ରାୟଗଡ଼ା: ବିକାଶର ଦାବି ମଧ୍ୟରେ ପୁଣି ସାମ୍ନାକୁ ଆସିଛି ଗ୍ରାମାଞ୍ଚଳର ଏକ ଅସହାୟ ଚିତ୍ର। ଗାଁକୁ ନାହିଁ ଭଲ ରାସ୍ତା, ପହଞ୍ଚିପାରୁନି ଆମ୍ବୁଲାନ୍ସ। ଜରୁରୀ ସମୟରେ ଚିକିତ୍ସା ପାଇଁ ଯିବାକୁ ଆମ୍ବୁଲାନ୍ସ ନୁହେଁ, ଲୋକଙ୍କ କାନ୍ଧ ଓ ଖଟିଆ ହିଁ ପାଲଟିଛି ଏକମାତ୍ର ଭରସା। ଏମିତି ଏକ ଘଟଣାରେ ୯ ମାସର ଗର୍ଭବତୀଙ୍କୁ ପ୍ରାୟ ୩.୫ କିଲୋମିଟର ଖଟିଆରେ ବୋହି ନେବାକୁ ପଡ଼ିଛି। ରାୟଗଡ଼ା ଗୁଡ଼ାରୀ ବ୍ଲକର ସାଡକଣା ଗାଁର ଏହି ଘଟଣା ଗ୍ରାମାଞ୍ଚଳର ସ୍ୱାସ୍ଥ୍ୟସେବା ଓ ଯୋଗାଯୋଗ ବ୍ୟବସ୍ଥାର ବାସ୍ତବ ଚିତ୍ରକୁ ପଦାରେ ପକାଇଛି।
ଶିରିଗୁଡ଼ା ଗ୍ରାମ ପଞ୍ଚାୟତ ଅନ୍ତର୍ଗତ ସାଡକଣା ଗ୍ରାମର ୨୫ ବର୍ଷୀୟା ସୁମି କାଡ୍ରାକ ୯ ମାସର ଗର୍ଭବତୀ ଥିଲେ। ପ୍ରଥମ ସନ୍ତାନ ପ୍ରସବ ପାଇଁ ତାଙ୍କୁ ତୁରନ୍ତ ଚିକିତ୍ସାଳୟ ନେବାର ଆବଶ୍ୟକତା ପଡ଼ିଥିଲା। ପରିବାର ଲୋକ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ହେଲେ ଗାଁ ଭିତରକୁ ଯିବା ପାଇଁ ଉପଯୁକ୍ତ ରାସ୍ତା ନଥିବାରୁ ଆମ୍ବୁଲାନ୍ସ ଗାଁରେ ପହଞ୍ଚିପାରିନଥିଲା।
ଶେଷରେ ଆମ୍ବୁଲାନ୍ସ ଅପେକ୍ଷାରେ ନ ରହି ପରିବାର ଲୋକ ଓ ଗ୍ରାମବାସୀ ଏକ ଖଟିଆରେ ସୁମିଙ୍କୁ ବୋହି ନେଇଥିଲେ। ପ୍ରାୟ ୩.୫ କିଲୋମିଟର ରାସ୍ତା ଖଟିଆରେ ବୋହି ତାଙ୍କୁ ସାଡକଣାରୁ ବଡ଼ପଙ୍କାଳ ପର୍ଯ୍ୟନ୍ତ ନିଆଯାଇଥିଲା। ସେଠାରେ ଅପେକ୍ଷାରତ ଆମ୍ବୁଲାନ୍ସରେ ତାଙ୍କୁ ଚିକିତ୍ସା ପାଇଁ ନିଆଯାଇଥିଲା।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ସାଡକଣା ଗାଁକୁ ଯିବା ପାଇଁ ଦୁଇଟି ରାସ୍ତା ରହିଛି। ହେଲେ ଗୋଟିଏ ପଟେ ନାଳ ଥିବା ବେଳେ ଅନ୍ୟପଟର ରାସ୍ତା ବର୍ଷାଦିନେ କାଦୁଅପଚପଚ ହୋଇଯାଉଛି। ଫଳରେ ଯାତାୟାତ ଏକପ୍ରକାର ଦୁର୍ବିସହ ହୋଇପଡ଼ୁଛି।
ଚାରିଚକିଆ ଯାନ ଗାଁ ଭିତରକୁ ଯିବା ସମ୍ଭବ ହେଉନଥିବାରୁ ଜରୁରୀ ସମୟରେ ସାଧାରଣ ଲୋକଙ୍କୁ ଭୋଗିବାକୁ ପଡ଼ୁଛି ଅସୀମ ଯନ୍ତ୍ରଣା। ବିଶେଷକରି ଗର୍ଭବତୀ ମହିଳା, ଶିଶୁ ଓ ଗୁରୁତର ରୋଗୀଙ୍କୁ ଚିକିତ୍ସା ପାଇଁ ନେବା ସମୟରେ ସମସ୍ୟା ଆହୁରି ଗମ୍ଭୀର ହୋଇପଡ଼ୁଛି।
ସବୁଠାରୁ ବଡ଼ ପ୍ରଶ୍ନ ହେଉଛି, ଏହି ରାସ୍ତା ସମସ୍ୟା ଆଜିର ନୁହେଁ। ବର୍ଷା ଆସିଲେ ଯାତାୟାତ ସମସ୍ୟା ଆହୁରି ଜଟିଳ ହେଉଛି। ଜରୁରୀ ସମୟରେ ଆମ୍ବୁଲାନ୍ସ ଗାଁ ନିକଟରେ ପହଞ୍ଚିପାରୁନଥିବାରୁ ଲୋକଙ୍କ କାନ୍ଧ ହିଁ ରୋଗୀଙ୍କ ପାଇଁ ଆମ୍ବୁଲାନ୍ସର ବିକଳ୍ପ ପାଲଟୁଛି।
ଯେଉଁ ସମୟରେ ଗର୍ଭବତୀ ମହିଳାଙ୍କୁ ସୁରକ୍ଷିତ ଓ ତୁରନ୍ତ ଚିକିତ୍ସା ସୁବିଧା ମିଳିବା କଥା, ସେଠାରେ ଜଣେ ୯ ମାସର ଗର୍ଭବତୀଙ୍କୁ ୩.୫ କିଲୋମିଟର ଖଟିଆରେ ବୋହି ନେବା ଘଟଣା ବ୍ୟବସ୍ଥାର ବିଫଳତା ନେଇ ପ୍ରଶ୍ନ ଉଠାଇଛି।
ଗାଁକୁ ସୁଗମ ରାସ୍ତା ନିର୍ମାଣ ସହ ଜରୁରୀ ସମୟରେ ଆମ୍ବୁଲାନ୍ସ ପହଞ୍ଚିବାର ବ୍ୟବସ୍ଥା କରିବାକୁ ଗ୍ରାମବାସୀ ଦାବି କରିଛନ୍ତି। ଏବେ ଦେଖିବାର କଥା, ସାଡକଣାବାସୀଙ୍କ ଏହି ଦୀର୍ଘଦିନର ସମସ୍ୟା କେବେ ଦୂର ହେଉଛି।