ସୀତାରାମ ଅଗ୍ରୱାଲ
ବାଣପୁର: ଆଜି ଖୋଦ ଅବକାରୀ ମନ୍ତ୍ରୀ ପୃଥୀରାଜ ହରିଚନ୍ଦନଙ୍କ ନିର୍ବାଚନ ମଣ୍ଡଳୀ ଚିଲିକା ଅନ୍ତର୍ଗତ ବାଣପୁରରେ ଚୋରାମଦ ଚଢାଉ ଜୋରଦାର କରାଯାଇଛି। ଜିଲ୍ଲା ଅବକାରୀ ଅଧିକ୍ଷିକା ସୁମତି ତ୍ରିପାଠୀଙ୍କ ତତ୍ୱାବଧାନରେ ବାଣପୁର ଥାନା ଅଞ୍ଚଳରେ ଚଢ଼ାଉ କରାଯାଇ ହଜାର ହଜାର ଦେଶୀ ମଦ ଜବତ ହେବା ସହ ଏକାଧିକ ଅଭିଯୁକ୍ତ ଗିରଫ ହୋଇଛନ୍ତି।
ନାରଣଦେଇପୁର ଗ୍ରାମର ଅଭିଯୁକ୍ତ ଅଶୋକ କୁମାର ବେହେରାଙ୍କ ନିକଟରୁ 230 ଲିଟର ଦେଶୀ ମଦ ଓ ବାଇକ ଜବତ ହୋଇଥିବା ବେଳେ ନଛିପୁର ଗ୍ରାମର ଗୁଣ ଚନ୍ଦ୍ରଙ୍କ ନିକଟରୁ 30 ଲିଟର ଦେଶୀ ମଦ ଜବତ ହୋଇଛି।
ସେହିପରି ଭାବେ ସାନସିରେଇପୁର ଅଞ୍ଚଳରୁ ଏକ ଟାଟା ଏସି ଗାଡ଼ିରୁ 1500 ଲିଟର ଦେଶୀ ମଦ ଜବତ କରାଯାଇ ଅଭିଯୁକ୍ତ ପ୍ରକାଶ ମାଟିଙ୍କୁ ଗିରଫ କରାଯାଇଛି। ସମସ୍ତ ଅଭିଯୁକ୍ତମାନଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି।
ଉକ୍ତ ଚଢ଼ାଉରେ ଖୋର୍ଦ୍ଧା ଜିଲ୍ଲା ଅବକାରୀ ମୋବାଇଲ ଇନ୍ସପେକ୍ଟର ଥାରପା ମାରାଣ୍ଡି, ଖୋର୍ଦ୍ଧା ରେଞ୍ଜ ଅବକାରୀ ଇନ୍ସପେକ୍ଟର ତପସ୍ୱିନୀ ବରାଳ,ଟାଙ୍ଗୀ ରେଞ୍ଜ ଅବକାରୀ ଇନ୍ସପେକ୍ଟର ସନ୍ତୋଷ ସାହୁ,ମୋବାଇଲ ୟୁନିଟ ଏସଆଇ ରୋହିତ କୁମାର ଦଣ୍ଡସେନା, ବାଲୁଗାଁ ଅବକାରୀ ଅଧିକାରିଣୀ ସ୍ମିତା ପଣ୍ଡା ଏବଂ ଟିମ ସାମିଲ ଥିଲେ।
ଅବକାରୀ ମନ୍ତ୍ରୀ ସାରା ରାଜ୍ୟରେ ଚୋରାମଦ କାରବାର ବନ୍ଦ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ସେହି ଅନୁସାରେ ଅବକାରୀ କମିଶନର ନରସିଂହ ଭୋଳଙ୍କ ନିର୍ଦ୍ଦେଶ କ୍ରମେ ସାରା ରାଜ୍ୟରେ ଅବକାରୀ ଚଢ଼ାଉ ଜାରି ରହିଛି। ବେଆଇନ ଦେଶୀ ମଦ ଭାଟିକୁ ଚି଼ହ୍ନଟ କରାଯାଇ ଭଙ୍ଗାଯାଉଛି।
