ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ବ୍ରହ୍ମପୁର ପୋଲିସ ଜିଲ୍ଲା ଅଧିନ ଜରଡା ଥାନା ଅନ୍ତର୍ଗତ ଚୁଢିଆଲାଂଜି ଗ୍ରାମରେ ଗତ ୨୦୨୪ ମସିହାରେ ଘଟିଥିବା ମା ଓ ପୁଅ ହତ୍ୟା ଘଟଣାର ଶୁଣାଣି କରି ମାନ୍ୟବର ଓପିଆଇଡି ଅଦାଲତ ବିଚାରପତି ୩୯ ଜଣଙ୍କ ସାକ୍ଷ୍ୟ ଗ୍ରହଣ କରି ଅଭିଯୁକ୍ତ ଡି ଗୁନାମା ରେଡି ଓ ଭଣଜା ଜି ଦେବେନ୍ଦ୍ର ରେଡି କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ସହ ୭ ହଜାର ଟଙ୍କା ଲେଖାଏଁ ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ଅଧିକ ୫ ମାସ ଦଣ୍ଡାଦେଶ ଶୁଣାଇଛନ୍ତି।
ସୁଚନା ଅନୁଯାୟୀ, ଡି ମୋହନ ରେଡି ଦୁବାଇରେ କାମ କରୁଥିବା ବେଳେ ନିଜ ପତ୍ନୀ ନିଳବେଣୀ ଓ ୭ ବର୍ଷର ପୁଅ ଗାଁରେ ରହୁଥିଲେ। ଏହିଭଳି ପରିସ୍ଥିତିରେ ମୋହନର ଭାଉଜ ଗୁନାମା ଓ ଭଣଜା ଦେବେନ୍ଦ୍ର ମଧ୍ୟରେ ଅନୈତିକ ସମ୍ପର୍କ ରହିଥିବା ଦେଖି ନିଳବେଣି ପରିବାରର ସମ୍ମାନକୁ ନେଇ ଆପତ୍ତି କରିଥିଲେ। ଏହାକୁ ନେଇ ଅଭିଯୁକ୍ତ ଓ ନିଳବେଣିଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା ଓ ରାଗରେ ଜର୍ଜରିତ ହୋଇ ଦେବେନ୍ଦ୍ର ମାଇଁ ନିଳବେଣି ଓ ତାଙ୍କ ପୁଅକୁ ବଡ ମାଇଁଙ୍କ ସହ ମିଶି ଧାରୁଆ ଅସ୍ତ୍ରରେ ହତ୍ୟା କରିଥିଲା।
ଖବର ପାଇ ମୋହନ ଦୁବାଇରୁ ଆସି ଉଭୟ ମାଇଁ ଓ ଭଣଜା ଦେବେନ୍ଦ୍ର ବିରୋଧରେ ଜରଡା ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ନଂ ୯୭୧/୨୪ ଅନୁଯାୟୀ ମକଦ୍ଦମା ରୁଜୁ କରି ଘଟଣାର ତଦନ୍ତ ଚଳାଇ ଉଭୟ ମାଇଁ ଓ ଭଣଜାକୁ ଗିରଫ କରିଥିଲେ।