ଭୁବନେଶ୍ବର: ବର୍ତ୍ତମାନ ବିଜେଡି ବିଧାୟକ ସୌମ୍ୟରଂଜନ ପଟ୍ଟନାୟକ ଦଳରେ ଏକ ଘରକିଆ ହୋଇଗଲେଣି। କାରଣ ବର୍ତ୍ତମାନ ଅଧିକାଂଶ ବିଜେଡି ନେତା ସୌମ୍ୟରଂଜନ ପଟ୍ଟନାୟକଙ୍କୁ ବିରୋଧ କରିବାରେ ଲାଗିଲେଣି। ଏହାଦ୍ବାରା ସୌମ୍ୟରଂଜନ ପଟ୍ଟନାୟକଙ୍କ ରାଜନୈତିକ ଭବିଷ୍ୟତ ଅନ୍ଧକାର ହେବା ସ୍ପଷ୍ଟ ହୋଇଗଲାଣି। ଯେଉଁ ଦଳର ଆର୍ଶିବାଦରେ ସେ ସାଂସଦ ଏବଂ ବିଧାୟକ ହୋଇଛନ୍ତି ସେହି ଦଳରେ ସେ ଅଛୁଆଁ ହେବାକୁ ବସିଲେଣି।
ତେବେ ସୌମ୍ୟରଂଜନଙ୍କୁ ବିଜେଡି ଏପରି ଆଘୋଷିତ ଏକ ଘରକିଆ କରିବାର କାରଣ ରହିଛି। ତାହା ହେଲା ସୌମ୍ୟବାବୁ ଯାହାର ସାହାଯ୍ୟ ପାଇବେ ପ୍ରଥମେ ତାକୁ ହିଁ ସେ ବିରୋଧ କରିବେ। ବିଜେଡିରେ ଯୋଗଦେବା ପୂର୍ବରୁ ସୌମ୍ୟରଂଜନଙ୍କ ରାଜନୈତିକ ପ୍ରତିପତି କିଛି ନ ଥିଲା। କେବଳ ମାତ୍ର ଜଣେ ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ଜୁଆଁଇ ବ୍ୟତିତ ଆଉ କିଛି ପରିଚୟ ନ ଥିଲା। ହେଲେ ବିଜେଡିରେ ଯୋଗ ଦେବା ପରେ ସାଂସଦ ଏବଂ ବିଧାୟକ ହୋଇପାରିଛନ୍ତି।
ହେଲେ ଦୁଃଖର କଥା ଗତ କିଛିମାସ ଧରି ସୌମ୍ୟରଂଜନ ବିଜେଡି ଦଳ ଏବଂ ଏହାର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ କରିବାରେ ଲାଗିଛନ୍ତି। ସେହିପରି ସେ ମୁଖ୍ୟମନ୍ତ୍ରୀଙ୍କ ସଚିବ ତଥା 5ଟି ସଚିବ ଭି କେ ପାଣ୍ଡିଆନଙ୍କୁ ପୁରା ଟାର୍ଗେଟ କରିବାରେ ଲାଗିଛନ୍ତି। ସେ ତାଙ୍କର ଲେଖାରେ ଏବଂ ଭାଷଣରେ ପାଣ୍ଡିଆନଙ୍କ ଗସ୍ତକୁ ବିରୋଧ କରିଛନ୍ତି।
ଏପରି ପରିସ୍ଥିତି ଦେଖି ବର୍ତ୍ତମାନ ବିଜେଡିର ବରିଷ୍ଠ ନେତାମାନେ ଧିରେ ଧିରେ ତାଙ୍କୁ ବିରୋଧ କରିବା ଆରମ୍ଭ କରିଲେଣି। ପୂର୍ବରୁ ତାଙ୍କର ଚିରାଚରିତ ପ୍ରତିଦ୍ବନ୍ଦି ଅନୁଭବ ପଟ୍ଟନାୟକ ବିରୋଧ କରିଆସୁଥିଲେ। ହେଲେ ଏବେ ସେଥିରେ ଯୋଡି ହେଲେଣି ଅରୁଣ ସାହୁ, ଦେବୀ ମିଶ୍ର, ଅତନୁ ସବ୍ୟସାଚୀ ନାୟକଙ୍କ ପରି ବରିଷ୍ଠ ନେତା। ସେମାନେ ସିଧା ସୌମ୍ୟରଂଜନ ପଟ୍ଟନାୟକ ଜଣେ ବ୍ଲାକମେଲର ବୋଲି କହି ବୁଲିଲେଣି।
ଅରୁଣ ଏବଂ ଅତନୁ ସୌମ୍ୟରଂଜନ ଜଣେ ସୁବିଧାବାଦୀ ନେତା ବୋଲି କହିଲେଣି। ତାଙ୍କୁ ମନ୍ତ୍ରୀ ପଦ ମିଳି ନ ଥିବାରୁ ସେ ବାଉଳି ହେଉଛନ୍ତି ବୋଲି ଅରୁଣ ସାହୁ ମନ୍ତବ୍ୟ ଦେଲେଣି। ସେତିକି ନୁହେଁ ସୌମ୍ୟବାବୁଙ୍କୁ ଯାହାକିଛି ବିରୋଧ କରିବା କଥା ଏହି ଦୁଇଜଣ କହିସାରିଲେଣି। ଭବିଷ୍ୟତରେ ଆହୁରି କିଛି ନେତା ମଧ୍ୟ ତୁଣ୍ଡ ଖୋଲିବେ ବୋଲି ଆଭାସ ମିଳିସାରିଲାଣି।
ସୌମ୍ୟରଂଜନ ଦଳ ଭିତରେ ରହି ଦଳ ବିରୋଧୀ କାର୍ଯ୍ୟ କରୁଛନ୍ତି ବୋଲି ସେମାନେ ପ୍ରଶ୍ନ ଉଠାଇଲେଣି। ବିଜେଡିର ଏପରି ନେତାମାନେ ସୌମ୍ୟଙ୍କୁ ବିରୋଧ କଲେଣି ଅର୍ଥ ଦଳ ଭିତରେ କିଛି ବିଚାର ଚାଲିଥିବାର ଅନୁମାନ କରିହେଉଛି। ସେଥିପାଇଁ ରାଜନୈତିକ ସମୀକ୍ଷକମାନେ ସୌମ୍ୟରଂଜନଙ୍କ ଭବିଷ୍ୟତକୁ ନେଇ ଅବଗଣନା ଆରମ୍ଭ କରିସାରିଲେଣି। ଯଦି ସୌମ୍ୟରଂଜନ ବିଜେଡିରୁ ବହିସ୍କୃତ ହୁଅନ୍ତି ତେବେ ତାଙ୍କର ରାଜନୌତିକ ଭବିଷ୍ୟତ ସଂପୂର୍ଣ୍ଣ ଅନ୍ଧକାର ହୋଇଯିବ ବୋଲି ଅନୁମାନ କରିସାରିଲେଣି।