ବ୍ରହ୍ମପୁର: ଜମ୍ମୁ-କଶ୍ମୀର ଭ୍ରମଣରେ ଯାଇଥିବା ଗଞ୍ଜାମ ଜିଲ୍ଲାର ଜଣେ ପର୍ଯ୍ୟଟକଙ୍କର ଏକ ଦୁଃଖଦ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଛି। ମୃତକ ଜଣକ ହେଉଛନ୍ତି ଗୋପାଳପୁର ଥାନା ଅନ୍ତର୍ଗତ ନାରାୟଣପୁର, ଟାଟା କଲୋନୀର ବାସିନ୍ଦା ରାଉତରେଡ୍ଲା ହିମାଂଶୁ ପ୍ରସାଦ ରାଓ (୫୫, ପିତା: ସ୍ୱର୍ଗତ ବାଲକୃଷ୍ଣ ରାଓ)।
ପ୍ରାପ୍ତ ସୂଚନା ଅନୁଯାୟୀ, ଗତ ୦୨ ସେପ୍ଟେମ୍ବର ୨୦୨୬ ତାରିଖ ଦିନ ଗଞ୍ଜାମରୁ ଯାଇଥିବା ପର୍ଯ୍ୟଟକ ଦଳ ପହଲଗାମରୁ ଅନନ୍ତନାଗ ଅଭିମୁଖେ ଏକ ଇନୋଭା ଗାଡ଼ି (ନଂ ଜେକେ-୦୧-ଏଟି-୮୦୮୧) ରେ ଗସ୍ତ କରୁଥିବା ସମୟରେ, ମାଟନ (ହିମାୟୁନ ମୁଜାମ୍ମିଲ ମଡେଲ ପୋଲିସ ଷ୍ଟେସନ ଅଧୀନ) ବୁମଜୁ ଶ୍ରାଇନ୍ ନିକଟରେ ହଠାତ୍ ପାହାଡ଼ରୁ ଏକ ବିଶାଳ ପଥର ଖସି ଗାଡ଼ି ଉପରେ ପଡ଼ିଥିଲା। ଏହି ଦୁର୍ଘଟଣାରେ ଶ୍ରୀ ରାଓ ଗୁରୁତର ମୁଣ୍ଡାଘାତ ଶିକାର ହୋଇଥିଲେ। ତାଙ୍କୁ ତୁରନ୍ତ ସ୍ଥାନୀୟ ଗଭର୍ଣ୍ଣମେଣ୍ଟ ମେଡିକାଲ କଲେଜ (GMC) ଅନନ୍ତନାଗରେ ଭର୍ତ୍ତି କରାଯାଇଥିଲେ ହେଁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।
ଏହି ଦୁଃଖଦ ଖବର ପାଇବା ପରେ ବ୍ରହ୍ମପୁର ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ ଗଭୀର ଶୋକ ପ୍ରକାଶ କରିବା ସହ ଅମର ଆତ୍ମାର ସଦଗତି କାମନା କରିଛନ୍ତି। ସ୍ୱର୍ଗତ ରାଓଙ୍କ ମୃତଦେହକୁ ଯଥାଶୀଘ୍ର ଓଡ଼ିଶାରେ ଥିବା ତାଙ୍କ ନିଜ ଗ୍ରାମକୁ ଫେରାଇ ଆଣିବା ନିମନ୍ତେ ସାଂସଦ ସ୍ୱତନ୍ତ୍ର ଉଦ୍ୟମ ଆରମ୍ଭ କରିଛନ୍ତି।
ଏହି ସନ୍ଦର୍ଭରେ ଡ. ପାଣିଗ୍ରାହୀ ଜମ୍ମୁ-କଶ୍ମୀରର ମୁଖ୍ୟ ଶାସନ ସଚିବ, ଅନନ୍ତନାଗ ଜିଲ୍ଲାପାଳ, ଗଭର୍ଣ୍ଣମେଣ୍ଟ ମେଡିକାଲ କଲେଜର ଅଧ୍ୟକ୍ଷ ଏବଂ ନୂଆଦିଲ୍ଲୀସ୍ଥିତ ଓଡ଼ିଶାର ପ୍ରଧାନ ରେସିଡେଣ୍ଟ କମିଶନରଙ୍କୁ ଜରୁରୀ ପତ୍ର ଲେଖିଛନ୍ତି। ଏଥିସହ ଓଡ଼ିଶାର ମୁଖ୍ୟ ଶାସନ ସଚିବ, ଗଞ୍ଜାମ ଜିଲ୍ଲାପାଳ ଏବଂ ଆରକ୍ଷୀ ଅଧୀକ୍ଷକଙ୍କୁ ମଧ୍ୟ ଅବଗତ କରାଯାଇଛି।
ମୃତଦେହର ପୋଷ୍ଟମୋର୍ଟମ, ଏମ୍ବାଲମିଂ (Embalming) ଏବଂ ଜରୁରୀ ଆଇନଗତ ପ୍ରମାଣପତ୍ର ଶୀଘ୍ର ପ୍ରଦାନ କରିବା ସହ ଶ୍ରୀନଗର ବିମାନବନ୍ଦରରୁ ମୃତଦେହକୁ ଓଡ଼ିଶା ଆଣିବା ପାଇଁ ସମସ୍ତ ବିମାନ ଯୋଗାଯୋଗ ଓ ବିଭାଗୀୟ ମଞ୍ଜୁରୀ ସୁନିଶ୍ଚିତ କରିବାକୁ ସାଂସଦ ଅନୁରୋଧ କରିଛନ୍ତି। ଏହାସହ ସେଠାରେ ଉପସ୍ଥିତ ଥିବା ସହ-ପର୍ଯ୍ୟଟକ ଏନ୍. ଗୋପାଳ ରେଡ୍ଡୀ ଓ ଅନ୍ୟମାନଙ୍କ ସୁରକ୍ଷିତ ରହିବା ଏବଂ ଫେରିବା ପାଇଁ ପ୍ରଶାସନିକ ସହାୟତା ଯୋଗାଇଦେବାକୁ ସେ ନିବେଦନ କରିଛନ୍ତି। ସାଂସଦଙ୍କ କାର୍ଯ୍ୟାଳୟ ଏହି ବିଷୟରେ ଜମ୍ମୁ-କଶ୍ମୀର ଓ ଓଡ଼ିଶା ପ୍ରଶାସନ ସହ ନିରନ୍ତର ସମନ୍ୱୟ ରକ୍ଷା କରୁଛି।