ନୂଆଦିଲ୍ଲୀ: ବିଜେପି ନେତା ନବନୀତ୍ ରାଣା ଏଆଇଏମ୍ଆଇଏମ୍ ସାଂସଦ ଅସଦୁଦ୍ଦିନ ଓୱାଇସିଙ୍କ ସଂସଦ ସଦସ୍ୟତା ବାତିଲ କରିବାକୁ ଦାବି କରିଛନ୍ତି। ଏହି ପରିପ୍ରେକ୍ଷୀରେ ସେ ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠି ଲେଖିଛନ୍ତି। ସଂସଦରେ ଶପଥ ଗ୍ରହଣ କରିବା ପରେ ଓୱାଇସି ଜୁନ୍ ୨୫ ତାରିଖରେ ଜୟ ପାଲେଷ୍ଟାଇନ କହିଥିଲେ। ଏ ସମ୍ପର୍କରେ ଶ୍ରୀମତୀ ରାଣା ସଦସ୍ୟତା ବାତିଲ କରିବାକୁ ଦାବି କରିଛନ୍ତି।
୨୦୧୯ ରୁ ୨୦୨୪ ପର୍ଯ୍ୟନ୍ତ ମହାରାଷ୍ଟ୍ରର ଅମ୍ରାବତୀ ଆସନରୁ ଜଣେ ସ୍ଵାଧୀନ ସାଂସଦ ଥିବା ନବନୀତ୍ ରାଣା ରାଷ୍ଟ୍ରପତିଙ୍କୁ ଲେଖିଥିବା ପତ୍ରରେ କହିଛନ୍ତି ଯେ, ଅସଦୁଦ୍ଦିନ ଓୱାଇସି ହାଇଦ୍ରାବାଦରୁ ସାଂସଦ ଭାବରେ ଶପଥ ଗ୍ରହଣ କରିବା ପରେ ସେ ଲୋକସଭା ହଲରେ ‘ଜୟ ପାଲେଷ୍ଟାଇନ’ ସ୍ଲୋଗାନ ଦେଇଥିଲେ।
ନବନୀତ୍ ରାଣା କହିଛନ୍ତି ଯେ, ପାଲେଷ୍ଟାଇନ ଏକ ବିଦେଶୀ ଦେଶ, ଯାହାର କୌଣସି ଭାରତୀୟ ନାଗରିକ କିମ୍ବା ଭାରତୀୟ ସମ୍ବିଧାନ ସହିତ କୌଣସି ସମ୍ପର୍କ ନାହିଁ। ଭାରତୀୟ ସମ୍ବିଧାନର ଧାରା ୧୦୨ ଅନୁଯାୟୀ, ଯଦି ସଂସଦର କୌଣସି ସଦସ୍ୟ ଅନ୍ୟ ଦେଶ ପାଇଁ ତାଙ୍କର ବିଶ୍ୱସ୍ତତା କିମ୍ବା ନିଷ୍ଠା ପ୍ରଦର୍ଶନ କରନ୍ତି କିମ୍ବା ଯଦି ସେ ଏପରି କାର୍ଯ୍ୟ କରନ୍ତି, ତା’ହେଲେ ତାଙ୍କର ସଂସଦର ସଦସ୍ୟତା ବାତିଲ ହୋଇପାରିବ।
ସେ କହିଛନ୍ତି ଯେ, “ଅସଦୁଦ୍ଦିନ ଓୱାଇସି ଲୋକସଭା ସଦସ୍ୟ ଭାବରେ ଶପଥ ଗ୍ରହଣ କରିବା ପରେ ତୁରନ୍ତ ଜୟ ପାଲେଷ୍ଟାଇନର ସ୍ଲୋଗାନ ଉଠାଇ ଏହି ରାଷ୍ଟ୍ର ପ୍ରତି ତାଙ୍କର ବିଶ୍ୱସ୍ତତା, ନିଷ୍ଠା ଏବଂ ଆନ୍ତରିକତା ପ୍ରଦର୍ଶନ କରିଛନ୍ତି, ଯାହା ସମ୍ବିଧାନର ଉଲ୍ଲଂଘନ ଅଟେ। ଏହା ଅତ୍ୟନ୍ତ ଗମ୍ଭୀର ବିଷୟ, ଏହା ଦେଶର ଆଭ୍ୟନ୍ତରୀଣ ସୁରକ୍ଷା ପାଇଁ ମଧ୍ୟ ସାଂଘାତିକ ପ୍ରମାଣିତ କରିପାରେ।
ଅମରାବତୀ ଆସନରୁ ବିଜେପି ପ୍ରାର୍ଥୀ ହୋଇଥିବା ଶ୍ରୀମତୀ ରାଣା କହିଛନ୍ତି ଯେ, “ଦେଶର ଏକତା ଏବଂ ଅଖଣ୍ଡତା ବଜାୟ ରଖିବା ପ୍ରତ୍ୟେକ ଭାରତୀୟ ନାଗରିକଙ୍କ କର୍ତ୍ତବ୍ୟ। ସଂସଦର ସଦସ୍ୟ ହୋଇଥିଲେ ମଧ୍ୟ ଅସଦୁଦ୍ଦିନ ଓୱାଇସି ଏହି କର୍ତ୍ତବ୍ୟକୁ ଖୋଲାଖୋଲି ଉଲ୍ଲଂଘନ କରିଛନ୍ତି। ଯାହା ଏକ ପ୍ରକାରର ଦେଶଦ୍ରୋହ। “‘
ଉଲ୍ଲେଖ ଯୋଗ୍ୟ ଯେ, ଏଥର ନବନୀତ୍ ରାଣାଙ୍କୁ ଅମ୍ରାବତୀ ଆସନରୁ ପରାଜୟର ସାମ୍ନା କରିବାକୁ ପଡିଥିଲା। ଲୋକସଭା ନିର୍ବାଚନ ସମୟରେ ଶ୍ରୀମତୀ ରାଣା ମଧ୍ୟ ହାଇଦ୍ରାବାଦରେ ବିଜେପି ପ୍ରାର୍ଥୀ ମାଧବୀ ଲତାଙ୍କ ପାଇଁ ପ୍ରଚାର କରିଥିଲେ। ତା’ପରେ ସେ ଅସଦୁଦ୍ଦିନ ଓୱାଇସିଙ୍କ ବିଷୟରେ ଏକ ବିବାଦୀୟ ବିବୃତ୍ତି ଦେଇଥିଲେ। ସେ କହିଥିଲେ ଯେ, “ଯଦି ପୋଲିସକୁ ୧୫ ସେକେଣ୍ଡ ପାଇଁ ଡ୍ୟୁଟିରୁ ହଟାଇ ଦିଆଯାଏ, ତେବେ ଭାଇମାନେ ଜାଣିବେ ନାହିଁ ଯେ ସେମାନେ କେଉଁଠାରୁ ଆସିଛନ୍ତି ଏବଂ କେଉଁଆଡ଼େ ଗଲେ।” ଏହାପରେ ଅସଦୁଦ୍ଦିନ ଓୱାଇସି ତାଙ୍କୁ ଟାର୍ଗେଟ କରିଥିଲେ।