ବାଣପୁର (ସୀତାରାମ ଅଗ୍ରୱାଲ): ପଣ୍ଡିତ ଗୋଦାବରୀଶ ମିଶ୍ରଙ୍କ ୬୮ ତମ ପୁଣ୍ୟତିଥି ଅବସରରେ ଗୋଦାବରୀଶ ମିଶ୍ରଙ୍କ ମାନସ ପୁତ୍ର ଗୋଦାବରୀଶ ମହାବିଦ୍ୟାଳୟ ପାଳନ କରିଛି ତାହାର ୬୧ତମ ପ୍ରତିଷ୍ଠା ଦିବସ। ଏହି ପରିପ୍ରେକ୍ଷୀରେ କଲେଜ ପରିସରରେ ଥିବା ବିଜୁ ପଟ୍ଟନାୟକ ଇନଡୋର ଷ୍ଟାଡିଅମରେ ଏକ ଭବ୍ୟ ସଭା ଅନୁଷ୍ଠିତ ହୋଇଥିଲା।
ଉକ୍ତ ପ୍ରତିଷ୍ଠା ଉତ୍ସବରେ ମୁଖ୍ୟ ଅତିଥି ଭାବେ ରାଜ୍ୟ ସରକାରଙ୍କ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ, ମୁଖ୍ୟ ବକ୍ତା ଭାବେ ଉଚ୍ଚ ଶିକ୍ଷା, କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ସୂର୍ଯ୍ୟବଂଶୀ ସୁରଜ, ସ୍ୱତନ୍ତ୍ର ଅତିଥି ଭାବେ ଚିଲିକାର ପୂର୍ବତନ ବିଧାୟକ ଡାକ୍ତର ବିଭୁତି ଭୂଷଣ ହରିଚନ୍ଦନ, ସମ୍ମାନିତ ଅତିଥି ଭାବେ ବାଣପୁର ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ ଏବଂ ଏନଏସି ଅଧ୍ୟକ୍ଷ ମିଟୁ ନାୟକ ଯୋଗ ଦେଇଥିଲେ। ମହାବିଦ୍ୟାଳୟରେ ଅତିଥିମାନେ ପହଂଚି ପଣ୍ଡିତ ଗୋଦାବରୀଶ ମିଶ୍ରଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପରେ କଲେଜ ତରଫରୁ ଏକ ଭବ୍ୟ ଶୋଭାଯାତ୍ରାରେ ସଭାଗୃହକୁ ପାଛୋଟି ନେଇଥିଲେ।
ଶୋଭାଯାତ୍ରାରେ ଓଡ଼ିଆ ପ୍ରାଧ୍ୟାପକ ପାର୍ଥସାରଥୀ ସାମନ୍ତରାୟଙ୍କ ନିର୍ଦ୍ଦେଶନାରେ ଛାତ୍ରଛାତ୍ରୀ ମାନଙ୍କ ଦ୍ୱାରା ଗୋଦାବରୀଶ ମହାପାତ୍ରଙ୍କ ନୀଳ ମାଷ୍ଟ୍ରାଣୀ, ଉଠକଙ୍କାଳ ଛିଡ଼ୁ ଶୃଙ୍ଖଳ ପଥପ୍ରାନ୍ତ ନାଟକ ଅତିଥି ମାନଙ୍କର ମୁଖ୍ୟ ଆକର୍ଷଣର କେନ୍ଦ୍ର ବିନ୍ଦୁ ହୋଇଥିଲା। ପରିଚାଳନା ସମିତି ସଭାନେତ୍ରୀ ବିଜୟା ବନ୍ଦନା ରାଉତରାୟଙ୍କ ସଭାପତିତ୍ୱରେ ସଭା ଅନୁଷ୍ଠିତ ହୋଇଥିଲା ବେଳେ ମହାବିଦ୍ୟାଳୟ ଅଧ୍ୟକ୍ଷ ପ୍ରଫେସର ବିନାୟକ ହୋତା ସ୍ୱାଗତ ଭାଷଣ ଦେଇଥିଲେ।
ଉଚ୍ଚ ଶିକ୍ଷାମନ୍ତ୍ରୀ ଶ୍ରୀ ସୁରଜ ଛାତ୍ରଛାତ୍ରୀମାନଙ୍କୁ ତିନି ଗୋଟି ବାର୍ତ୍ତା ପାଳନ କରିବାକୁ ପରାମର୍ଶ ଦେଇଥିଲେ। ପ୍ରଥମ ପରାମର୍ଶ ଭାବରେ ବର୍ଷକୁ ଗୋଟିଏ ଗଛ ଲଗାଇବାକୁ ଆହ୍ୱାନ ଦେଇଥିଲେ। କାହାକୁ ଦାନ କରିବାକୁ ହେଲେ ଗୀତା ଦାନ କରିବାକୁ ଏବଂ ତୃତୀୟ ପରାମର୍ଶ ଭାବରେ ସାବାଳକ ହେଲେ ନିଶ୍ଚିତ ଭାବରେ ରକ୍ତଦାନ କରିବାକୁ କହିଥିଲେ। ମୁଖ୍ୟ ଅତିଥି ଶ୍ରୀ ହରିଚନ୍ଦନ ଗୋଦାବରୀଶ ମିଶ୍ରଙ୍କ ଜୀବନୀ ବର୍ଣ୍ଣନା କରିବା ସହ ଉକ୍ତ ମହାବିଦ୍ୟାଳୟକୁ ସ୍ୱୟଂଶାସିତ ମହାବିଦ୍ୟାଳୟରେ ପରିଣତ କରିବାକୁ ସମ୍ପୂର୍ଣ୍ଣ ଚେଷ୍ଟା କରିବେ ବୋଲି ଉପସ୍ଥିତ ଛାତ୍ରଛାତ୍ରୀ, ଅଭିଭାବକ ଏବଂ ବୁଦ୍ଧିଜୀବୀମାନଙ୍କ ନିକଟରେ ବକ୍ତବ୍ୟ ରଖିଥିଲେ।
ଗୋଦାବରୀଶ ମହାପାତ୍ରଙ୍କ ନାମରେ ସାମ୍ବାଦିକମାନଙ୍କୁ ପୁରସ୍କାର ଦିଆଯିବ ବୋଲି ସରକାର ଘୋଷଣା କରିଥିବା ଶ୍ରୀ ହରିଚନ୍ଦନ ପ୍ରକାଶ କରିଥିଲେ। ପରିଶେଷରେ ବିଭିନ୍ନ ବର୍ଗରେ ପାରଦର୍ଶିତା ଲାଭ କରିଥିବା ଛାତ୍ରଛାତ୍ରୀଙ୍କୁ ଅତିଥିମାନେ ପୁରସ୍କାର ପ୍ରଦାନ କରିଥିଲେ।
