ବାଲୁଗାଁ: ୧୬ ନଂ ଜାତୀୟ ରାଜପଥ ନାଭାଲ ଫାଣ୍ଡି ନିକଟସ୍ଥ ନୂଆଗଡ଼ ଓଭରବ୍ରିଜ ନିକଟରେ ଭାରସାମ୍ୟ ହରାଇ ଏକ ଯାତ୍ରୀବାହୀ ଅଟୋ ଓଲଟି ପଡିଛି। ଯେଉଁଥିରେ ଜଣେ ନାବାଳକ ମୃତ୍ୟୁ ବରଣ କରିବାସହ ଚାଳକ ସମେତ ୪ ଜଣ ଆହତ ହୋଇଛନ୍ତି।
ଖବର ମୁତାବକ ଆଜି ପୂର୍ବାହ୍ନରେ ନାଭାଲ ଛକରୁ ବାଲୁଗାଁ ଅଭିମୁଖେ ଏକ ଯାତ୍ରୀବାହୀ ଅଟୋ ଯାତ୍ରୀ ନେଇ ଯାଉଥିବା ବେଳେ ନୂଆଗଡ଼ ଓଭରବ୍ରିଜ ନିକଟରେ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଅଟୋରେ ଥିବା ସମସ୍ତ ଯାତ୍ରୀ ଗୁରୁତର ଆହତ ହୋଇଥିଲେ।ସ୍ଥାନୀୟ ଲୋକଙ୍କ ସହାୟତାରେ ସମସ୍ତ ଆହତଙ୍କୁ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ୪ ଜଣ ଗୁରୁତର ଆହତ ହୋଇଥିବା ବେଳେ ଜଣେ ମୃତ୍ୟୁବରଣ କରିଥିବା ଡାକ୍ତର ସୂଚନା ଦେଇଛନ୍ତି।ମୃତକ ଜଣଙ୍କ ଆଖୁପୋଖରା ଗ୍ରାମର ଶିବ ନାୟକଙ୍କ ପୁଅ ସୁକାନ୍ତ ନାୟକ(୧୫)ବୋଲି ଜଣାପଡିଛି।ଦୁର୍ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି।