ଭୁବନେଶ୍ବର : ରାଜଧାନୀରେ ଦିନକୁ ଦିନ ବଢ଼ୁଥିବା ଅପରାଧିକ ଘଟଣା ମଧ୍ୟରେ ପୁଣି ଏକ ନିର୍ମମ ହତ୍ୟାକାଣ୍ଡ ସାମ୍ନାକୁ ଆସିଛି। ମଞ୍ଚେଶ୍ଵର କେଲୁଚରଣ ପାର୍କ ନିକଟରେ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଛି । ପୂର୍ବ ଶତ୍ରୁତାରୁ ତାଙ୍କୁ ଖଣ୍ଡାରେ ହାଣି ଦେଇଥିବାର ସୂଚନା ରହିଛି । ଘଟଣା ପରେ ଅଞ୍ଚଳରେ ଉତ୍ତେଜନା ଦେଖାଦେଇଥିବା ବେଳେ ପୁଲିସ ତଦନ୍ତ ଆରମ୍ଭ କରିଛି।
ସମ୍ପ୍ରତି ଭୁବନେଶ୍ୱରରେ ହତ୍ୟା, ଗ୍ୟାଙ୍ଗ୍ ବିବାଦ, ଦାଦାବଟି ଆଦାୟ, ଛିନତାଇ ଏବଂ ଧାରୁଆ ଅସ୍ତ୍ରରେ ଆକ୍ରମଣ ଭଳି ଘଟଣା ବଢ଼ିଥିବା ଦେଖାଯାଉଛି। ଜନବହୁଳ ଅଞ୍ଚଳରେ ମଧ୍ୟ ଅପରାଧୀମାନେ ନିର୍ଭୟରେ ହିଂସାକାଣ୍ଡ ଘଟାଉଥିବାରୁ ଆଇନ-ଶୃଙ୍ଖଳା ପରିସ୍ଥିତିକୁ ନେଇ ପ୍ରଶ୍ନ ଉଠୁଛି। ବିଶେଷ କରି ପୂର୍ବ ଶତ୍ରୁତା, ଗୋଷ୍ଠୀ ବିବାଦ ଓ ଅପରାଧିକ ନେଟୱାର୍କ ସହରରେ ହିଂସା ବୃଦ୍ଧିର ଅନ୍ୟତମ କାରଣ ବୋଲି ଚର୍ଚ୍ଚା ହେଉଛି।
ସହରର ବିଭିନ୍ନ ଅଞ୍ଚଳରେ ପୁଲିସ ପାଟ୍ରୋଲିଂ ବୃଦ୍ଧି ଓ ଅପରାଧୀଙ୍କ ବିରୋଧରେ ସ୍ପେଶାଲ୍ ଡ୍ରାଇଭ୍ ଚାଲୁଥିଲେ ମଧ୍ୟ ଏଭଳି ଘଟଣା ଲୋକଙ୍କ ମଧ୍ୟରେ ସୁରକ୍ଷା ନେଇ ଚିନ୍ତା ବଢ଼ାଇଛି। ମଞ୍ଚେଶ୍ୱରର ଏହି ହତ୍ୟାକାଣ୍ଡ ପଛରେ କେବଳ ବ୍ୟକ୍ତିଗତ ଶତ୍ରୁତା ନା ଅନ୍ୟ କୌଣସି ଅପରାଧିକ କାରଣ ରହିଛି, ତାହା ପୁଲିସ ତଦନ୍ତ ପରେ ସ୍ପଷ୍ଟ ହେବ।
ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଭୟ ଓ ଆତଙ୍କର ପରିବେଶ ସୃଷ୍ଟି ହୋଇଥିବା ବେଳେ, ଦୋଷୀଙ୍କୁ ଶୀଘ୍ର ଗିରଫ କରିବାକୁ ସାଧାରଣ ଲୋକ ଦାବି କରିଛନ୍ତି ।