କଳାହାଣ୍ଡି (ଦୁଷ୍ମନ୍ତ କୁମାର ପଣ୍ଡା): କଳାହାଣ୍ଡି ଉତ୍ତର ବନ ଖଣ୍ଡ ନର୍ଲା ଫରେଷ୍ଟ ରେଞ୍ଜ ଅନ୍ତର୍ଗତ କମର୍ଦ୍ଧା ସେକ୍ସନର ଗନ୍ଧରବାରୁର ଏକ କପା ବିଲରେ ଗୋଟିଏ ଦନ୍ତା ଗୁରୁତର ଅବସ୍ଥାରେ ପଡିଥିବା ବେଳେ ଗୁରୁବାର ରାତିରେ ସ୍ଥାନୀୟ ଲୋକେ ବନ ବିଭାଗକୁ ଖବର ଦେଇଥିଲେ। ଖବର ପାଇ ବନ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଆହତ ହାତୀଟିକୁ ଚିକିତ୍ସା କରିଥିଲେ।
ହେଲେ ବନ ବିଭାଗର ଶତ ପ୍ରଚେଷ୍ଟା ସତ୍ତ୍ୱେ କାମ ଦେଲାନି ବନ ବିଭାଗର ପ୍ରୟାସ। ମୃତ୍ୟୁ ସହ ସଂଗ୍ରାମ କରୁଥିବା ଗଜରାଜ ଶେଷରେ ଆଖି ବୁଜିଦେଲେ। ବନ ବିଭାଗ ଅଧିକାରୀଙ୍କୁ ହାତୀଟିର ଅସୁସ୍ଥତାର କାରଣ ପଚାରିବାରୁ ବୁଧବାର ରାତିରେ ଦୁଇ ହାତୀଙ୍କ ମଧ୍ୟରେ ଲଢ଼େଇ ପରେ ଏହି ହାତୀଟି ଆହତ ହୋଇଛି। ହାତୀଟିର ବେକ ପାଖରେ ଆଘାତ ଲାଗିଥିବା ପ୍ରକାଶ।
ଏଠାରେ ପ୍ରକାଶ ଯୋଗ୍ୟ ଯେ, ଦକ୍ଷିଣ ଓ ଉତ୍ତର ବନଖଣ୍ଡ ଅଧିକାରୀଙ୍କ ନେତୃତ୍ବରେ ବନବିଭାଗ ପଦାଧିକାରୀ ଏବଂ ପ୍ରାଣୀ ଚିକିତ୍ସା ଅଧିକାରୀଙ୍କ ଦ୍ବାରା ହାତୀଟିର ଚିକିତ୍ସା କରାଯାଉଥିଲା। ଶୁକ୍ରବାର ସକାଳେ ହାତୀ ଅଚେତ ଅବସ୍ଥାରେ ପଡିରହିଥିଲା ବେଳେ ଚିକିତ୍ସା ଦେବା ପରେ ତା’ର ସ୍ବାସ୍ଥ୍ୟବସ୍ଥାରେ ଉନ୍ନତି ଘଟିଥିଲା। ହେଲେ ଶନିବାର ଭୋର ପ୍ରାୟ ଦୁଇଟା ବେଳେ ହାତୀଟି ଆଖି ବୁଜିଦେଇଥିବା ଜଣା ପଡ଼ିଛି। ମୃତ ହାତୀଟିକୁ ବ୍ୟବଚ୍ଛେଦ କରାଯିବା ପରେ ବନ ବିଭାଗ ଅଧିକାରୀଙ୍କ ଉପସ୍ଥିତିରେ ତାକୁ ପୋତି ଦିଆଯିବ ବୋଲି ଜଣାପଡ଼ିଛି।
