ଭୁବନେଶ୍ଵର: ଭାରତ ସରକାରଙ୍କ ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଅଧୀନ କେନ୍ଦ୍ରୀୟ ସଞ୍ଚାର ବ୍ୟୁରୋ ଏବଂ ପତ୍ର ସୂଚନା କାର୍ଯ୍ୟାଳୟର ମିଳିତ ଆନୁକୁଲ୍ୟରେ ଆଜି ‘ଅନ୍ତର୍ଜାତୀୟ ମହିଳା ଦିବସ’ ଉପଲକ୍ଷେ ଏକ ଆଲୋଚନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। “ଡିଜିଟାଲ କ୍ଷେତ୍ରରେ ଲିଙ୍ଗଗତ ବୈଷମ୍ୟକୁ ଦୂରକରିବା” ବିଷୟ ଉପରେ ଏଠାରେ ଆଲୋଚନା ହୋଇଥିଲା।
ଏହି କାର୍ଯ୍ୟକ୍ରମ ପିଆଇବି ଏବଂ ସିବିସି (ଓଡ଼ିଶା ଓ ଝାଡ଼ଖଣ୍ଡ ଅଞ୍ଚଳ)ର ଅତିରିକ୍ତ ମହାନିର୍ଦ୍ଦେଶକ ଅଖିଳ କୁମାର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ଏହି ଆଲୋଚନାଚକ୍ରରେ ମୁଖ୍ୟ ଅତିଥି ଭାବେ ଆୟକର ବିଭାଗର ଅବସରପ୍ରାପ୍ତ ପ୍ରଧାନ ମୁଖ୍ୟ ଆୟୁକ୍ତ ପରମିତା ଶତପଥୀ ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ବିଜେବି କଲେଜର ସମାଜଶାସ୍ତ୍ର ବିଭାଗର ପ୍ରାଧ୍ୟାପିକା ଡକ୍ଟର ବିଭାବରୀ ବଳ କାର୍ଯ୍ୟକ୍ରମରେ ଉପସ୍ଥିତ ରହି ଏହାର ଗୌରବ ବଢ଼ାଇଥିଲେ। ଏଥି ସହ ସୋଆ ବିଶ୍ଵ ବିଦ୍ୟାଳୟର ଛାତ୍ରୀମାନେ ଉପସ୍ଥିତ ରହି ଆଲୋଚନା ଚକ୍ରରେ ଅଂଶଗ୍ରହଣ କରିଥିଲେ।
ସଭାକୁ ସମ୍ବୋଧିତ କରି ଶ୍ରୀ ମିଶ୍ର ବ୍ୟକ୍ତିଗତ ସ୍ୱାଧୀନତା ଏବଂ ଭାରତୀୟ ଦର୍ଶନ ମାଧ୍ୟମରେ “ଡିଜିଟାଲ୍ ଲିଙ୍ଗଗତ ବ୍ୟବଧାନ”ର ପୁନର୍ବ୍ୟାଖ୍ୟା କରିଥିଲେ। ରାମାୟଣ ଏବଂ ମହାଭାରତର ବିଭିନ୍ନ ପ୍ରସଙ୍ଗକୁ ଭିତ୍ତି କରି ସେ କହିଥିଲେ ଯେ, ମହିଳାମାନଙ୍କର ପସନ୍ଦ, ମର୍ଯ୍ୟାଦା ଏବଂ ଶକ୍ତି ଭାରତର ସାଂସ୍କୃତିକ ଚେତନାରେ ବହୁ ପୂର୍ବରୁ ସ୍ଥାନ ପାଇଛି। ସଶକ୍ତିକରଣ କେବଳ ପ୍ରଯୁକ୍ତିବିଦ୍ୟା ପହଞ୍ଚିବା ମଧ୍ୟରେ ସୀମିତ ନୁହେଁ, ବରଂ ଏଥିରେ ମହିଳାମାନଙ୍କର ସମାଜରେ ସକ୍ରିୟ ଅଂଶଗ୍ରହଣ ପାଇଁ ସ୍ୱାଧୀନତା ଓ ସୁଯୋଗ ଅନ୍ତର୍ଭୁକ୍ତ ହେବା ଉଚିତ। ପ୍ରତିଯୋଗିତା ଅପେକ୍ଷା ସହଭାଗିତା ଉପରେ ଗୁରୁତ୍ୱ ଦେଇ ସେ କହିଥିଲେ ଯେ, ଏକ ସନ୍ତୁଳିତ ଏବଂ ଅନ୍ତର୍ଭୁକ୍ତିକରଣ ସମାଜ ଗଠନ ପାଇଁ ପୁରୁଷ ଓ ମହିଳା ଏକାଠି ଆଗକୁ ବଢ଼ିବା ଏବଂ ପରସ୍ପରକୁ ସମର୍ଥନ କରିବା ଆବଶ୍ୟକ।
ଏହି ଅବସରରେ ମୁଖ୍ୟ ଅତିଥି ପରମିତା ଶତପଥୀ ବିଭିନ୍ନ କ୍ଷେତ୍ରରେ ମହିଳାମାନଙ୍କର ଉଲ୍ଲେଖନୀୟ ଅଗ୍ରଗତି ଉପରେ ଆଲୋକପାତ କରିଥିଲେ। ସେ କହିଥିଲେ ଯେ ଆଜିର ମହିଳାମାନେ ସମସ୍ତ ବାଧାବିଘ୍ନକୁ ଅତିକ୍ରମ କରି ନିଜର ପରିସରକୁ ବ୍ୟାପକ କରିବାରେ ସଫଳ ହୋଇଛନ୍ତି। ବ୍ୟକ୍ତିଗତ ସଫଳତା ପ୍ରେରଣାଦାୟକ ହୋଇଥିଲେ ମଧ୍ୟ ସମାଜର ସମସ୍ତ ମହିଳାଙ୍କ ସାମୂହିକ ସଶକ୍ତିକରଣ ଆମର ମୁଖ୍ୟ ଲକ୍ଷ୍ୟ ହେବା ଉଚିତ ବୋଲି ସେ ମତ ପ୍ରକାଶ କରିଥିଲେ। ଉପସ୍ଥିତ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରି ସେ କହିଥିଲେ ଯେ କେବଳ ବୃତ୍ତିଗତ ସଫଳତା ନୁହେଁ, ବରଂ ଆତ୍ମବିଶ୍ୱାସ, ନିଷ୍ଠା ଓ ଏକ ଦୃଢ଼ ଉଦ୍ଦେଶ୍ୟ ରଖି ସମାଜ ପାଇଁ ଅର୍ଥପୂର୍ଣ୍ଣ ଅବଦାନ ରଖିବା ସହ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରନ୍ତୁ।
ନିଜ ଅଭିଭାଷଣରେ ଡକ୍ଟର ବିଭାବରୀ ବଳ କହିଥିଲେ ଯେ, ଡିଜିଟାଲ୍ ଲିଙ୍ଗଗତ ବ୍ୟବଧାନ ସାମାଜିକ ଏବଂ ଗଠନମୂଳକ ଅସମାନତା ମଧ୍ୟରେ ନିହିତ, ଯାହା ମହିଳାମାନଙ୍କ ପାଇଁ ପ୍ରଯୁକ୍ତିବିଦ୍ୟାର ବ୍ୟବହାରକୁ ସୀମିତ କରିଥାଏ। ସେ ଜୋର୍ ଦେଇ କହିଥିଲେ ଯେ, ମହିଳାମାନଙ୍କୁ ସଶକ୍ତ କରିବା ଏବଂ ଆଜିର ଡିଜିଟାଲ୍ ସମାଜରେ ସେମାନଙ୍କର ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଡିଜିଟାଲ୍ ସାକ୍ଷରତା ଏବଂ ଦକ୍ଷତା ବୃଦ୍ଧି ଅତ୍ୟନ୍ତ ଜରୁରୀ।
ଏହି ଆଲୋଚନା ଚକ୍ରର ଅଂଶବିଶେଷ ସ୍ୱରୂପ, ଗଣମାଧ୍ୟମରେ କାର୍ଯ୍ୟରତ ପ୍ରତିଷ୍ଠିତ ମହିଳା ଗଣମାଧ୍ୟମ ପ୍ରତିନିଧିମାନଙ୍କୁ ସମ୍ମାନିତ କରାଯାଇଥିଲା। ଏହା ସହିତ ଉପସ୍ଥିତ ଛାତ୍ରୀମାନଙ୍କୁ ନେଇ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ ଏବଂ ସିବିସିର କଳାକାରମାନଙ୍କ ଦ୍ୱାରା ବିଷୟଭିତ୍ତିକ ନାଟକ ପରିବେଷଣ କରାଯାଇଥିଲା।
ପରିଶେଷରେ କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରିଥିବା ଛାତ୍ରୀମାନଙ୍କୁ ଅଂଶଗ୍ରହଣ ପ୍ରମାଣପତ୍ର ପ୍ରଦାନ କରାଯାଇଥିଲା। ସିବିସିର ସହକାରୀ ନିର୍ଦ୍ଦେଶକ ପ୍ରଦୀପ କୁମାର ଚୌଧୁରୀ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ସିବିସିର କ୍ଷେତ୍ର ପ୍ରଚାର ଅଧିକାରୀ ସସ୍ମିତା ପାଇକରାୟ ଧନ୍ୟବାଦ ଅର୍ପଣ କରିଥିଲେ।