ନୂଆଦିଲ୍ଲୀ: ଦିୱାଲୀ ପୂର୍ବରୁ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଭାରତୀୟ କ୍ରିକେଟର ତଥା ପୂର୍ବତନ କ୍ରିକେଟ୍ ଅଧିନାୟକ ମହେନ୍ଦ୍ର ସିଂ ଧୋନିଙ୍କୁ ଏହାର ବ୍ରାଣ୍ଡ ଆମ୍ବାସାଡର ଭାବେ ନିଯୁକ୍ତ କରିଛି। ବୃହତ୍ତମ ପବ୍ଲିକ ସେକ୍ଟର ବ୍ୟାଙ୍କ ଆଜି ମହେନ୍ଦ୍ର ସିଂ ଧୋନିଙ୍କୁ ଏହାର ବ୍ରାଣ୍ଡ ଆମ୍ବାସାଡର ଭାବରେ ନିଯୁକ୍ତ କରିବାକୁ ଘୋଷଣା କରିଛି। ଏସବିଆଇର ବ୍ରାଣ୍ଡ ଆମ୍ବାସାଡର ଭାବରେ ଏମଏସ ଧୋନି ମାର୍କେଟିଂ ଏବଂ ବିଜ୍ଞାପନର ଭୂମିକା ଗ୍ରହଣ କରିବେ।
ଏସବିଆଇର ଅଧ୍ୟକ୍ଷ ଦୀନେଶ ଖାରା କହିଛନ୍ତି ଯେ, ଏସବିଆଇର ବ୍ରାଣ୍ଡ ଆମ୍ବାସାଡର ଭାବେ ଏମଏସ ଧୋନିଙ୍କୁ ଅନ୍ତର୍ଭୁକ୍ତ କରି ଆମେ ବହୁତ ଖୁସି। ଏସବିଆଇ ସହିତ ଧୋନିଙ୍କ ଯୋଡି ହେବା ଆମ ବ୍ରାଣ୍ଡକୁ ଏକ ନୂଆ ଅବତାର ଦେବ। ଏହି ନିଷ୍ପତ୍ତି ହେଉଛି ଏକ ସହଭାଗୀତା, ଆମର ଲକ୍ଷ୍ୟ ହେଉଛି ବିଶ୍ୱାସ, ଅଖଣ୍ଡତା ଏବଂ ନିରନ୍ତର ଉତ୍ସର୍ଗ ସହିତ ଦେଶ ତଥା ଆମର ଗ୍ରାହକଙ୍କୁ ସେବା କରିବା ପାଇଁ ଆମର ପ୍ରତିବଦ୍ଧତାକୁ ଦୃଢ କରିବା।
ସମ୍ପତ୍ତି, ଜମା, ଶାଖା, ଗ୍ରାହକ ଏବଂ କର୍ମଚାରୀଙ୍କ କ୍ଷେତ୍ରରେ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ହେଉଛି ସର୍ବବୃହତ ବାଣିଜ୍ୟିକ ବ୍ୟାଙ୍କ, ଏହା ମଧ୍ୟ ଦେଶର ସବୁଠାରୁ ବଡ ଋଣଦାତା, ଯାହା ଏପର୍ଯ୍ୟନ୍ତ ୩୦ ଲକ୍ଷରୁ ଅଧିକ ଭାରତୀୟ ପରିବାରର ଘର କିଣିବାର ସ୍ୱପ୍ନ ପୂରଣ କରିଛି। ବ୍ୟାଙ୍କର ଘରୋଇ ଋଣ ପୋର୍ଟଫୋଲିଓ ୬.୫୩ ଲକ୍ଷ କୋଟିରୁ ଅଧିକ।
