଲି ୨୦ ତାରିଖ ସଂଧ୍ୟାରେ ରାୟପୁରରୁ ବାହାରି ଭୁବନେଶ୍ବରରେ ପହଞ୍ଚିବେ। ସେହିଦିନ ସେ ଭୁବନେଶ୍ବରସ୍ଥିତ ନିଜ ବାସଭବନରେ ଅବସ୍ଥାନ କରିବେ।
ତାପରଦିନ ୨୧ ତାରିଖରେ ସେ କେତେକ ବିଶିଷ୍ଠ ଲୋକଙ୍କ ସହିତ ସାକ୍ଷାତ କରିବାର କାର୍ଯ୍ୟକ୍ରମ ରହିଛି। ଏହାପରେ ସଂଧ୍ୟାରେ ସେ ଜୟଦେବ ଭବନରେ ଆୟୋଜିତ ସ୍ବାଭିମାନ ସମ୍ମିଳନରେ ମୁଖ୍ୟ ଅତିଥି ଭାବେ ଯୋଗ ଦେବେ।
୨୩ ତାରିଖରେ ତାଙ୍କର ଜନ୍ମମାଟି ବାଣପୁର ଗସ୍ତ ରହିଛି। ସେ ଭୁବନେଶ୍ବରରୁ ବାହାରି ମା ଭଗବତୀ ମନ୍ଦିର ଯିବେ। ସେଠାରେ ମାଆଙ୍କୁ ଦର୍ଶନ କରିବା ସହିତ ନିଜ ଜନ୍ମସ୍ଥାନ ଗୋଡିଝର ଗ୍ରାମକୁ ଗସ୍ତ କରିବେ। ସେଠାରେ ସେ ନିଜ ପିତାଙ୍କ ଆରଧ୍ୟ ଠାକୁର ବାଲୁଙ୍କେଶ୍ବର ଦେବଙ୍କୁ ଦର୍ଶନ କରିବେ। ଏଥିସହିତ ସେ ନିଜ ପିତାମାତାଙ୍କ ସମାଧିସ୍ଥଳରେ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିବେ।
ସଂଧ୍ୟାରେ ସେ ବାଲୁଗାଁ, ଗମ୍ଭାରୀମୁଣ୍ଡା ଏବଂ ବାଣପୁରଠାରେ ଆୟୋଜିତ ବିଭିନ୍ନ ସମ୍ବର୍ଦ୍ଧନା ସଭାରେ ଯୋଗ ଦେବେ। ସେଠାରେ ଚିଲିକାର ନାଗରିକମାନେ ଛତିଶଗଡ ରାଜ୍ୟପାଳଙ୍କୁ ସମ୍ବର୍ଦ୍ଧନା କରିବେ। ସେ ବାଲୁଗାଁରେ ଥିବା ଗାନ୍ଧୀ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବାର ମଧ୍ୟ କାର୍ଯ୍ୟକ୍ରମ ରହିଛି।
