ଭୁବନେଶ୍ୱର: ସିକଲ୍ ସେଲ୍ (ରକ୍ତଶିକୁଳି) ରୋଗର ଅତ୍ୟାଧୁନିକ ଚିକିତ୍ସା ଏବଂ ଏହି କ୍ଷେତ୍ରରେ ଉଚ୍ଚତର ଗବେଷଣା ନିମନ୍ତେ ଏମ୍ସ ଭୁବନେଶ୍ୱରକୁ ଉତ୍କର୍ଷତା କେନ୍ଦ୍ର (ସେଣ୍ଟର୍ ଅଫ୍ ଏକ୍ସଲେନ୍ସ୍) ମାନ୍ୟତା ପ୍ରଦାନ କରାଯିବ। ଆଜି ଏମ୍ସ ଭୁବନେଶ୍ୱରରେ ଆୟୋଜିତ ବିଶ୍ୱ ସିକଲ୍ ସେଲ୍ (ରକ୍ତଶିକୁଳି) ସଚେତନତା ଦିବସ ପାଳନ କାର୍ଯ୍ୟକ୍ରମରେ ଯୋଗଦେଇ ମାନ୍ୟବର କେନ୍ଦ୍ର ଜନଜାତି ବ୍ୟାପାର ମନ୍ତ୍ରୀ ଜୁଏଲ ଓରାମ ଏହି ଘୋଷଣା କରିଛନ୍ତି।
ଓଡ଼ିଶା ସମେତ ପଡ଼ୋଶୀ ରାଜ୍ୟର ରକ୍ତଶିକୁଳି ରୋଗୀଙ୍କୁ ସାମଗ୍ରୀକ ଚିକିତ୍ସା ପ୍ରଦାନ କରିବାରେ ଏମ୍ସ ଭୁବନେଶ୍ୱର ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରୁଛି। “ସେଣ୍ଟର ଅଫ୍ ଏକ୍ସଲେନ୍ସ ମାନ୍ୟତା, ସିକଲ୍ ସେଲ୍ ରୋଗରେ ଉନ୍ନତ ଗବେଷଣା ଏବଂ ଗୁଣାତ୍ମକ ଚିକିତ୍ସା ପ୍ରଦାନରେ ଏମ୍ସ ଭୁବନେଶ୍ୱରକୁ ଆହୁରି ଦୃଢ଼ କରିବ ବୋଲି କେନ୍ଦ୍ରମନ୍ତ୍ରୀ ଓରାମ୍ ପ୍ରକାଶ କରିଥିଲେ।
ମାନ୍ୟବର ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟିପୂର୍ଣ୍ଣ ନେତୃତ୍ୱରେ, ଭାରତ ସରକାର ୨୦୪୭ ସୁଦ୍ଧା ସିକଲ୍ ସେଲ୍ ଆନିମିଆକୁ ସମ୍ପୂର୍ଣ୍ଣ ଦୂର କରିବା ପାଇଁ ପ୍ରତିବଦ୍ଧ। ଏପର୍ଯ୍ୟନ୍ତ ସାରା ଦେଶରେ ୫.୭୯ କୋଟି ଲୋକଙ୍କର ସ୍କ୍ରିନିଂ କରାଯାଇଛି। ସେମାନଙ୍କ ମଧ୍ୟରୁ ୫.୫୫ କୋଟି ଲୋକଙ୍କ ଫଳାଫଳ ନେଗେଟିଭ୍ ଆସିଛି। ୧୬.୩୮ ଲକ୍ଷ ଲୋକଙ୍କୁ ରକ୍ତଶିକୁଳି ରୋଗର ବାହକ ଭାବରେ ଚିହ୍ନଟ କରାଯାଇଥିବା ବେଳେ ୨.୧୦ ଲକ୍ଷ ଲୋକ ଏହି ରୋଗରେ ଆକ୍ରାନ୍ତ ଥିବା ଶ୍ରୀ ଓରାମ୍ ସୂଚନା ଦେଇଛନ୍ତି।
ଏମ୍ସ ଭୁବନେଶ୍ୱରରେ ବର୍ତ୍ତମାନ ସାତ ଶହରୁ ଅଧିକ ପଞ୍ଜିକୃତ ସିକଲ୍ ସେଲ୍ ରୋଗୀ ନିୟମିତ ବ୍ୟବଧାନରେ ଚିକିତ୍ସିତ ହେଉଛନ୍ତି। ସେମାନଙ୍କ ମଧ୍ୟରୁ ପାଞ୍ଚ ଶହରୁ ଉର୍ଦ୍ଧ୍ବ ୦-୧୯ ବୟସ ବର୍ଗର। ଏହି ଜାତୀୟ ସ୍ବାସ୍ଥ୍ୟ ପ୍ରତିଷ୍ଠାନ ନିୟମିତ ରୋଗ ନିର୍ଣ୍ଣୟ ସେବା, ଚିକିତ୍ସା ଏବଂ ବାହକ ସ୍କ୍ରିନିଂ ପ୍ରଦାନ କରେ, ଯେଉଁଥିରେ ପ୍ରଭାବିତ ବ୍ୟକ୍ତିମାନଙ୍କର ପରିବାରର ସଦସ୍ୟ ମଧ୍ୟ ଅନ୍ତର୍ଭୁକ୍ତ, ବୋଲି ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ବିଶିଷ୍ଟ ସଂକ୍ରାମକ ରୋଗ ବିଶେଷଜ୍ଞ ଡ. ଆଶୁତୋଷ ବିଶ୍ୱାସ ପ୍ରକାଶ କରିଛନ୍ତି।
ଏମ୍ସରେ ଗର୍ଭଧାରଣର ପ୍ରଥମ ୨୦ ସପ୍ତାହ ମଧ୍ୟରେ ଡାଉନ୍ ସିଣ୍ଡ୍ରୋମ୍, ନ୍ୟୁରାଲ୍ ଟ୍ୟୁବ୍ ତ୍ରୁଟି, ଥାଲାସେମିଆ ଏବଂ ସିକଲ୍ ସେଲ୍ ଆନିମିଆ ଭଳି ଅବସ୍ଥା ଚିହ୍ନଟ କରିବା ପାଇଁ ପ୍ରସବପୂର୍ବ ନିର୍ଣ୍ଣୟ ସେବା ମଧ୍ୟ ପ୍ରଦାନ କରେ। “ଯଦି ଉଭୟ ପିତାମାତା ବାହକ ହୁଅନ୍ତି, ତେବେ ପିଲା ପ୍ରଭାବିତ ହେବାର ୨୫ ପ୍ରତିଶତ ସମ୍ଭାବନା ଥିବା ଡ. ବିଶ୍ବାସ ସୂଚନା ଦେଇଛନ୍ତି।
ଏହି ଗସ୍ତ ଅବସରରେ, କେନ୍ଦ୍ରମନ୍ତ୍ରୀ ଶ୍ରୀ ଓରାମ୍ ପ୍ରତିଷ୍ଠାନର ଏକାଧିକ ଚିକିତ୍ସା ସୁବିଧା ବ୍ୟବସ୍ଥା ପରିଦର୍ଶନ କରିଥିଲେ। ରକ୍ତଶିକୁଳି ରୋଗୀ ଏବଂ ସେମାନଙ୍କ ପରିବାର ସଦସ୍ୟଙ୍କ ସହିତ ବ୍ୟକ୍ତିଗତ ଭାବରେ ଆଲୋଚନା କରିଥିଲେ। ପ୍ରଭାବିତ ବ୍ୟକ୍ତିମାନଙ୍କୁ, ବିଶେଷକରି ଆଦିବାସୀ ଏବଂ ଅନୁନ୍ନତ ସମ୍ପ୍ରଦାୟର ଲୋକଙ୍କୁ ବ୍ୟାପକ ଯତ୍ନ ପ୍ରଦାନ କରିବାରେ ଏମ୍ସ ଭୁବନେଶ୍ୱରର ପ୍ରତିବଦ୍ଧତାକୁ ଶ୍ରୀ ଓରାମ୍ ପ୍ରଶଂସା କରିଥିଲେ।
କେନ୍ଦ୍ରମନ୍ତ୍ରୀ ସିକଲ୍ ସେଲ୍ ରୋଗ ଉପରେ କେନ୍ଦ୍ରିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ମଧ୍ୟ ଅଂଶଗ୍ରହଣ କରିଥିଲେ। ସେ କ୍ଲିନିକାଲ୍ କେୟାର, ଉନ୍ନତ ଗବେଷଣା ଏବଂ ଡାକ୍ତରୀ ଶିକ୍ଷାକୁ ଅନ୍ତର୍ଭୁକ୍ତ କରିବାରେ ଏମ୍ସ ଭୁବନେଶ୍ବରର ସାମଗ୍ରିକ ଆଭିମୁଖ୍ୟକୁ ପ୍ରଶଂସା କରିଥିଲେ।
ଏହି କାର୍ଯ୍ୟକ୍ରମରେ ଅମିତ କୁମାର, ଆଇଏଏସ୍, ଡ. ଦିଲ୍ଲୀପ କୁମାର ପରିଡ଼ା, ଏମ୍ଏସ୍, ଲେଫ୍ଟନାଣ୍ଟ କର୍ଣ୍ଣେଲ ଅଭିଜିତ ସରକାର, ଡିଡିଏ, ସନ୍ତୋଷ କୁମାର ରଥ, ଉପନିର୍ଦ୍ଦେଶକ, ଏସ୍ସିଏସ୍ଟିଆର୍ଟିଆଇ, ରମେଶ ଚାନ୍ଦ ଚନ୍ଦ୍ରୱାଲ, କେନ୍ଦ୍ର ଜନଜାତି ମନ୍ତ୍ରଣାଳୟ, ଡ. ସୋନାଲି ମହାପାତ୍ର, ହେମାଟୋଲୋଜି ବିଭାଗ ମୁଖ୍ୟ, ଡ. ଆଶୁତୋଷ ପାଣିଗ୍ରାହୀ, ଡ. ଦେବାଶିଷ ସାହୁ, ବିଭିନ୍ନ ବିଭାଗର ମୁଖ୍ୟ, ଅଧ୍ୟାପକ, ଅଧ୍ୟାପିକା ଅଂଶଗ୍ରହଣ କରିଥିଲେ।