ଭୁବନେଶ୍ବର: କୋଭିଡ଼ ମହାମାରୀରେ ମୃତ୍ୟୁ ବରଣ କରିଥିବା ଲୋକଙ୍କ ଶବ ସତ୍କାରରେ ସାହାଯ୍ୟ ହେଉ ଅବା ଜୀବନବିନ୍ଦୁ ରକ୍ତଦାନ ଶିବିରରେ ରୋଗୀଙ୍କ ପାଇଁ ବାରମ୍ବାର ରକ୍ତଦାନ କରି ଦିନେ ସେ ସମାଜ ପାଇଁ ଉଦାହରଣ ସାଜିଥିଲେ, ଆଜି ସେହି ରିୟଲ୍ ହିରୋଙ୍କ ଶବକୁ ସସମ୍ମାନେ ସତ୍କାର କରି ଏକ ଭିନ୍ନ ଉଦାହରଣ ସୃଷ୍ଟି କଲା ଓଡ଼ିଶା-ମୋ ପରିବାର।
ସୂଚନାନୁସାରେ, ଭୁବନେଶ୍ଵରସ୍ଥିତ ସତ୍ୟନଗର ଅଞ୍ଚଳର ସତ୍ୟକାଳୀ ବସ୍ତିରେ ରହୁଥିବା ୨୯ବର୍ଷିୟ ଯୁବକ ରଞ୍ଜନ ପ୍ରଧାନ ସାଧାରଣ ଶୌଚାଳୟରେ ଚୁକ୍ତିଭିତ୍ତିକ କର୍ମଚାରୀ ଭାବରେ କାମ କରୁଥିଲେ। ସ୍ଵଭାବରେ ସେ ଅତ୍ୟନ୍ତ ପରୋପକାରୀ ଏବଂ ଅନ୍ୟ ପାଇଁ ବଞ୍ଚୁଥିବା ବ୍ୟକ୍ତିଟିଏ ଥିଲେ। କୋଭିଡ଼ ମହାମାରୀ ସମୟରେ, ଓଡ଼ିଶା-ମୋ ପରିବାର ପକ୍ଷରୁ ମୃତକଙ୍କ ଶବ ସତ୍କାର କରାଯାଉଥିବା ବେଳେ ସେ ସ୍ଵେଚ୍ଛାସେବୀ ଭାବରେ ନିଜକୁ ନିୟୋଜିତ କରିଥିଲେ। ବାପା, ମା’ଙ୍କୁ ହରାଇଥିବା ରଞ୍ଜନ ସମାଜ ପାଇଁ ନିଜକୁ ଉତ୍ସର୍ଗ କରି ଦେଇଥିଲେ ଏବଂ ସେହି ସମାଜ ତାଙ୍କୁ ଅନେକ ମହତ୍ ପରିଚୟ ଦେଇଥିଲା। କିନ୍ତୁ, ଦୁର୍ଭାଗ୍ୟବଶତଃ, ରଞ୍ଜନ କାଲି ବସିଥିବା ବେଳେ ହଠାତ୍ ହୃଦଘାତ ଯୋଗୁଁ ପ୍ରାଣ ତ୍ୟାଗ କଲେ। ଆଜି ତାଙ୍କ ବିୟୋଗରେ ସ୍ଥାନୀୟ ବାସିନ୍ଦା ଦୁଃଖରେ ଭାଙ୍ଗି ପଡ଼ିଛନ୍ତି।
ସ୍ଥାନୀୟ ବାସିନ୍ଦାଙ୍କ ମଧ୍ୟରୁ ପ୍ରକାଶ ବୋଲି ଜଣେ ଯୁବକ ରଞ୍ଜନଙ୍କ ମୃତ୍ୟୁ ସମ୍ପର୍କରେ ବିଜୁ ଜନତା ଦଳ ତଥା ଓଡ଼ିଶା-ମୋ ପରିବାର ଯୁଗ୍ମ ସମ୍ପାଦକ ଶ୍ରୀ ରୁଦ୍ର ନାରାୟଣ ସାମନ୍ତରାୟଙ୍କୁ ସୂଚନା ଦେବା ପରେ ତୁରନ୍ତ ପଦକ୍ଷେପ ନିଆଯାଇ ଜୟ ଓଡ଼ିଶାର “ଶେଷସାଥି” ଯାନ ସହାୟତାରେ ତାଙ୍କ ମୃତ ଶରୀରକୁ ସତ୍ୟନଗର ଶ୍ମଶାନକୁ ସ୍ଥାନାନ୍ତର କରାଯାଇଥିଲା ଏବଂ ନିଜେ ଶ୍ରୀ ସାମନ୍ତରାୟ ଉପସ୍ଥିତ ରହି ଶ୍ମଶାନରେ ରଞ୍ଜନଙ୍କ ମୃତଶରୀରକୁ ସସମ୍ମାନେ ସତ୍କାର କରିଥିଲେ।
ଶେଷରେ, ଅଞ୍ଚଳବାସୀଙ୍କ ଉପସ୍ଥିତିରେ ରଞ୍ଜନଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା ଏବଂ ଏହି ସମୟରେ ଭୁବନେଶ୍ୱର (ମଧ୍ୟ) ବିଧାୟକ ଶ୍ରୀ ଅନନ୍ତ ନାରାୟଣ ଜେନାଙ୍କ ସମେତ ଓଡ଼ିଶା-ମୋ ପରିବାରର ସ୍ଵେଚ୍ଛାସେବୀମାନେ ମଧ୍ୟ ଉପସ୍ଥିତ ଥିଲେ। ପରୋପକାରୀ ରଞ୍ଜନ ସମାଜରୁ ମଉଳିଗଲେ ସତ କିନ୍ତୁ ତାଙ୍କ ସେବା ପାଇଥିବା ଲୋକମାନଙ୍କ ମନରେ ସେ ସର୍ବଦା ସଜ ଫୁଲ ପରି ଫୁଟିକି ରହିବେ। ଏହିପରି ବ୍ୟକ୍ତିତ୍ଵ ସମାଜରେ ବିରଳ ସତ କିନ୍ତୁ ସମସ୍ତେ ରଞ୍ଜନଙ୍କ ପରି ହେଲେ ସମାଜରେ ଅନେକ ମାତ୍ରାରେ ପରିବର୍ତ୍ତନ ଆସିପାରିବ ବୋଲି ଆମେ ଆଶା କରୁ।