ନୂଆଦିଲ୍ଲୀ: ଆମେରିକାର ରାଷ୍ଟ୍ରପତିଙ୍କ ସରକାରୀ ବାସଭବନ ଏବଂ କାର୍ଯ୍ୟାଳୟ ‘ହ୍ଵାଇଟ ହାଉସ୍’ର ଡକ୍ୟୁମେଣ୍ଟରେ ଭାରତ ଉପରେ ଲାଗୁ ହୋଇଥିବା ଆମଦାନୀ ଶୁଳ୍କ 27 ପ୍ରତିଶତରୁ 26 ପ୍ରତିଶତକୁ ହ୍ରାସ ପାଇଛି। ଏହି ଶୁଳ୍କ ଏପ୍ରିଲ 9 ତାରିଖରୁ ଲାଗୁ ହେବ। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର ଦିନ ବିଭିନ୍ନ ଦେଶ ଉପରେ ଶୁଳ୍କ ଘୋଷଣା କରିବାବେଳେ ଏକ ଚାର୍ଟ ଦେଖାଇଥିଲେ, ଯେଉଁଥିରେ ଭାରତ, ଚୀନ୍, ବ୍ରିଟେନ ଏବଂ ୟୁରୋପୀୟ ୟୁନିଅନ୍ ଭଳି ଦେଶ ଉପରେ ଲାଗୁ ହେବାକୁ ଥିବା ନୂତନ ଶୁଳ୍କ ହାର ଉଲ୍ଲେଖ କରାଯାଇଥିଲା।
ଚାର୍ଟ ଅନୁଯାୟୀ, “ମୁଦ୍ରା ହେରେଫର ଏବଂ ବାଣିଜ୍ୟ ପ୍ରତିବନ୍ଧକ” ସହିତ ଭାରତ 52 ପ୍ରତିଶତ ଶୁଳ୍କ ଆଦାୟ କରୁଛି ଏବଂ ଆମେରିକା ବର୍ତ୍ତମାନ ଭାରତକୁ 26 ପ୍ରତିଶତ ରିହାତି ମୂଲ୍ୟର ଶୁଳ୍କ ନେବ। ଯଦିଓ, ହ୍ଵାଇଟ ହାଉସର ଡକ୍ୟୁମେଣ୍ଟରେ ଭାରତ ଉପରେ 27 ପ୍ରତିଶତ ଶୁଳ୍କ ଲାଗୁ ହେବାର ଉଲ୍ଲେଖ ରହିଛି, କିନ୍ତୁ ସର୍ବଶେଷ ଡକ୍ୟୁମେଣ୍ଟରେ ଏହାକୁ 26 ପ୍ରତିଶତକୁ ହ୍ରାସ କରାଯାଇଛି।
ହ୍ରାସ ଅଧିକ ପ୍ରଭାବ ପକାଇବ ନାହିଁ:
ଏ ବାବଦରେ ପଚରାଯିବାରୁ ଶିଳ୍ପ ବିଶେଷଜ୍ଞମାନେ କହିଛନ୍ତି ଯେ, ଶୁଳ୍କକୁ ଏକ ପ୍ରତିଶତ ହ୍ରାସ କରିବା ଦ୍ୱାରା ଏହାର ଅଧିକ ପ୍ରଭାବ ପଡ଼ିବ ନାହିଁ। ଆର୍ଥିକ ବର୍ଷ 2021-22 ରୁ 2023-24 ପର୍ଯ୍ୟନ୍ତ ଆମେରିକା ଭାରତର ସବୁଠାରୁ ବଡ ବାଣିଜ୍ୟ ଭାଗୀଦାର ଥିଲା। ଭାରତର ମୋଟ ବାଣିଜ୍ୟ ରପ୍ତାନିରେ ଆମେରିକାର ଅଂଶ ପ୍ରାୟ 18 ପ୍ରତିଶତ, ଆମଦାନୀରେ 6.22 ପ୍ରତିଶତ ଏବଂ ଦ୍ୱିପାକ୍ଷିକ ବାଣିଜ୍ୟରେ 10.73 ପ୍ରତିଶତ ଥିଲା।
ଭାରତକୁ ଆମେରିକାର ରପ୍ତାନି:
2024 ମସିହାରେ ଆମେରିକାକୁ ଭାରତର ମୁଖ୍ୟ ରପ୍ତାନିରେ ଫାର୍ମାସ୍ୟୁଟିକାଲ୍ସ ଏବଂ ଜୈବିକ ପଦାର୍ଥ (8.1 ବିଲିୟନ ଡ଼ଲାର୍), ଟେଲି ଯୋଗାଯୋଗ ଉପକରଣ (6.5 ବିଲିୟନ ଡ଼ଲାର୍), ମୂଲ୍ୟବାନ ତଥା ଅର୍ଦ୍ଧ ମୂଲ୍ୟବାନ ପଥର (5.3 ବିଲିୟନ ଡ଼ଲାର୍), ପେଟ୍ରୋଲିୟମ ଉତ୍ପାଦ (4.1 ବିଲିୟନ ଡ଼ଲାର୍), ସୁନା ଏବଂ ଅନ୍ୟାନ୍ୟ ମୂଲ୍ୟବାନ ଧାତୁ ଅଳଙ୍କାର (3.2 ବିଲିୟନ ଡ଼ଲାର୍) ଏବଂ ଲୁହା ତଥା ଇସ୍ପାତ ଉତ୍ପାଦ (2.7 ବିଲିୟନ ଡ଼ଲାର୍) ଅନ୍ତର୍ଭୁକ୍ତ। ଆମଦାନୀରେ ଅଶୋଧିତ ତୈଳ (4.5 ବିଲିୟନ ଡ଼ଲାର୍), ପେଟ୍ରୋଲିୟମ ଉତ୍ପାଦ (3.6 ବିଲିୟନ ଡ଼ଲାର୍), କୋଇଲା ଏବଂ କୋକ୍ (3.4 ବିଲିୟନ ଡ଼ଲାର୍), ହୀରା (2.6 ବିଲିୟନ ଡ଼ଲାର୍), ବୈଦ୍ୟୁତିକ ଯନ୍ତ୍ରପାତି (1.4 ବିଲିୟନ ଡ଼ଲାର୍), ବିମାନ, ମହାକାଶଯାନ (1.3 ବିଲିୟନ ଡ଼ଲାର୍) ଏବଂ ସୁନା (1.3 ବିଲିୟନ ଡ଼ଲାର୍) ଅନ୍ତର୍ଭୁକ୍ତ।