ବାଲୁଗାଁ: ଚିଲିକାରେ ଉଦଘାଟିତ ହୋଇଯାଇଛି ପ୍ରଥମ ଚିଲିକା ପୁସ୍ତକ ମେଳା। ବାଲୁଗାଁ କଲେଜ ପଡ଼ିଆଠାରେ ଏହି ପୁସ୍ତକ ମେଳା ଆରମ୍ଭ ହୋଇଛି। ୨୪ ତାରିଖରୁ ଆରମ୍ଭ ହୋଇଥିବା ଏହି ପୁସ୍ତକ ମେଳା ୨୮ତାରିଖ ପର୍ଯ୍ୟନ୍ତ ଚାଲିବ। ଦୀର୍ଘ ୫ ଦିନ ଧରି ଚାଲିବାକୁ ଥିବା ଏହି ପୁସ୍ତକ ମେଳାରେ ରାଜ୍ୟର କୋଣ ଅନୁକୋଣରୁ ୮୦ରୁ ଊର୍ଦ୍ଧ୍ୱ ପ୍ରକାଶକ, ବିତରକ, ବିକ୍ରେତା ଯୋଗ ଦେଇଛନ୍ତି।
ଆଜିର ସନ୍ଧ୍ୟାରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ମୁଖ୍ୟ ଅତିଥି ଭାବେ ଯୋଗ ଦେବେ। ଉପମୁଖ୍ୟମନ୍ତ୍ରୀ ସହିତ ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ଏବଂ ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ଵାଇଁ ମଧ୍ୟ ଯୋଗ ଦେବେ। ବୈଷୟିକ ଅଭିବୃଦ୍ଧି ଓ ଅନଲାଇନ ସରଫିଙ୍ଗରେ ନୂଆପିଢ଼ିର ଯୁବବର୍ଗ ଏତେ ନିମଗ୍ନ ରହୁଛନ୍ତି ଯେ ବହିପଢ଼ା ସଂସ୍କୃତିରେ ଶିଥିଳତା ଆସିଯାଇଛି। ଏଭଳି ସ୍ଥିତିରେ ପଠନ ଅଭ୍ୟାସକୁ ଜାରି ରଖିବା କ୍ଷେତ୍ରରେ ପୁସ୍ତକ ମେଳାର ଗୁରତ୍ଵପୂର୍ଣ୍ଣ ଭୂମିକା ରହିଛି।
ଆଜିର ଅନଲାଇନ ମାନିଆରେ ହାତରେ ପୁସ୍ତକ ଧରିବା ଏକ ଶୁଭ ସଂକେତ। ଡିଜିଟାଲ ଯୁଗରେ ଆଜିର ଯୁବପିଢ଼ି ଧୀରେଧୀରେ ପୁସ୍ତକର ପ୍ରାଧାନ୍ୟତାକୁ ଭୁଲିବାକୁ ବସିଥିବାବେଳେ ପୁସ୍ତକମେଳା ପୁସ୍ତକର ପ୍ରାସଙ୍ଗିକତାକୁ ହୃଦୟଙ୍ଗମ କରାଇଥାଏ। ପୁସ୍ତକ ହିଁ ମଣିଷର ସବୁଠୁ ଭଲ ସାଙ୍ଗ। ଆଜିର ସମୟରେ ପୁସ୍ତକ ଆଡକୁ ଆଉଥରେ ଫେରେଇନେବାର ଏକ ସଫଳ ପ୍ରୟାସ ହେଉଛି ପୁସ୍ତକମେଳା।
ସନ୍ଧ୍ୟା ହେଲେ ପାଠକ, ସାରସ୍ୱତ, ସାଧକ ଓ ନବପ୍ରତିଭା ମାନକ ଭିତରେ ଅପୂର୍ବ ମିଳନ ଦେଖିବାକୁ ମିଳୁଛି ଏହି ମେଳାରେ। ପାଠକ ସବୁ ବର୍ଗର ପୁସ୍ତକ ଗୋଟିଏ ସ୍ଥାନରେ ପୁଣି ରିହାତି ଦରରେ ପାଇପାରୁଛନ୍ତି। କେବଳ ପୁସ୍ତକ ନୁହେଁ, ସାଂସ୍କୃତିକ କାର୍ଯ୍ୟକ୍ରମ ସହ ଏଠାରେ ପଡିଥିବା ଖାଇବା ଷ୍ଟଲ ମଧ୍ୟ ଲୋକକୁ ଆକୃଷ୍ଟ କରୁଛି।