ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ପୂର୍ବରୁ ବିହାର, ମହାରାଷ୍ଟ୍ର ଓ ଉତ୍ତରପ୍ରଦେଶ ରାଜ୍ୟରେ ନିଜର ଓବିସି ଭୋଟ୍ ବ୍ୟାଙ୍କ ଭାଙ୍ଗିବାର ଆଶଙ୍କା ଥିବାରୁ ଭାରତୀୟ ଜନତା ପାର୍ଟି (ବିଜେପି) ଏହି ଜାତି ମଧ୍ୟରେ ନିଜର ସମର୍ଥକ ଭିତ୍ତିଭୂମିକୁ ସୁରକ୍ଷିତ ରଖିବା ପାଇଁ ଏକ ପ୍ରତିରକ୍ଷାତ୍ମକ ରଣନୀତି ପ୍ରସ୍ତୁତ କରିବାକୁ ଅଣ୍ଟା ଭିଡ଼ିଛି।
ଚଳିତ ମାସରେ ହେବାକୁ ଥିବା ଛତିଶଗଡ଼ ନିର୍ବାଚନ ପାଇଁ ଦଳର ଇସ୍ତାହାର ଉନ୍ମୋଚନ ଅବସରରେ କେନ୍ଦ୍ର ଗୃହମନ୍ତ୍ରୀ ତଥା ବରିଷ୍ଠ ବିଜେପି ନେତା ଅମିତ ଶାହ ଶୁକ୍ରବାର ଗଣମାଧ୍ୟମକୁ କହିଛନ୍ତି ଯେ ଦଳ ଜାତିଗତ ଜନଗଣନା ପ୍ରସ୍ତାବକୁ କେବେ ବିରୋଧ କରୁନାହିଁ, ବରଂ ଏହି ପ୍ରସଙ୍ଗରେ ସମସ୍ତଙ୍କ ସହ ଆଲୋଚନା କରି ନିଷ୍ପତ୍ତି ନେବ।
ନିର୍ବାଚନ ହେବାକୁ ଥିବା ରାଜ୍ୟଗୁଡ଼ିକରେ ଓବିସି ଭୋଟରଙ୍କୁ ସନ୍ତୁଷ୍ଟ କରିବା ପାଇଁ ଗୃହମନ୍ତ୍ରୀଙ୍କ ଏହି ବୟାନକୁ ଦଳ ପକ୍ଷରୁ ପ୍ରୟାସ ଭାବେ ବିବେଚନା କରାଯାଉଥିବାବେଳେ ଜାତିଗତ ଜନଗଣନା ପାଇଁ ବଢୁଥିବା ଦାବି ଦଳୀୟ ଗଡ଼ ଉପରେ ସମ୍ଭାବ୍ୟ ପ୍ରଭାବ ପକାଇବାର ଆଶଙ୍କା ସୃଷ୍ଟି କରିଛି।
ଗୁରୁବାର ଦିନ ଶାହା ଏବଂ ବିଜେପି ଅଧ୍ୟକ୍ଷ ଜେପି ନଡ୍ଡା ନୂଆଦିଲ୍ଲୀରେ ହରିୟାଣାରୁ ମହାରାଷ୍ଟ୍ର ପର୍ଯ୍ୟନ୍ତ ଦଳର ଅନେକ ବରିଷ୍ଠ ନେତାଙ୍କୁ ଭେଟି ରାଜ୍ୟଗୁଡ଼ିକର ସ୍ଥିତି ସମୀକ୍ଷା କରିବା ସହ ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିଥିଲେ।
ମହାରାଷ୍ଟ୍ରରେ ଶିବସେନା ସହ କ୍ଷମତା ଭାଗିଦାରୀ କରୁଥିବାବେଳେ ମରାଠାଙ୍କ ପାଇଁ ସଂରକ୍ଷଣ ପ୍ରସଙ୍ଗ ଏବଂ ରାଜ୍ୟର ଓବିସି ସମ୍ପ୍ରଦାୟର ସମ୍ଭାବ୍ୟ ପ୍ରତିବାଦ ପ୍ରସଙ୍ଗ ଯୋଗୁଁ ବିଜେପି କ୍ୟାଚ୍ ୨୨ ସ୍ଥିତିରେ ରହିଛି।
ବିହାରରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଜାତିଗତ ସର୍ବେକ୍ଷଣ ରିପୋର୍ଟ ବିଜେପିକୁ ଏକ ଅଡ଼ୁଆରେ ପକାଇଛି କାରଣ ଏହା ଜାତୀୟ ସ୍ତରରେ ଜାତିଗତ ଜନଗଣନା ପାଇଁ ଚାପ ସୃଷ୍ଟି କରିବା ସହ ସଂରକ୍ଷଣ କୋଟା ବୃଦ୍ଧି ପାଇଁ ଦାବି କରିବାର ସମ୍ଭାବନା ରହିଛି। କେନ୍ଦ୍ରରେ କ୍ଷମତାରେ ଥିବା ବିଜେପି ଜାତୀୟ ଜାତିଗତ ଜନଗଣନାକୁ ପ୍ରତ୍ୟାଖ୍ୟାନ କରିଛି।
ବିଜେପି ଶାସିତ ଅନ୍ୟ ଏକ ରାଜ୍ୟ ଉତ୍ତରପ୍ରଦେଶରେ ପ୍ରତିଦ୍ୱନ୍ଦ୍ୱୀ ସମାଜବାଦୀ ପାର୍ଟି (ଏସ୍ ପି) ଦଳିତ ଓ ଓବିସିଙ୍କୁ ବିଜେପିରୁ ଫେରାଇ ଆଣିବା ପାଇଁ ପଛୁଆ ଜାତିର ବୈଠକ ଆୟୋଜନ କରୁଥିବାବେଳେ ଏହାର ମେଣ୍ଟ ସହଯୋଗୀ ଅପନା ଦଳ ଏବଂ ନିଶାଦ ଦଳ ସେମାନଙ୍କ ଓବିସି ଭୋଟକୁ ସୁରକ୍ଷିତ ରଖିବା ପାଇଁ ଜାତିଗତ ଜନଗଣନା ପାଇଁ ସମର୍ଥନ କରିଛନ୍ତି। ସେପ୍ଟେମ୍ବର ମାସରେ ଘୋସି ଉପନିର୍ବାଚନରେ ବିଜେପିର ପରାଜୟ ଏହାର ଓବିସି ତ୍ରୁଟିକୁ ବିଶେଷ ଭାବରେ ଦର୍ଶାଇଥିଲା।
ଘୋସିରେ ସମଗ୍ର ୟୁପି କ୍ୟାବିନେଟ୍ ତାଙ୍କ ପାଇଁ ପ୍ରଚାର କରିବା ସତ୍ତ୍ୱେ ବିଜେପିର ଓବିସି ପ୍ରାର୍ଥୀ ଦାରା ସିଂହ ଚୌହାନ ଅଣ ଓବିସି ଥିବା ସପାର ସୁଧାକର ସିଂହଙ୍କଠାରୁ ପରାସ୍ତ ହୋଇଥିଲେ।
ବରିଷ୍ଠ ନେତାମାନଙ୍କ ସହ ଶାହାଙ୍କ ବୈଠକରେ ଯୋଗ ଦେଇଥିବା ଦଳୀୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସାଧାରଣ ନିର୍ବାଚନଜିତିବା ପାଇଁ ଗୁରୁତ୍ୱପୂର୍ଣ୍ଣଭାବେ ବିବେଚନା କରାଯାଉଥିବା ଓବିସି ଭୋଟ୍ ପ୍ରତିଶତକୁ ସୁରକ୍ଷିତ ରଖିବା ପାଇଁ କେନ୍ଦ୍ରୀୟ ନେତୃତ୍ୱ ପ୍ରତି-ରଣନୀତି ଉପରେ ବିସ୍ତୃତଭାବେ ଆଲୋଚନା କରିଛନ୍ତି।
ଜାତିଗତ ଜନଗଣନା ପାଇଁ ବିରୋଧୀଙ୍କ ଉଦ୍ୟମର ଜାଲରେ ନ ପଡ଼ି ପଛୁଆ ଜାତି ବର୍ଗଙ୍କ ନିକଟରେ ପହଞ୍ଚିବାକୁ ସେମାନେ ନେତାମାନଙ୍କୁ କହିଛନ୍ତି।
ଏକ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାଜ୍ୟରେ ପ୍ରମୁଖ ଓବିସି ନେତାଙ୍କ ସହ ଛୋଟ ଛୋଟ ମେଣ୍ଟ କରିବା କିମ୍ବା ଏଭଳି ନେତାମାନଙ୍କୁ ଦଳରେ ସାମିଲ କରିବାକୁ ସେମାନଙ୍କୁ କୁହାଯାଇଥିଲା ଏବଂ ଆଗାମୀ ଦିନରେ ଏକ ବୃହତ ଓବିସି ପ୍ରଚାର ପାଇଁ ବିଜେପି ଏକ କମିଟି ଗଠନ କରିବାକୁ ନିଷ୍ପତ୍ତି ନେଇଛି।
ବିଶେଷ କରି ତିନିଟି ଗୁରୁତ୍ୱପୂର୍ଣ୍ଣ ରାଜ୍ୟ ମହାରାଷ୍ଟ୍ର, ବିହାର ଏବଂ ଉତ୍ତରପ୍ରଦେଶକୁ ନେଇ ଦଳ ଚିନ୍ତିତ, ଯେଉଁଠାରେ ଓବିସି ରାଜନୀତି ଆକାର ନେଉଛି ଏବଂ କୌଣସି ଭୁଲ୍ ରଣନୀତି ବିଜେପିକୁ କ୍ଷତି ପହଞ୍ଚାଇପାରେ ବୋଲି ସୂତ୍ରରୁ ପ୍ରକାଶ।
ଗତ ଏକ ଦଶନ୍ଧି ମଧ୍ୟରେ ବିଜେପି ଅଣ-ପ୍ରଭାବଶାଳୀ ଓବିସି ଜାତିଗୁଡ଼ିକୁ ହିନ୍ଦୁତ୍ୱ ଛତ୍ର ତଳେ ଅନ୍ତର୍ଭୁକ୍ତ କରିବାକୁ ଚେଷ୍ଟା କରି ଜାତିଭିତ୍ତିକ ରାଜନୀତି ଉପରେ ନିଜର ଆଧିପତ୍ୟ ସ୍ଥାପନ କରିଛି। ତେବେ ୨୦୨୪ ନିର୍ବାଚନ ପୂର୍ବରୁ ଜାତି ପୁଣି ଥରେ ବିଭିନ୍ନ ରାଜ୍ୟରେ ରାଜନୈତିକ ପ୍ରତିଦ୍ୱନ୍ଦ୍ୱିତାର ଏକ ପ୍ରାଥମିକ ସ୍ଥାନ ଭାବରେ ଉଭା ହୋଇଛି।
୨୦୧୪ ଏବଂ ୨୦୧୯ ଲୋକସଭା ନିର୍ବାଚନରେ ବିଜେପି ଓବିସି ସମର୍ଥନର ସବୁଠାରୁ ଅଧିକ ଲାଭବାନ ହୋଇଥିଲା। ଲୋକନୀତି-ସିଏସ୍ଡିଏସ୍ ଜାତୀୟ ନିର୍ବାଚନ ଅଧ୍ୟୟନ ତଥ୍ୟ ଅନୁଯାୟୀ, ୨୦୦୯ରେ ଏହି ସମ୍ପ୍ରଦାୟରୁ ଏହାର ଭୋଟ୍ ମାତ୍ର ୨୨ ପ୍ରତିଶତ ଥିବାବେଳେ ୨୦୧୯ରେ ଏହା ଦ୍ୱିଗୁଣିତ ହୋଇ ୪୪ ପ୍ରତିଶତରେ ପହଞ୍ଚିଛି। ପ୍ରଭାବଶାଳୀ ଓବିସି ଜାତିର ଏକଛତ୍ରବାଦକୁ ଭାଙ୍ଗି ଦଳ ୟୁପିରେ (୨୦୧୭ରେ) କ୍ଷମତା ହାସଲ କରିଥିଲା ଏବଂ ବିହାରରେ ମଧ୍ୟ ଭଲ ପାଦ ଥାପିଥିଲା।
ଗୁରୁବାର ବୈଠକରେ ଉପସ୍ଥିତ ଥିବା ୟୁପିର ଜଣେ ବିଜେପି ନେତା କହିଛନ୍ତି ଯେ ଯଦି ୮୦ ଟି ଲୋକସଭା ଆସନ ବିଶିଷ୍ଟ ୟୁପିରେ ଦଳ ଖରାପ ପ୍ରଦର୍ଶନ କରେ ତେବେ ଲୋକସଭା ନିର୍ବାଚନ ବିଜେପି ପାଇଁ ଏକ ଚ୍ୟାଲେଞ୍ଜ ହେବ।
ଯଦି କଂଗ୍ରେସ ଓ ଏସପି ଏକାଠି (ୟୁପିରେ) ଲଢ଼ିବେ ଏବଂ ଯଦି ବିଏସପି ବିଜେପିର ସ୍ୱାର୍ଥ ଅନୁଯାୟୀ ପ୍ରାର୍ଥୀ ନ ଦିଏ, ତେବେ ନିର୍ବାଚନ ଏକ ଚ୍ୟାଲେଞ୍ଜ ହେବ। ଯଦିଓ ଦଳୀୟ ନେତାମାନେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ହିନ୍ଦୁତ୍ୱ ପରିଚୟ ଏବଂ କଲ୍ୟାଣମୂଳକ ପ୍ରୋତ୍ସାହନ ନିର୍ବାଚନ ପାଇଁ ଯଥେଷ୍ଟ ହେବ ବୋଲି ଯୁକ୍ତି କରୁଛନ୍ତି, ଘୋସି ପରାଜୟ ସଙ୍କେତ ଦେଇଛି ଯେ ଦଳକୁ ନିଜର ଓବିସି ଭୋଟ୍ ବ୍ୟାଙ୍କକୁ ସୁରକ୍ଷିତ ରଖିବା ର ଆବଶ୍ୟକତା ରହିଛି।
ବିଜେପି ରାଜ୍ୟସଭା ସାଂସଦ ସୁରେନ୍ଦ୍ର ନାଗର କହିଛନ୍ତି ଯେ ଲୋକସଭା ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିବା ଏବଂ ବିଭିନ୍ନ ରାଜ୍ୟର ସ୍ଥିତି ସମୀକ୍ଷା କରିବା ଉପରେ ବୈଠକରେ ଅଧିକ ଗୁରୁତ୍ୱ ଦିଆଯାଇଥିଲା।
ମହାରାଷ୍ଟ୍ର ଚିନ୍ତା ବଢ଼ାଉଛି
ମହାରାଷ୍ଟ୍ରରେ ବିଜେପି ରାଜନୈତିକ ଦୃଷ୍ଟିରୁ ଦୁର୍ବଳ ହୋଇପଡ଼ିଥିବାବେଳେ ଏହାର ସହଯୋଗୀ ଦଳ- ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନା ଏବଂ ଅଜିତ ପାୱାରଙ୍କ ବିଦ୍ରୋହୀ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ଗୋଷ୍ଠୀ ମଧ୍ୟରେ ସୌହାର୍ଦ୍ଦ୍ୟ ବଜାୟ ରଖିବାକୁ ସଂଘର୍ଷ କରୁଛି।
ମରାଠାଙ୍କ ପାଇଁ କୁନ୍ବି ଓବିସି ଜାତି ପ୍ରମାଣପତ୍ର ଦାବି କରୁଥିବା ମରାଠା ସଂରକ୍ଷଣ କର୍ମୀ ମନୋଜ ଜାରଙ୍ଗେ-ପାଟିଲ ନେଇ ରାଜ୍ୟ ସରକାରଙ୍କୁ ଉପରେ ଓବିସି ସମ୍ପ୍ରଦାୟ ଅସନ୍ତୁଷ୍ଟ ହେବାରେ ଲାଗିଛି।
ମହାରାଷ୍ଟ୍ରର ଜନସଂଖ୍ୟାର ୫୨ ପ୍ରତିଶତ ଓବିସି ଏବଂ ବିଜେପିର ଏକ ପ୍ରମୁଖ ଭୋଟ୍ ବ୍ୟାଙ୍କ, ମରାଠାମାନଙ୍କ ପାଇଁ ଏହି ବର୍ଗରେ ସଂରକ୍ଷଣକୁ ବିରୋଧ କରୁଛନ୍ତି । ଅପରପକ୍ଷରେ ମରାଠାମାନେ ରାଜ୍ୟର ଜନସଂଖ୍ୟାର ପ୍ରାୟ ୩୩ ପ୍ରତିଶତ ଅଟନ୍ତି ଏବଂ ସେମାନଙ୍କ ସ୍ୱାର୍ଥକୁ ଅଣଦେଖା କରୁଥିବା କୌଣସି ପଦକ୍ଷେପ ମଧ୍ୟ ଏକ ବଡ଼ ରାଜନୈତିକ ମୂଲ୍ୟ ଦେବାକୁ ପଡ଼ିପାରେ।
ଯଦି ଜାନୁଆରି ସୁଦ୍ଧା ସରକାର ତାଙ୍କ ଦାବି ଉପରେ ପଦକ୍ଷେପ ନ ନିଅନ୍ତି ତେବେ ବଡ଼ ଧରଣର ଆନ୍ଦୋଳନ କରାଯିବ ବୋଲି ଚେତାବନୀ ଦେଇ ଜାରଙ୍ଗେ ଗୁରୁବାର କୋଟା ପାଇଁ ଅନିର୍ଦ୍ଦିଷ୍ଟ କାଳ ଅନଶନ ଶେଷ କରିଛନ୍ତି। ମରାଠାମାନଙ୍କୁ ଓବିସି ସାର୍ଟିଫିକେଟ୍ ଦିଆଗଲେ ଆନ୍ଦୋଳନ କରାଯିବ ବୋଲି ଓବିସିମାନେ ଚେତାବନୀ ଦେଇଛନ୍ତି।
ବିଜେପିର ଜଣେ କର୍ମକର୍ତ୍ତା କହିଛନ୍ତି, ‘ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ରାଜ୍ୟରେ ଉପୁଜିଥିବା ପରିସ୍ଥିତି ବିଷୟରେ କେନ୍ଦ୍ରୀୟ ନେତୃତ୍ୱଙ୍କୁ ଅବଗତ କରାଇଛନ୍ତି ଏବଂ ଉଭୟ ଗୋଷ୍ଠୀକୁ ସନ୍ତୁଷ୍ଟ କରିବା ପାଇଁ ରାଜ୍ୟ ସରକାର ଉଦ୍ୟମ କରୁଛନ୍ତି।
ଅନେକ ନେତା ଓବିସି ପ୍ରଚାର ପାଇଁ ଭିନ୍ନ ଭିନ୍ନ ପରାମର୍ଶ ଦେଇଥିଲେ କିନ୍ତୁ ହାଇକମାଣ୍ଡ ଫଡନାଭିସଙ୍କୁ କହିଥିଲେ ଯେ ପରିସ୍ଥିତି ସମ୍ବେଦନଶୀଳ ଏବଂ ଏହାକୁ ସୂକ୍ଷ୍ମ ଭାବରେ ପରିଚାଳନା କରାଯିବା ଉଚିତ। ଏଥିସହିତ ଦଳ ଫସିବା ଉଚିତ ନୁହେଁ। ସେମାନେ କହିଛନ୍ତି ଯେ ରକ୍ଷଣାତ୍ମକ ପଦକ୍ଷେପ ନ ନେଇ ବିଜେପିର ଆଭିମୁଖ୍ୟ ତା’ର କାର୍ଯ୍ୟକଳାପରେ ପ୍ରତିଫଳିତ ହେବା ଉଚିତ।
ମହାରାଷ୍ଟ୍ର ବିଜେପି ଗତ ମାସରେ ବିଦର୍ଭ ଅଞ୍ଚଳର ୧୧ଟି ଜିଲ୍ଲାରେ ଓବିସିଙ୍କ ନିକଟରେ ପହଞ୍ଚିବା ପାଇଁ ଦୁଇ ସପ୍ତାହିଆ ‘ଜାଗରଣ ଯାତ୍ରା’ ଆରମ୍ଭ କରିଥିଲା। ଏହି ଅଞ୍ଚଳରେ ୪୮ଟି ଲୋକସଭା ଆସନରୁ ୧୦ଟି ଏବଂ ୨୮୮ଟି ବିଧାନସଭା ଆସନରୁ ୬୨ଟି ଆସନ ରହିଛି ଏବଂ ଏହା ଦଳ ପାଇଁ ଗୁରୁତ୍ୱପୂର୍ଣ୍ଣ।
ମହାରାଷ୍ଟ୍ରରେ ଏକନାଥ ଖଡସେଙ୍କଠାରୁ ଆରମ୍ଭ କରି ପଙ୍କଜା ମୁଣ୍ଡେ ଓ ପ୍ରକାଶ ମେହେଟ୍ଟାଙ୍କ ପର୍ଯ୍ୟନ୍ତ ଓବିସି ନେତାଙ୍କୁ ବିଜେପି ଅବହେଳିତ କରିଥିବା ଅଭିଯୋଗ ହୋଇଥିବାବେଳେ ରାଜ୍ୟ ନେତୃତ୍ୱରେ ମରାଠା ନେତା ପାୱାର ଓ ସିନ୍ଦେ ଏବଂ ଜଣେ ବ୍ରାହ୍ମଣ ଫଡନାଭିସ ରହିଛନ୍ତି। ଏହା ଆଉ ଏକ ସମସ୍ୟା ସୃଷ୍ଟି କରିଛି।
ଦଳର ରାଜ୍ୟ ସଭାପତି (ଚନ୍ଦ୍ରଶେଖର ବାୱନକୁଲେ)ଭାବେ ଜଣେ ଓବିସି ନେତା ଅଛନ୍ତି, କିନ୍ତୁ ସମ୍ପ୍ରଦାୟ ମଧ୍ୟରେ ତାଙ୍କର କୌଣସି ଆକର୍ଷଣ ଥିବା ବିଶ୍ୱାସ କରାଯାଏ ନାହିଁ।
ବିହାର ସମସ୍ୟା
ଦଳୀୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗୁରୁବାରର ବୈଠକରେ ବିହାର ବିଜେପି ନେତା ସମ୍ରାଟ ଚୌଧୁରୀ, ବିଜୟ ସିହ୍ନା ଏବଂ ସୁଶୀଲ ମୋଦୀ ଜାତିଗତ ସର୍ଭେ ରିପୋର୍ଟ ପରେ ରାଜ୍ୟରେ ଉପୁଜିଥିବା ପରିସ୍ଥିତି ଉପରେ ନିଜର ମତାମତ ଉପସ୍ଥାପନ କରିଥିଲେ।
ବିହାର ବିଜେପିର ଜଣେ ନେତା କହିଛନ୍ତି ଯେ ନେତୃତ୍ୱ ରାଜ୍ୟର ୪୦ ଟି ଲୋକସଭା ଆସନ ଜିତିବା ପାଇଁ ପ୍ରସ୍ତୁତି ଏବଂ ଆଗାମୀ ରଣନୀତି ବିଷୟରେ ମଧ୍ୟ ଜାଣିବାକୁ ଚାହୁଁଥିଲେ। ଦଳର ରଣନୀତି ସମ୍ପର୍କରେ ଜଣେ ବରିଷ୍ଠ ନେତା କହିଛନ୍ତି, ପ୍ରଣବ ମୁଖାର୍ଜୀ କମିଟି ହିଁ ଜାତୀୟ ଜନଗଣନାରେ ଓବିସି ଗଣନାକୁ ପ୍ରତ୍ୟାଖ୍ୟାନ କରିଥିଲା ଏବଂ ଏବେ ଓବିସି ଭୋଟ୍ ବ୍ୟାଙ୍କ ହରାଇଥିବା କଂଗ୍ରେସ ଜାତି ମଧ୍ୟରେ ଦ୍ୱନ୍ଦ୍ୱ ସୃଷ୍ଟି କରି ଓବିସି ଭୋଟ ପାଇବାକୁ ଚେଷ୍ଟା କରୁଛି।
କିନ୍ତୁ ବିଜେପିକୁ ଏହି ଜାଲରେ ପଡ଼ିବାର ଆବଶ୍ୟକତା ନାହିଁ ଏବଂ ବିଭିନ୍ନ କ୍ଷମତା ଭାଗିଦାରୀ ଢାଞ୍ଚାରେ ଓବିସି ସମ୍ପ୍ରଦାୟର ପ୍ରତିନିଧିତ୍ୱ ବୃଦ୍ଧି ସହିତ ହିନ୍ଦୁତ୍ୱର ବର୍ତ୍ତମାନର ଯୋଜନା ଏବଂ ମୋଦୀ ସରକାରଙ୍କ ସାମାଜିକ କଲ୍ୟାଣ ଅଭିଯାନକୁ ବଜାୟ ରଖିବାର ଆବଶ୍ୟକତା ରହିଛି।
ବିହାର ବିଜେପି ନେତା ଆହୁରି ମଧ୍ୟ ସ୍ପଷ୍ଟ କରିଛନ୍ତି ଯେ, କେନ୍ଦ୍ର ପାଖରେ ରୋହିଣୀ କମିଶନ (ଓବିସିର ଉପ-ବର୍ଗୀକରଣ ଯାଞ୍ଚ ପାଇଁ ଗଠିତ) ରିପୋର୍ଟକୁ ଅବହେଳିତ ଓବିସିମାନଙ୍କ ମଧ୍ୟରେ ଅଧିକ ପ୍ରବେଶ ପାଇଁ ବ୍ୟବହାର କରିବାର ବିକଳ୍ପ ଅଛି, କିନ୍ତୁ ଏହା ଅବହେଳିତ ଓବିସି ଜାତିମାନଙ୍କ ବିରୋଧରେ ପ୍ରଭାବଶାଳୀ ଓବିସି ଜାତିଗୁଡ଼ିକର ଅନ୍ୟ ଏକ ପ୍ରକାର ପ୍ରତି-ଧ୍ରୁବୀକରଣ ସୃଷ୍ଟି କରିପାରେ।
ବିହାରଠାରୁ ଆରମ୍ଭ କରି ୟୁପି ପର୍ଯ୍ୟନ୍ତ ବିଜେପିକୁ ପ୍ରଭାବଶାଳୀ ଓବିସି ଜାତି, ବିଶେଷ କରି କୁର୍ମିମାନଙ୍କଠାରୁ ଭୋଟ୍ ମିଳୁଛି ଏବଂ କମିଶନଙ୍କ ରିପୋର୍ଟ ସେହି ସନ୍ତୁଳନକୁ ଖରାପ କରିପାରେ ବୋଲି ବିହାର ନେତା ଦର୍ଶାଇଛନ୍ତି।
ନେତାଙ୍କ କହିବା ନୁସାରେ, ବିଜେପି ହାଇକମାଣ୍ଡ ବିହାର ନେତାମାନଙ୍କୁ ଯାଦବମାନଙ୍କ ବିରୋଧରେ ମେଣ୍ଟ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି, ଯେଉଁମାନେ ମୁଖ୍ୟତଃ ରାଜ୍ୟରେ ପ୍ରତିଦ୍ୱନ୍ଦ୍ୱୀ ରାଷ୍ଟ୍ରୀୟ ଜନତା ଦଳ (ଆରଜେଡି)କୁ ଭୋଟ୍ ଦିଅନ୍ତି।
ତେଣୁ ନୀତୀଶ କୁମାରଙ୍କ ଭୋଟ୍ ବ୍ୟାଙ୍କ (କୁର୍ମି)କୁ ଘେରିବା ଏବଂ ଆରଜେଡି ନେତା ତଥା ବିହାର ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବଙ୍କୁ ଦୁର୍ବଳ କରିବା ପାଇଁ ଆମେ କୁର୍ମି ଓ କୋଏରୀମାନଙ୍କୁ ଏକାଠି କରିବା ପାଇଁ ମେଣ୍ଟ କରୁଛୁ।
ବିହାରର କୁର୍ମି ଓ କୋଏରୀ ଏବଂ ଯାଦବମାନଙ୍କ ମଧ୍ୟରେ ଦୀର୍ଘ ଦିନ ଧରି ଶତ୍ରୁତା ଲାଗି ରହିଛି ଏବଂ ଆମକୁ ସେହି ତ୍ରୁଟିକୁ ବ୍ୟବହାର କରିବାକୁ ପଡ଼ିବ ବୋଲି ଏହି ନେତା କହିଛନ୍ତି।
ବିହାର ବିଜେପି ମୁଖ୍ୟ ସମ୍ରାଟ ଚୌଧୁରୀ କହିଛନ୍ତି, ଆମେ କିପରି ଲୋକସଭା ଆସନ ଜିତିପାରିବୁ ସେ ନେଇ ବୈଠକରେ ଆଲୋଚନା କରିଥିଲୁ।