ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମଙ୍କୁ ଝଟ୍କା । ଆଇଏନ୍ଏକ୍ସ ମିଡିଆ ମାମଲାରେ ସିବିଆଇ ଦ୍ବାରା ଗିରଫ ହୋଇଥିବା ଚିଦାମ୍ବରମଙ୍କ ମାମଲାର ଆଜି ସୁପ୍ରିମ୍କୋର୍ଟରେ ବିଚାର ହେବାର ଥିଲା । ମାତ୍ର ସୁପ୍ରିମକୋର୍ଟ ପକ୍ଷରୁ ମିଳିଥିବା ସୂଚନା ଅନୁଯାୟୀ ଏହି ମାମଲାର ଆଜି ବିଚାର ହେବ ନାହିଁ । ବୁଧବାର ସିବିଆଇ ଦ୍ବାରା ଗିରଫ ହୋଇଥିବା ଚିଦାମ୍ବରମ୍ଙ୍କୁ 5 ଦିନିଆ ରିମାଣ୍ଡରେ ପଠାଇଥିଲେ ସ୍ବତନ୍ତ୍ର ସିବିଆଇ କୋର୍ଟ । ଏହାପରେ ଚିଦାମ୍ବରମ୍ଙ୍କ ଓକିଲ କପିଲ ଶିବଲ ଚିଦୁଙ୍କ ଗିରଫ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ କରାଯାଇଥିବା ମାମଲା ବିରୋଧରେ ଦୁଇଟି ମାମଲା ରୁଜୁ କରିଥିଲେ । ସୋମବାର ସୁପ୍ରିମ୍କୋର୍ଟ ଶିବଲଙ୍କ ପକ୍ଷରୁ ଦାୟର କରାଯାଇଥିବା ଇଡି ମାମଲାର ଶୁଣାଣି ପାଇଁ ରାଜି ହୋଇଛନ୍ତି । ମାତ୍ର ସିବିଆଇ ଦ୍ବାରା ଗିରଫ ମାମଲାର ବିଚାର ସମ୍ପର୍କିତ ନିଷ୍ପତ୍ତି ମୁଖ୍ୟ ବିଚାରପତି ରଞ୍ଜନ ଗୋଗୋଇ ନେବେ ବୋଲି ଜଣାପଡିଛି । ଗୁରୁବାର ଶିବଲ ଏହି ମାମଲା ରୁଜୁ କରିଥିବା ବେଳେ ତ୍ବରିତ ଶୁଣାଣିକୁ ସର୍ବୋଚ୍ଚ କୋର୍ଟ ଖଣ୍ଡନ କରିଥିଲେ । ଆଜି ଚିଦାମ୍ବରମ୍ଙ୍କ ରିମାଣ୍ଡ ଅବଧି ସରୁଥିବାରୁ ଅବଧି ବୃଦ୍ଧି କରିବା ନିମନ୍ତେ ସିବିଆଇ ପକ୍ଷରୁ ଆବେଦନ କରାଯିବ ବୋଲି ଜଣାପଡିଛି ।
