ବାଲୁଗାଁ: ଓଡିଆ ଚଳଚିତ୍ର ଜଗତ ପାଇଁ ଏକ ଖୁସି ଖବର। ବର୍ତ୍ତମାନ ଓଡିଶାରେ ସିନେମା ହଲର ଅଭାବ ଦେଖାଯାଇଥିବା ବେଳେ ଖୋର୍ଦ୍ଧା ଜିଲ୍ଲା ବାଲୁଗାଁରେ ଉଦଘାଟିତ ହେବାକୁ ଯାଇଛି ଏକ ନୂଆ ସିନେମା ହଲ। ଯାହାର ନାମ ରଖାଯାଇଛି ଜଗଦମ୍ବା ସିନେମା। ଏହି ନୂଆ ସିନେମା ହଲକୁ ଆସନ୍ତାକାଲି ରବିବାର 19 ତାରିଖରେ ଉଦଘାଟନ କରିବେ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ।
ଏହି ପ୍ରେକ୍ଷାଳୟକୁ ବେଶ ଆଧୁନିକତା ସ୍ପର୍ଶରେ ନିର୍ମାଣ କରାଯାଇଛି। ଉଚ୍ଚମାନର ସାଉଣ୍ଡ ସିଷ୍ଟମ ସହିତ ସାଟେଲାଇଟ ମାଧ୍ୟମରେ ଚଳଚିତ୍ର ପ୍ରଦର୍ଶିତ କରାଯିବ। ଏହି ହଲରେ ଶହେ ସତୁରି ଆସନ ବିଶିଷ୍ଠ କରାଯାଇଛି। ଏଥିସହିତ ଦର୍ଶକମାନଙ୍କ ପାଇଁ ଆରାମରେ ବସି ଚଳଚିତ୍ର ଦେଖିବା ପାଇଁ ସମସ୍ତ ବ୍ୟବସ୍ଥା କରାଯାଇଛି। ଦର୍ଶକମାନେ ବୁକ ମାଇଁ ସୋ ମାଧ୍ୟମରେ ଟିକେଟ କାଟିବେ ବୋଲି କହିଛନ୍ତି ଏହି ହଲର ମାଲିକ ଶ୍ରୀଯୁକ୍ତ ଅନଙ୍ଗ ବିଶ୍ବାଳ।
ବାଲୁଗାଁରେ ଏହି ବିଶ୍ବାଳ ପରିବାର ତରଫରୁ ଅଶିଦଶକରେ ଚଳଚିତ୍ର ପ୍ରେକ୍ଷାଳୟ ନିର୍ମାଣ କରାଯାଇଥିଲା। ଯାହାର ନାମ ଥିଲା ଲକ୍ଷ୍ମୀ ସିନେମା ହଲ। ସେତେବେଳେ ଏହି ହଲ ଓଡିଶାରେ ବେଶ ନାଁ କରିଥିଲା। ହେଲେ ପରବର୍ତ୍ତି ସମୟରେ ବିଭିନ୍ନ କାରଣରୁ ତାହା ବନ୍ଦ ହୋଇଯାଇଥିଲା। ବହୁ ବର୍ଷ ପରେ ପୁଣି ଆଉ ଏକ ସିନେମା ହଲ ନିର୍ମାଣ କରାଯାଇଥିଲା, ଯାହାର ନାମ ଜଗଦମ୍ବା ରଖାଯାଇଥିଲା। ହେଲେ ତାହା ମଧ୍ୟ ବନ୍ଦ ହୋଇଯାଇଥିଲା।
ବର୍ତ୍ତମାନ ସେହି ଜଗଦମ୍ବା ନାମରେ ଏହି ନୂଆ ସିନେମା ହଲର ଉଦଘାଟିତ ହେବ। ବର୍ତ୍ତମାନ ଖୋର୍ଦ୍ଧାଠାରୁ ବ୍ରହ୍ମପୁର ମଧ୍ୟରେ କୌଣସି ସିନେମା ହଲ୍ ନାହିଁ। ଫଳରେ ବାଲୁଗାଁର ଏହି ଅତ୍ୟାଧୁନିକ ସିନେମା ହଲ ବେଶ ଭଲ ବ୍ୟବସାୟ କରିବ ବୋଲି ଆଶା କରାଯାଉଛି। ଆସନ୍ତାକାଲି ରବିବାର ଦିନ ଉଦଘାଟନ ପରେ ବାହୁଡାରୁ ବିଧବଧ ଭାବେ ଚଳଚିତ୍ର ପ୍ରଦର୍ଶିତ କରାଯିବ ବୋଲି ଶ୍ରୀଯୁକ୍ତ ବିଶ୍ବାଳ କହିଛନ୍ତି।