ବାଣପୁର: ଭାରତବର୍ଷର ଯଶସ୍ବୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୨୫ ବର୍ଷର ନିରନ୍ତର ଜନସେବା, ସମର୍ପଣ ଓ ରାଷ୍ଟ୍ରନିର୍ମାଣର ଗୌରବମୟ ଯାତ୍ରାକୁ ସମ୍ମାନ ଜଣାଇବା ଉଦ୍ଦେଶ୍ୟରେ ଦେଶବ୍ୟାପୀ “ସେବା ସଂକଳ୍ପ ଅଭିଯାନ” ସେପ୍ଟେମ୍ବର ୧୭ ରୁ ଅକ୍ଟୋବର ୧୭ ତାରିଖ ପର୍ଯ୍ୟନ୍ତ ଏକ ମାସ ବ୍ୟାପୀ ପାଳିତ ହେବାକୁ ଯାଉଛି।
ଏହି ଅବସରରେ ଗୁରୁବାର ଦିନ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ନିଜ ଗ୍ରାମ ଗମ୍ଭାରୀମୁଣ୍ଡା ଗୋଡ଼ିଝର ସ୍ଥିତ ଆରାଧ୍ୟ ଦେବତା ପ୍ରଭୁ ଶ୍ରୀ ବାଲୁଙ୍କେଶ୍ୱରଙ୍କ ମନ୍ଦିର ପ୍ରାଙ୍ଗଣରେ ଦଳୀୟ କାର୍ଯ୍ୟକର୍ତ୍ତା, ଶୁଭେଚ୍ଛୁ ଓ ଗ୍ରାମବାସୀଙ୍କ ସହ ଆଶୀର୍ବାଦର ପ୍ରଦୀପ ପ୍ରଜ୍ଜ୍ୱଳନ କରି ପ୍ରଧାନମନ୍ତ୍ରୀ ମୋଦିଙ୍କ ଉତ୍ତମ ସ୍ୱାସ୍ଥ୍ୟ, ଦୀର୍ଘାୟୁ ଓ ସୁସ୍ଥ ଜୀବନ ପାଇଁ ପ୍ରାର୍ଥନା କରିଛନ୍ତି।ସେହିପରି ଚିଲିକା ନିର୍ବାଚନମଣ୍ଡଳୀର ୩୩୨ ବୁଥ୍ରେ ଦଳୀୟ କାର୍ଯ୍ୟକର୍ତ୍ତା ଓ ଶୁଭେଚ୍ଛୁ ଓ ମା’ ମାନେ ଆଶୀର୍ବାଦର ଦୀପ ପ୍ରଜ୍ଜ୍ୱଳନ କରି ପ୍ରଧାନମନ୍ତ୍ରୀଙ୍କୁ ସୁସ୍ଥ ଓ ଦୀର୍ଘାୟୁ ଜୀବନ କାମନା କରିଛନ୍ତି। ରାଷ୍ଟ୍ରସେବାକୁ ଜୀବନର ଏକମାତ୍ର ଧ୍ୟେୟ ଭାବେ ଗ୍ରହଣ କରି ଅର୍ଦ୍ଧଶତାବ୍ଦୀ ଧରି ଅବିରତ ଭାବେ ଜନସେବାରେ ନିଜକୁ ଉତ୍ସର୍ଗ କରିଆସିଥିବା ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଜୀଙ୍କ ସାର୍ବଜନୀନ ଜୀବନ ତ୍ୟାଗ, ତପସ୍ୟା ଓ ରାଷ୍ଟ୍ରନିଷ୍ଠାର ଏକ ଅନନ୍ୟ ଅଧ୍ୟାୟ।
ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ ଭାବେ ୨୫ ବର୍ଷର ତାଙ୍କ ଦୃଢ଼, ଦୂରଦର୍ଶୀ ଓ ନିରନ୍ତର ନେତୃତ୍ୱ ଭାରତର ବିକାଶଯାତ୍ରାକୁ ନୂତନ ଦିଗ ଓ ନୂତନ ଗତି ପ୍ରଦାନ କରିବା ସହ ଆତ୍ମନିର୍ଭର, ସଶକ୍ତ, ବୈଭବଶାଳୀ ଓ ବିକଶିତ ଭାରତ ଗଠନର ସଙ୍କଳ୍ପକୁ ଆହୁରି ସୁଦୃଢ଼ କରିଛି।‘ସେବା ସଂକଳ୍ପ’ ଅଭିଯାନ ଅଧୀନରେ ଚ଼ିଲିକା ନିର୍ବାଚ଼ନ ମଣ୍ଡଳୀରେ ଆଜିଠାରୁ ଏକ ମାସ ବ୍ୟାପୀ ବିଭିନ୍ନ ଜନସେବାମୂଳକ କାର୍ଯ୍ୟକ୍ରମ ଆୟୋଜିତ ହେବ।