ନୂଆଦିଲ୍ଲୀ: ବକ୍ସର ବିଜେନ୍ଦର ସିଂ କଂଗ୍ରେସ ଛାଡି ବିଜେପିରେ ଯୋଗ ଦେଇଛନ୍ତି। 38 ବର୍ଷୀୟ ବିଜୟନ୍ଦର ସିଂ ନିଜେ ୨୦୧୯ ରେ କଂଗ୍ରେସରେ ଯୋଗ ଦେଇଥିଲେ। ବିଜେପି ସାଧାରଣ ସଚିବ ବିନୋଦ ତାୱଡେ, ଦିଲ୍ଲୀ ବିଧାନସଭାରେ ବିରୋଧୀ ଦଳର ନେତା ତଥା ଦକ୍ଷିଣ ଦିଲ୍ଲୀର ଦଳର ପ୍ରାର୍ଥୀ ରାମବୀର ସିଂ ବିଧୁଡିଙ୍କ ଉପସ୍ଥିତିରେ ବିଜେନ୍ଦର ସିଂ ସଦସ୍ୟତା ଗ୍ରହଣ କରିଥିଲେ।
ବିଜେନ୍ଦର ସିଂ ଜାଟ ସମ୍ପ୍ରଦାୟର, ଯାହାର ହରିୟାଣା, ପଶ୍ଚିମ ଉତ୍ତରପ୍ରଦେଶ ଏବଂ ରାଜସ୍ଥାନରେ ବହୁ ସଂଖ୍ୟକ ଆସନ ଉପରେ ରାଜନୈତିକ ପ୍ରଭାବ ରହିଛି। ବିଜେପିରେ ଯୋଗଦେବା ଉପରେ ବକ୍ସର ବିଜେନ୍ଦର ସିଂ କହିଛନ୍ତି ଯେ, “ମୁଁ ବିଜେପିରେ ଯୋଗଦେଇ ବହୁତ ଉତ୍ସାହିତ ଅଟେ। ମୁଁ ଦେଶର ବିକାଶ ତଥା ପ୍ରଗତି ପାଇଁ କାମ କରିବାକୁ ଚାହୁଁଛି …।”
ବିଜେନ୍ଦର ସିଂ ଦକ୍ଷିଣ ଦିଲ୍ଲୀ ଆସନରୁ କଂଗ୍ରେସ ଟିକେଟରେ ୨୦୧୯ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା। ସେ ୨୦୦୮ ବେଜିଂ ଅଲିମ୍ପିକ୍ସରେ ବକ୍ସିଂରେ ବ୍ରୋଞ୍ଜ ପଦକ ଜିତିଥିଲେ। ସେ ଆହୁରି ମଧ୍ୟ ଅନେକ ଆନ୍ତର୍ଜାତୀୟ ପ୍ରତିଯୋଗିତାରେ ଦେଶ ପାଇଁ ପଦକ ଜିତିଛନ୍ତି। ସେ ୨୦୦୬ ଏବଂ ୨୦୧୪ କମନୱେଲଥ ଗେମ୍ସରେ ରୌପ୍ୟ ପଦକ ଏବଂ ୨୦୦୯ ରେ ବିଶ୍ୱ ଚାମ୍ପିଅନସିପ୍ ରେ ମଧ୍ୟ କାଂସ୍ୟ ପଦକ ଜିତିଥିଲେ।
