ନୂଆଦିଲ୍ଲୀ: ରାଜସ୍ଥାନର ଯୋଧପୁର କେନ୍ଦ୍ରୀୟ ଜେଲରେ ବନ୍ଦୀ ଥିବା ଲଦାଖର ଜଣେ ପ୍ରସିଦ୍ଧ ପରିବେଶ କର୍ମୀ ଏବଂ ଶିକ୍ଷା ସଂସ୍କାରକ ସୋନମ ୱାଙ୍ଗଚୁକ୍ ଆଜି ଅପରାହ୍ନରେ ମୁକ୍ତ ହୋଇଛନ୍ତି। ପ୍ରାୟ ୧୭୦ ଦିନ ଅଟକ ରଖିବା ପରେ କେନ୍ଦ୍ର ସରକାର ତାଙ୍କ ବିରୁଦ୍ଧରେ ଲାଗୁ ହୋଇଥିବା ଜାତୀୟ ସୁରକ୍ଷା ଆଇନ (NSA)କୁ ତୁରନ୍ତ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି।
ରିପୋର୍ଟ ଅନୁଯାୟୀ, ୱାଙ୍ଗଚୁକ୍ ଙ୍କ ସେପ୍ଟେମ୍ବର ୨୪, ୨୦୨୫ ରେ ଲଦାଖ ପ୍ରଶାସନ ଦ୍ୱାରା ଅଟକ ରଖାଯାଇଥିଲା। ଦୁଇ ଦିନ ପରେ ସେପ୍ଟେମ୍ବର ୨୬ ତାରିଖରେ ତାଙ୍କୁ ଯୋଧପୁର କେନ୍ଦ୍ରୀୟ ଜେଲକୁ ପଠାଯାଇଥିଲା। ଲଦାଖରେ ରାଜ୍ୟ ମାନ୍ୟତା ଏବଂ ଷଷ୍ଠ ଅନୁସୂଚୀ ଦାବି କରୁଥିବା ଆନ୍ଦୋଳନ ସମୟରେ ହିଂସାକୁ ଉସୁକାଇବାର ତାଙ୍କ ଉପରେ ଅଭିଯୋଗ ହୋଇଥିଲା। ସେହି ହିଂସାରେ ଚାରି ଜଣଙ୍କର ମୃତ୍ୟୁ ହୋଇଥିଲା ଏବଂ ୧୫୦ ରୁ ଅଧିକ ଲୋକ ଆହତ ହୋଇଥିଲେ।
ଶୁଣାଣି ପୂର୍ବରୁ NSA ପ୍ରତ୍ୟାହାର କଲା କେନ୍ଦ୍ର
ସୂଚନା କରାଯାଉଛି ଯେ, ୱାଙ୍ଗଚୁକ୍ ଙ୍କ ପତ୍ନୀ ଗୀତାଞ୍ଜଳିଙ୍କ ଦ୍ୱାରା ଦାୟର ଆବେଦନ ଉପରେ ୧୭ ମାର୍ଚ୍ଚରେ ସୁପ୍ରିମକୋର୍ଟରେ ଶୁଣାଣି ହେବାର ଥିଲା, କିନ୍ତୁ ଏହା ପୂର୍ବରୁ କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇ NSA ପ୍ରତ୍ୟାହାର କରିଛନ୍ତି। ଗୃହ ମନ୍ତ୍ରଣାଳୟ ଅନୁଯାୟୀ, ଲଦାଖରେ ଶାନ୍ତି, ସ୍ଥିରତା ଏବଂ ପାରସ୍ପରିକ ବିଶ୍ୱାସର ପରିବେଶ ସୃଷ୍ଟି କରିବା ପାଇଁ ଏହି ପଦକ୍ଷେପ ନିଆଯାଇଛି।
ମୁକ୍ତି ପୂର୍ବରୁ ଏକ ସୋସିଆଲ ମିଡିଆ ପୋଷ୍ଟରେ ସୋନମ ୱାଙ୍ଗଚୁକ୍ କହିଥିଲେ ଯେ, ସେ ତାଙ୍କର ଆନ୍ଦୋଳନ ଏବଂ ସକ୍ରିୟତାରୁ ହାର ମାନି ନାହାଁନ୍ତି। ସେ ଲେଖିଛନ୍ତି ଯେ, ତାଙ୍କର ସଂଘର୍ଷ ଲଦାଖର ସୁରକ୍ଷା, ମର୍ଯ୍ୟାଦା ଏବଂ ଭବିଷ୍ୟତ ପାଇଁ ଥିଲା ଏବଂ ଜାରି ରହିବ। ଏହି ସମୟରେ ପ୍ରମୁଖ ଲଦାଖ ସଂଗଠନ, ଲେହ ଆପେକ୍ସ ବଡି (LAB) ଏବଂ କାର୍ଗିଲ ଡେମୋକ୍ରାଟିକ୍ ଆଲାଏନ୍ସ (KDA) ମଧ୍ୟ ନିରନ୍ତର ତାଙ୍କର ମୁକ୍ତି ଦାବି କରିଆସୁଛନ୍ତି।
ଉଲ୍ଲେଖ ଯୋଗ୍ୟ ଯେ, ଲଦାଖୀ ପରିବେଶ କର୍ମୀ ସୋନମ ୱାଙ୍ଗଚୁକ୍ ଙ୍କୁ ସେପ୍ଟେମ୍ବର ୨୪ ତାରିଖ ୨୦୨୫ ରେ ଲଦାଖ ପ୍ରଶାସନ ଦ୍ୱାରା ଅଟକ ରଖାଯାଇଥିଲା। ଦୁଇ ଦିନ ପରେ ସେପ୍ଟେମ୍ବର ୨୬ ତାରିଖରେ ତାଙ୍କୁ ଯୋଧପୁର କେନ୍ଦ୍ରୀୟ କାରାଗାରକୁ ପଠାଯାଇଥିଲା। ତଥାପି, ସୋନମ ୱାଙ୍ଗଚୁକ୍ ଙ୍କ ପତ୍ନୀ ଗୀତାଞ୍ଜଳି ଆଙ୍ଗମୋ ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଥିଲେ, ଯେଉଁଥିରେ ତାଙ୍କ ସ୍ୱାମୀଙ୍କ NSA ଅଧୀନରେ ଅଟକ ରଖିବା ଅବୈଧ, ମନମୁଖୀ ଏବଂ ଅସାମ୍ବିଧାନିକ ବୋଲି କୁହାଯାଇଥିଲା।