ଭୁବନେଶ୍ୱର: ରାଜ୍ୟରେ ଯାଦବମାନେ ପଛୁଆ ବର୍ଗର ହୋଇଥିବାରୁ ସ୍ୱାଧୀନତାର ୭୫ ବର୍ଷ ପରେ ବି ସେମାନେ ପଛୁଆ ହୋଇ ରହିଯାଇଛନ୍ତି। ତେଣୁ ସେମାନେ ଶିକ୍ଷା, ନିଯୁକ୍ତି ଓ ନେତୃତ୍ୱ ନେବା କ୍ଷେତ୍ରରେ ଅବହେଳିତ ହୋଇପଡ଼ିଛନ୍ତି। ଏପରି କ୍ଷେତ୍ରରେ ପଛରେ ପଡ଼ିଥିବା ଯାଦବ ଜାତିର ଶିକ୍ଷା, ଅର୍ଥନୀତି ତଥା ନେତୃତ୍ୱର ବିକାଶ କିପରି ହୋଇପାରିବ ସେଦିଗରେ ଯାଦବ ମହାସଂଘ, ଓଡ଼ିଶା କାମ କରିବ ବୋଲି ଏହାର ସଭାପତି ଦଶରଥ ପରୁଆ କହିଛନ୍ତି।
ରାଜ୍ୟର ମୋଟ ଜନସଂଖ୍ୟାର ୨୦ ପ୍ରତିଶତରୁ ଅଧିକ ଜନସଂଖ୍ୟା ହେଉଛି ଯାଦବମାନଙ୍କର। ସଂଖ୍ୟାନୁପାତରେ ଯାଦବବମାନେ ଶିକ୍ଷା, ନିଯୁକ୍ତି, ଅର୍ଥନୈତିକ ସ୍ୱଚ୍ଛଳତା ଓ ନିଯୁକ୍ତି କ୍ଷେତ୍ରରେ ବହୁପଛରେ ପଡ଼ିଯାଇଛନ୍ତି। ଅଲଗା ରାଜ୍ୟ ତୁଳନାରେ ଆମ ରାଜ୍ୟରେ ଯାଦବ ନେତୃତ୍ୱ ବହୁତ କମ୍ ଥିବାରୁ ଯାଦବ ମାନଙ୍କ ବିକାଶ ପାଇଁ କେହି କହିବାକୁ ନାହିଁ। ଯାହାଫଳରେ ସ୍ୱାଧୀନତାର ୭୫ ବର୍ଷ ପରେ ବି ଯାଦବ ଜାତିରୁ ମାତ୍ର ୧୫ ଜଣରୁ ଅଧିକ ବିଧାୟକ ହୋଇନଥିବାବେଳେ କେହି ଲୋକସଭା ଲଢ଼ିବା ପାଇଁ ମୁଖ୍ୟଧାରାର ଦଳଗୁଡ଼ିକ ପକ୍ଷରୁ ଟିକଟ ପାଇନାହାନ୍ତି। ରାଜ୍ୟର ୨୪ଟି ବିଧାନସଭା କ୍ଷେତ୍ରରେ ଯାଦବ ମତଦାତାଙ୍କ ସଂଖ୍ୟା ୪୦ ପ୍ରତିଶତରୁ ୭୦ ପ୍ରତିଶତ ରହିଥିବା ସଂଗଠନ ପକ୍ଷରୁ ଆକଳନ କରାଯାଇଛି। ଏହାଛଡ଼ା ୨୦ ପ୍ରତିଶତରୁ ୪୦ ପ୍ରତିଶତ ଯାଦବ ମତଦାତା ଥିବା ୧୯ଟି ବିଧାନସଭା କ୍ଷେତ୍ର ରହିଛି। କିନ୍ତୁ ରାଜ୍ୟର ପ୍ରମୁଖ ରାଜନୈତିକ ଦଳଗୁଡ଼ିକ ଅନ୍ୟ ଜାତି ଭଳି ଯାଦବମାନଙ୍କୁ ପ୍ରାର୍ଥୀ କରିବା ପାଇଁ ପଛଘୁଞ୍ଚା ଦେଉଛନ୍ତି।
କେବଳ ସେତିକି ନୁହେଁ ଯାଦବମାନଙ୍କୁ ସମ୍ବିଧାନ ପ୍ରଦତ୍ତ ଅଧିକାରରୁ ମଧ୍ୟ ବଞ୍ଚିତ କରାଯାଉଛି। ସେମାନଙ୍କୁ ରାଜ୍ୟରେ ଉପଯୁକ୍ତ ସଂରକ୍ଷଣ ବ୍ୟବସ୍ଥା ପ୍ରଦାନ କରାଯାଉନଥିଲାବେଳେ ନିଯୁକ୍ତି କ୍ଷେତ୍ରରେ ମଧ୍ୟ ଅବଦେଳା କରାଯାଉଛି। ରାଜ୍ୟର ଅନ୍ୟାନ୍ୟ ବୃତ୍ତିଧାରୀଙ୍କମାନଙ୍କ ପାଇଁ ସରକାର ଅନେକ ଯୋଜନା ପ୍ରସ୍ତୁତ କରୁଥିବାବେଳେ ଯାଦବମାନଙ୍କର ଅର୍ଥନୈତିକ ବିକାଶ ପାଇଁ କୌଣସି ଯୋଜନା କିମ୍ବା ପ୍ରୋତ୍ସାହନ ନାହିଁ।
ଏହିସବୁ ସମସ୍ୟା ନେଇ ସଂଗଠନ ପକ୍ଷରୁ ଯାଦବ ଜାଗରଣ କାର୍ଯ୍ୟକ୍ରମ ହାତକୁ ନେବା ସହିତ ଶିକ୍ଷା, ଅର୍ଥନୈତିକ, ନେତୃତ୍ୱ ବିକାଶ ଦିଗରେ କାମ କରିବ ବୋଲି ସାଧାରଣ ସମ୍ପାଦକ ଆଲେକଜାଣ୍ଡାର ଦାସ କହିଛନ୍ତି। ଏହି ଅବସରରେ ମହାସଂଘର କାର୍ଯ୍ୟକାରୀ ସଭାପତି ଶିଶିରକାନ୍ତ ବେହେରା, ଉପସଭାପତି ସୁବାଷ ଦାସ, ସଂଗଠନ ସମ୍ପାଦକ ରାମଚନ୍ଦ୍ର ବେହେରା, ସମ୍ପାଦକ ଦିଲ୍ଲିପ ବେହେରା, କୋଷାଧ୍ୟକ୍ଷ ହିମାଂଶୁ ଶେଖର ଦାସ ପ୍ରମୁଖ ପଦାଧିକାରୀମାନେ ଉପସ୍ଥିତ ଥିଲେ।