କେନ୍ଦ୍ର ଯୋଗାଯୋଗ ଏବଂ ଉତ୍ତର ପୂର୍ବାଞ୍ଚଳ ବିକାଶ ରାଷ୍ଟ୍ରମନ୍ତ୍ରୀ ଜ୍ୟୋତିରାଦିତ୍ୟ ଏମ୍. ସିନ୍ଧିଆଙ୍କ ଅଧ୍ୟକ୍ଷତାରେ ନୂଆଦିଲ୍ଲୀର ବିଜ୍ଞାନ ଭବନରେ ଡାକ ବିଭାଗ ୨୦୨୬-୨୭ ଆର୍ଥିକ ବର୍ଷର ପ୍ରଥମ ତ୍ରୈମାସିକ ବ୍ୟବସାୟ ସମୀକ୍ଷା ବୈଠକ ଆୟୋଜନ କରିଥିଲା। ଏହି ବୈଠକରେ ଯୋଗାଯୋଗ ରାଷ୍ଟ୍ରମନ୍ତ୍ରୀ ଡକ୍ଟର ଚନ୍ଦ୍ର ଶେଖର ପେମାସାନି ଉପସ୍ଥିତ ଥିଲେ। ବୈଠକରେ ଦେଶର ବିଭିନ୍ନ ସ୍ଥାନରୁ ପୋଷ୍ଟାଲ ସର୍କଲର ମୁଖ୍ୟମାନେ ପ୍ରଥମ ତ୍ରୈମାସିକରେ ବିଭାଗର କାର୍ଯ୍ୟଦକ୍ଷତା ସମୀକ୍ଷା କରିବା ଏବଂ ଇଣ୍ଡିଆ ପୋଷ୍ଟର ବ୍ୟବସାୟିକ ପରିବର୍ତ୍ତନ ପାଇଁ ପ୍ରସ୍ତୁତ ହେଉଥିବା ରୋଡମ୍ୟାପ୍ ଉପରେ ଆଲୋଚନା କରିବା ପାଇଁ ଏକତ୍ରିତ ହୋଇଥିଲେ।
ବିଭାଗର କାର୍ଯ୍ୟଦକ୍ଷତା ଉପରେ ସମୀକ୍ଷା କରି କେନ୍ଦ୍ର ମନ୍ତ୍ରୀ ଶ୍ରୀ ସିନ୍ଧିଆ କହିଛନ୍ତି ଯେ ଇଣ୍ଡିଆ ପୋଷ୍ଟ ୨୦୨୬ – ୨୭ ଆର୍ଥିକ ବର୍ଷରେ ଏକ ସକାରାତ୍ମକ ଆରମ୍ଭ କରିଛି। ୧୯,୮୦୩ କୋଟି ଟଙ୍କାର ଏକ ମହତ୍ୱାକାଂକ୍ଷୀ ବାର୍ଷିକ ରାଜସ୍ୱ ଲକ୍ଷ୍ୟ ରହିଥିବା ବେଳେ, ବିଭାଗ ପ୍ରଥମ ତ୍ରୈମାସିକରେ ୪,୦୦୯ କୋଟି ଟଙ୍କା ଆୟ କରିଛି। ଏଥିରେ ପୂର୍ବ ଆର୍ଥିକ ବର୍ଷ (୨୦୨୫ – ୨୬) ର ସମାନ ତ୍ରୈମାସିକ ତୁଳନାରେ ୨୨% ବୃଦ୍ଧି ଘଟିଛି ଏବଂ ଏହା ପ୍ରଥମ ତ୍ରୈମାସିକ ଲକ୍ଷ୍ୟର ୮୧% ହାସଲ କରିଛି।
ଇଣ୍ଡିଆ ପୋଷ୍ଟ ପରିବାରର ସମସ୍ତ ସଦସ୍ୟଙ୍କୁ ସେମାନଙ୍କର ଉତ୍ସର୍ଗୀକୃତ କାର୍ଯ୍ୟ ଏବଂ ଅଟଳ ପ୍ରତିବଦ୍ଧତା ପାଇଁ ଅଭିନନ୍ଦନ ଜଣାଇ, କେନ୍ଦ୍ର ମନ୍ତ୍ରୀ ଦେଶବ୍ୟାପୀ କର୍ମଚାରୀଙ୍କ ନିରନ୍ତର ପ୍ରୟାସକୁ ପ୍ରଶଂସା କରିଛନ୍ତି। ଏହା ବିଭାଗର ସେବା ପ୍ରଦାନରେ ଉନ୍ନତି ଆଣିଛି ଏବଂ କ୍ରମାଗତ ଅଭିବୃଦ୍ଧିରେ ଅବଦାନ ରଖିଛି ବୋଲି ସେ କହିଛନ୍ତି। ଏହି ସଫଳତା ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଡିଜିଟାଲ୍ ସଶକ୍ତ ଏବଂ ଭବିଷ୍ୟତ ପାଇଁ ପ୍ରସ୍ତୁତ ପୋଷ୍ଟାଲ୍ ନେଟୱାର୍କର ଦୃଷ୍ଟିକୋଣ ସହିତ ସମନ୍ୱିତ ଆଧୁନିକୀକରଣ, ବ୍ୟବସାୟିକ ପରିବର୍ତ୍ତନ ଏବଂ ଗ୍ରାହକ – କେନ୍ଦ୍ରିକ ସେବା ପ୍ରଦାନ ପାଇଁ ବିଭାଗର ନିରନ୍ତର ପ୍ରୟାସକୁ ସ୍ପଷ୍ଟ କରେ।
କେନ୍ଦ୍ରମନ୍ତ୍ରୀ ସମସ୍ତ ଛଅଟି ବ୍ୟବସାୟିକ କ୍ଷେତ୍ର, ଯଥା : ମେଲ୍, ପାର୍ସଲ୍, ପୋଷ୍ଟାଲ୍ ଜୀବନ ବୀମା/ଗ୍ରାମୀଣ ଡାକ ଜୀବନ ବୀମା (ପିଏଲଆଇ/ ଆରପିଏଲଆଇ), ପୋଷ୍ଟ ଅଫିସ୍ ସେଭିଂ ବ୍ୟାଙ୍କ (ପିଓଏସବି), ଅନ୍ତର୍ଜାତୀୟ ସମ୍ପର୍କ ଏବଂ ବିଶ୍ୱ ବ୍ୟବସାୟ (ଆଇଆର ଆଣ୍ଡ ଜିବି), ଏବଂ ନାଗରିକ – କେନ୍ଦ୍ରିକ ସେବା (ସିସିଏସ୍) ର କାର୍ଯ୍ୟଦକ୍ଷତା ଉପରେ ସମୀକ୍ଷା କରିଥିଲେ । ସାମଗ୍ରିକ ଉତ୍ତମ କାର୍ଯ୍ୟଦକ୍ଷତାର ପ୍ରଶଂସା କରିବା ସହିତ, ମନ୍ତ୍ରୀ ପ୍ରମୁଖ ସଫଳତା ଉପରେ ଆଲୋକପାତ କରିଥିଲେ ଏବଂ ଉଚ୍ଚ-ପ୍ରଦର୍ଶନ କରିଥିବା ସର୍କଲ୍ ଦ୍ୱାରା କାର୍ଯ୍ୟକାରୀ ସର୍ବୋତ୍ତମ ଅଭ୍ୟାସଗୁଡ଼ିକୁ ଗ୍ରହଣ କରିବାକୁ ବିଭାଗକୁ ନିର୍ଦ୍ଦେଶ ଦେଇଥିଲେ :
ବ୍ୟବସାୟିକ କ୍ଷେତ୍ର ମଧ୍ୟରେ, ନାଗରିକ – କେନ୍ଦ୍ରିକ ସେବା (ସିସିଏସ୍) ସର୍ବାଧିକ ୮୬% ବୃଦ୍ଧି ରେକର୍ଡ କରିଛି। ଏହା ପରେ ପାର୍ସଲ୍ (୫୦%), ମେଲ୍ (୪୨%), ଅନ୍ତର୍ଜାତୀୟ ସମ୍ପର୍କ ଏବଂ ବିଶ୍ୱ ବ୍ୟବସାୟ (ଆଇଆର ଆଣ୍ଡ ଜିବି) (୩୪%), ପୋଷ୍ଟାଲ୍ ଜୀବନ ବୀମା/ଗ୍ରାମୀଣ ଡାକ ଜୀବନ ବୀମା (ପିଏଲଆଇ/ ଆରପିଏଲଆଇ) (୨୦%), ଏବଂ ପୋଷ୍ଟ ଅଫିସ୍ ସେଭିଂ ବ୍ୟାଙ୍କ (ପିଓଏସବି) (୧୦%) ରହିଛି। ଏହା ବିଭାଗର ବ୍ୟବସାୟ ପୋର୍ଟଫୋଲିଓରେ ବ୍ୟାପକ ଅଭିବୃଦ୍ଧିକୁ ପ୍ରତିଫଳିତ କରେ।
ଇଣ୍ଡିଆ ପୋଷ୍ଟ ୨୦୨୬ – ୨୭ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ୪,୯୫୧ କୋଟି ଟଙ୍କାର ତ୍ରୈମାସିକ ଲକ୍ଷ୍ୟ ତୁଳନାରେ ୪,୦୦୯ କୋଟି ଟଙ୍କାର ରାଜସ୍ୱ ହାସଲ କରିଛି। ଏହା ରହିଥିବା ଲକ୍ଷ୍ୟର ୮୧% ଏବଂ ୨୦୨୫ – ୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକ ତୁଳନାରେ ଏଥିରେ ୨୨% ବୃଦ୍ଧି ଘଟିଛି। ଆନ୍ଧ୍ରପ୍ରଦେଶ, ଛତିଶଗଡ଼ ଏବଂ ପଶ୍ଚିମବଙ୍ଗ ସାମଗ୍ରିକ ଭାବରେ ତିନୋଟି ଶ୍ରେଷ୍ଠ ପ୍ରଦର୍ଶନକାରୀ ପୋଷ୍ଟାଲ୍ ସର୍କଲ୍ ଭାବରେ ଆଗରେ ଅଛନ୍ତି।
ବିଭିନ୍ନ ବ୍ୟବସାୟ ବର୍ଗରେ ଶ୍ରେଷ୍ଠ ପ୍ରଦର୍ଶନକାରୀ ସର୍କଲ୍ ଏବଂ ଲକ୍ଷ୍ୟ ତୁଳନାରେ ସେମାନଙ୍କର ସଫଳତାର ପ୍ରତିଶତ ନିମ୍ନରେ ଉଲ୍ଲେଖ କରାଯାଇଛି :
- ନାଗରିକ – କେନ୍ଦ୍ରିକ ସେବା : ପଶ୍ଚିମବଙ୍ଗ (୧୦୭%), ଉତ୍ତର ପ୍ରଦେଶ (୧୦୬%)।
- ପାର୍ସଲ୍ : ବିହାର (୧୨୧%), ତାମିଲନାଡୁ (୧୧୫%)।
- ମେଲ୍ : ଆନ୍ଧ୍ର ପ୍ରଦେଶ (୧୦୬%)।
- ପିଏଲଆଇ/ ଆରପିଏଲଆଇ : ପଶ୍ଚିମବଙ୍ଗ (୯୭%), ଜାମ୍ମୁ ଏବଂ କାଶ୍ମୀର (୯୬%)।
- ପିଓଏସବି : ଛତିଶଗଡ଼ (୧୨୪%), ଆନ୍ଧ୍ର ପ୍ରଦେଶ (୧୧୦%), ଏବଂ ଝାଡ଼ଖଣ୍ଡ (୧୦୭%)।
- ଆଇଆର ଆଣ୍ଡ ଜିବି : କେରଳ (୮୩%), ରାଜସ୍ଥାନ (୮୧%)।
କେନ୍ଦ୍ରମନ୍ତ୍ରୀ ଡାକ ନେଟୱାର୍କର କାର୍ଯ୍ୟକ୍ଷମ କ୍ଷମତାର ସମୀକ୍ଷା ମଧ୍ୟ କରିଥିଲେ ଏବଂ ଶାଖା ଡାକଘରର ସକ୍ରିୟକରଣରେ ବର୍ଷ କୁ ବର୍ଷ ଉଲ୍ଲେଖନୀୟ ବୃଦ୍ଧିକୁ ଲକ୍ଷ୍ୟ କରିଥିଲେ। ୨୦୨୬ – ୨୭ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ, ପୂର୍ବ ଆର୍ଥିକ ବର୍ଷର ସମାନ ସମୟ ତୁଳନାରେ, ଶୂନ୍ୟ ବ୍ୟବସାୟିକ କାରବାର ରିପୋର୍ଟ କରୁଥିବା ଶାଖା କାର୍ଯ୍ୟାଳୟ ସଂଖ୍ୟା ପିଓଏସବି ପାଇଁ ୯୨% ରୁ ଅଧିକ, ପିଏଲଆଇ/ ଆରପିଏଲଆଇରେ ୯୭% ଏବଂ ସ୍ପିଡ୍ ପୋଷ୍ଟ ଏବଂ ପାର୍ସଲରେ ୯୯% ହ୍ରାସ ପାଇଛି। କ୍ଷେତ୍ର ସ୍ତରରେ ବ୍ୟବସାୟ ଅଭିବୃଦ୍ଧିରେ ଉଲ୍ଲେଖନୀୟ ଉନ୍ନତିକୁ ପ୍ରଶଂସା କରି, ଶ୍ରୀ ସିନ୍ଧିଆ ସମସ୍ତ ଡାକ ସର୍କଲକୁ ପ୍ରତ୍ୟେକ ଶାଖା ଡାକଘରର କେନ୍ଦ୍ରିତ ତଦାରଖ, ଗ୍ରାହକଙ୍କ ଯୋଗାଯୋଗ ଏବଂ ଉନ୍ନତ ବ୍ୟବସାୟ ସୃଷ୍ଟି ମାଧ୍ୟମରେ ଏହି ଗତି ବଜାୟ ରଖିବାକୁ ନିର୍ଦ୍ଦେଶ ଦେଇଥିଲେ।
ଏହା ବ୍ୟତୀତ, ବିଭାଗର ଆର୍ଥିକ ଅଭିବୃଦ୍ଧି ସମୀକ୍ଷା କରିବା ସମୟରେ, କେନ୍ଦ୍ର ମନ୍ତ୍ରୀ ଲକ୍ଷ୍ୟ କରିଥିଲେ ଯେ ଖର୍ଚ୍ଚ କଭରେଜ୍ ଅନୁପାତ (ଇସିଆର) ୨୦୨୫ -୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ୨୮% ରୁ ୩୨% (ପେନସନ ସମେତ) ଏବଂ ୪୧% ରୁ ୪୭% (ପେନସନ୍ ବ୍ୟତୀତ) କୁ ବୃଦ୍ଧି ପାଇଛି। ଏହା କାର୍ଯ୍ୟକ୍ଷମ ଦକ୍ଷତା ଏବଂ ଆର୍ଥିକ ପ୍ରଦର୍ଶନରେ କ୍ରମାଗତ ଉନ୍ନତିକୁ ପ୍ରତିଫଳିତ କରେ। ସେ ଇସିଆର୍ ଉନ୍ନତ କରିବାରେ ଦିଲ୍ଲୀ, ତେଲେଙ୍ଗାନା ଏବଂ ଛତିଶଗଡ଼ର ଉତ୍କୃଷ୍ଟ ପ୍ରଦର୍ଶନକୁ ପ୍ରଶଂସା କରିଥିଲେ ଏବଂ ଖର୍ଚ୍ଚରେ ଶୃଙ୍ଖଳା ବଜାୟ ରଖି ରାଜସ୍ୱ ଉତ୍ପାଦନକୁ ଆହୁରି ମଜବୁତ କରିବାକୁ ସମସ୍ତ ସର୍କଲକୁ ନିର୍ଦ୍ଦେଶ ଦେଇଥିଲେ।
କେନ୍ଦ୍ର ଯୋଗାଯୋଗ ମନ୍ତ୍ରୀ ଜ୍ୟୋତିରାଦିତ୍ୟ ଏମ୍. ସିନ୍ଧିଆ ବିଭିନ୍ନ ବ୍ୟବସାୟିକ କ୍ଷେତ୍ରଗୁଡ଼ିକରେ ସର୍ବୋତ୍ତମ ପ୍ରଦର୍ଶନକାରୀ ଡାକ ସର୍କଲଗୁଡ଼ିକୁ ପ୍ରଶଂସା କରିଥିଲେ। ସେ ସହଧର୍ମୀ ଶିକ୍ଷା ମାଧ୍ୟମରେ ସଫଳ ବ୍ୟବସାୟ ମଡେଲ ଗ୍ରହଣ କରିବାକୁ ସମସ୍ତ ସର୍କଲକୁ ଉତ୍ସାହିତ କରିଥିଲେ। ସେ ରାଜ୍ୟଗୁଡ଼ିକୁ ତିନୋଟି କ୍ଲଷ୍ଟରରେ ବିଭକ୍ତ କରି ଏକ କ୍ଲଷ୍ଟର – ଆଧାରିତ ପଦ୍ଧତି ଗ୍ରହଣ କରିବାକୁ ପରାମର୍ଶ ଦେଇଥିଲେ, ପ୍ରତ୍ୟେକଟି ପ୍ରାଥମିକତା କ୍ଷେତ୍ରର ଏକ ନିର୍ଦ୍ଦିଷ୍ଟ ବର୍ଗ ଉପରେ ଧ୍ୟାନ ଦେଇ, ଲକ୍ଷ୍ୟଭୁକ୍ତ କାର୍ଯ୍ୟ, ସୂଚନା ବଣ୍ଟନ ଏବଂ ଉନ୍ନତ ଫଳାଫଳକୁ ସକ୍ଷମ କରିବାକୁ କହିଥିଲେ। ପ୍ରଥମ ତ୍ରୈମାସିକରେ ହୋଇଥିବା ପ୍ରଗତିକୁ ପ୍ରଶଂସା କରିବା ସମୟରେ, କେନ୍ଦ୍ର ମନ୍ତ୍ରୀ କହିଛନ୍ତି ଯେ ପାର୍ସଲ, ମେଲ୍ ଏବଂ ଆଇଆର ଆଣ୍ଡ ଜିବି ବ୍ୟବସାୟିକ କ୍ଷେତ୍ରଗୁଡ଼ିକ ଉପରେ ଅବଶିଷ୍ଟ ତ୍ରୈମାସିକରେ ବିଶେଷ ଧ୍ୟାନ ଏବଂ କାର୍ଯ୍ୟ ଆବଶ୍ୟକ। ସେ ସମ୍ପୃକ୍ତ ସର୍କଲଗୁଡ଼ିକୁ ସର୍ବାଧିକ ଗ୍ରାହକ ଅଧିଗ୍ରହଣ, କର୍ପୋରେଟ୍ ଏବଂ ସଂସ୍ଥାଗତ ଗ୍ରାହକମାନଙ୍କ ସହିତ ସମ୍ପର୍କକୁ ସୁଦୃଢ଼ କରିବା, ରଣନୈତିକ ସହଭାଗୀତାକୁ ପ୍ରୋତ୍ସାହିତ କରିବା ଏବଂ ନିୟମିତ ତଦାରଖ ଏବଂ ସମୟୋଚିତ ସଂଶୋଧନମୂଳକ ପଦକ୍ଷେପ ମାଧ୍ୟମରେ ଦକ୍ଷ କାର୍ଯ୍ୟାନ୍ୱୟନ ସୁନିଶ୍ଚିତ କରିବା ପାଇଁ ନିର୍ଦ୍ଦେଶ ଦେଇଥିଲେ। ସେ ଗୁରୁତ୍ୱାରୋପ କରିଥିଲେ ଯେ ମାସିକ କାର୍ଯ୍ୟଦକ୍ଷତା ସମୀକ୍ଷା, ତଥ୍ୟ-ଆଧାରରେ ନିଷ୍ପତ୍ତି ଗ୍ରହଣ, ଅଧିକ ଦାୟିତ୍ୱ ଏବଂ ଦୃଢ଼ କ୍ଷେତ୍ର-ସ୍ତରୀୟ କାର୍ଯ୍ୟଗୁଡ଼ିକ ୨୦୨୬ – ୨୭ ଆର୍ଥିକ ବର୍ଷ ପାଇଁ ବିଭାଗର ବ୍ୟାପକ ବ୍ୟବସାୟିକ ଲକ୍ଷ୍ୟ ହାସଲ କରିବାରେ ଗୁରୁତ୍ୱପୂର୍ଣ୍ଣ ହେବ।
ଯୋଗାଯୋଗ ରାଷ୍ଟ୍ରମନ୍ତ୍ରୀ ଡକ୍ଟର ଚନ୍ଦ୍ର ଶେଖର ପେମାସାନି ବିଭାଗର ବ୍ୟବସାୟିକ କାର୍ଯ୍ୟଦକ୍ଷତାରେ ଉଲ୍ଲେଖନୀୟ ଉନ୍ନତିକୁ ପ୍ରଶଂସା କରିଥିଲେ ଏବଂ ଏହାକୁ ନିୟମିତ ସମୀକ୍ଷା, ବ୍ୟବସ୍ଥିତ ତଦାରଖ ଏବଂ ଦେଶବ୍ୟାପୀ ଡାକ କର୍ମଚାରୀଙ୍କ ପ୍ରତିବଦ୍ଧତାକୁ ଶ୍ରେୟ ଦେଇଥିଲେ। ସେ କହିଛନ୍ତି ଯେ ଏହା ଦୃଢ଼, ଅଭିବୃଦ୍ଧି – କେନ୍ଦ୍ରିତ ନେତୃତ୍ୱ, ଦାୟିତ୍ୱ ଏବଂ ସାମୂହିକ ପ୍ରୟାସର ପରିବର୍ତ୍ତନକାରୀ ପ୍ରଭାବକୁ ପ୍ରତିଫଳିତ କରେ। ଶୃଙ୍ଖଳିତ କାର୍ଯ୍ୟ, ଦଳଗତ କାର୍ଯ୍ୟ ଏବଂ ନିରନ୍ତର ତଦାରଖ ମାଧ୍ୟମରେ ଏହି ଗତି ବଜାୟ ରଖିବାକୁ ସମସ୍ତ ଡାକ ସର୍କଲକୁ ଆହ୍ୱାନ ଦେଇଥିଲେ। ପ୍ରତ୍ୟେକ ସର୍କଲ ଦ୍ୱାରା ନିରନ୍ତର ଉତ୍ତମ ପ୍ରଦର୍ଶନ ବିଭାଗର ମହତ୍ୱାକାଂକ୍ଷୀ ରାଜସ୍ୱ ଲକ୍ଷ୍ୟ ହାସଲ କରିବା ସହିତ ଇଣ୍ଡିଆ ପୋଷ୍ଟର ସେବା ପ୍ରଦାନ, ସାଧାରଣ ଲୋକଙ୍କ ଯୋଗାଯୋଗ ଏବଂ ସାଂଗଠନିକ ରୂପାନ୍ତରକୁ ଆହୁରି ମଜବୁତ କରିବା ପାଇଁ ଗୁରୁତ୍ୱପୂର୍ଣ୍ଣ ହେବ।