ଭୁବନେଶ୍ୱର: ଶ୍ରୀଲିଙ୍ଗରାଜ ମନ୍ଦିରରେ ପୁଣିଥରେ ନୀତିକାନ୍ତି ବିଭ୍ରାଟ ଦେଖାଦେଇଛି। ସେବାୟତଙ୍କ ଅନ୍ତର୍ଦ୍ୱନ୍ଦ୍ୱ ଓ ଆପୋଷ ବିବାଦ କାରଣରୁ ଗତକାଲି ରାତି ୧୧ଟାରୁ ପ୍ରଭୁ ଲିଙ୍ଗରାଜଙ୍କ ସମସ୍ତ ପୂଜାର୍ଚ୍ଚନା ଓ ନୀତି ସମ୍ପୂର୍ଣ୍ଣ ବନ୍ଦ ରହିବା ସହ ଠାକୁର ଉପାସରେ ଅଛନ୍ତି। ବିଶେଷକରି ପୂଜା ପଣ୍ଡା ଓ ସୁଆର ସେବାୟତଙ୍କ ମଧ୍ୟରେ ପୂଜା ବିଧିକୁ ନେଇ ମତାନ୍ତର ସୃଷ୍ଟି ହେବାରୁ ଏହି ଅଚଳାବସ୍ଥା ଉପୁଜିଛି। ପବିତ୍ର ସଂକ୍ରାନ୍ତି ଦିନରେ ଏଭଳି ନୀତି ବିଭ୍ରାଟକୁ ନେଇ ଶ୍ରଦ୍ଧାଳୁମାନେ ତୀବ୍ର କ୍ଷୋଭ ଓ ନିନ୍ଦା ପ୍ରକାଶ କରିଛନ୍ତି। ବିଶେଷ ପର୍ବପର୍ବାଣି ଓ ସ୍ୱତନ୍ତ୍ର ଦିନଗୁଡ଼ିକରେ ସେବାୟତମାନେ ବାରମ୍ବାର ଏପରି ବ୍ୟତିକ୍ରମ ଘଟାଉଥିବାରୁ ଏହାକୁ ଏକ ଅକ୍ଷମଣୀୟ ତ୍ରୁଟି ଭାବେ ଅଭିହିତ କରାଯାଇଛି। ନିଜସ୍ୱ ସ୍ୱାର୍ଥ ଓ ସତ୍ତ୍ୱ ପାଇଁ ବିବାଦ କରି ପ୍ରଭୁଙ୍କୁ ଭୋକ, ଉପାସ ଓ ଅନିଦ୍ରା ରଖିବା ସେବାୟତଙ୍କ ମନୋବୃତ୍ତିକୁ ଅତ୍ୟନ୍ତ ନିନ୍ଦନୀୟ ବୋଲି ଭକ୍ତମାନେ କହିଛନ୍ତି।
