ନୂଆଦିଲ୍ଲୀ: ପୂର୍ବତନ କେନ୍ଦ୍ର ମନ୍ତ୍ରୀ ଏବଂ ଭାରତୀୟ ଜନତା ପାର୍ଟି (ବିଜେପି) ନେତା ରଭନୀତ ସିଂହ ବିଟ୍ଟୁଙ୍କୁ ଆଜି ପଞ୍ଜାବ ପୋଲିସ ଅଟକ ରଖିଛି। ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ଗାଡ଼ି ଉପରକୁ ମଦ ବୋତଲ ଫିଙ୍ଗି ଏବଂ ଅଣ୍ଡା ଏବଂ ଟମାଟୋ ଦେଖାଇ ପ୍ରତିବାଦ କରିବା ପରେ ବିଟ୍ଟୁଙ୍କୁ ଅଟକ ରଖାଯାଇଛି।
ଲୁଧିଆନାର ପଞ୍ଜାବ କୃଷି ବିଶ୍ୱବିଦ୍ୟାଳୟ (ପିଏୟୁ) ବାହାରେ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ କାଫଲା ସେହି ବାଟ ଦେଇ ଯାଉଥିବା ସମୟରେ ଏହି ଘଟଣା ଘଟିଥିଲା। ବିଜେପି ନେତା, ତାଙ୍କ ସମର୍ଥକ ଏବଂ କର୍ମୀମାନଙ୍କ ସହିତ, ବିଶ୍ୱବିଦ୍ୟାଳୟ ଫାଟକ ନିକଟରେ ପୂର୍ବରୁ ଉପସ୍ଥିତ ଥିଲେ ଏବଂ ମୁଖ୍ୟମନ୍ତ୍ରୀ ଯିବା ମାତ୍ରେ ପ୍ରତିବାଦ କରିଥିଲେ।
ଅଟକ ପରେ ବିଜେପି ନେତା କ’ଣ କହିଲେ?
ତାଙ୍କ ଅଟକ ଉପରେ ପ୍ରତିକ୍ରିୟା ପ୍ରକାଶ କରି ବିଜେପି ନେତା ରଭନୀତ ସିଂହ ବିଟ୍ଟୁ କହିଛନ୍ତି ଯେ, ଅଟକ କିମ୍ବା ପୋଲିସ ମାମଲା ରୁଜୁ କରି ଲୋକଙ୍କ ସ୍ୱରକୁ ଦବାଇ ହେବ ନାହିଁ। ଆଜି ପଞ୍ଜାବ ପୋଲିସ ଆମକୁ ଅଟକ ରଖିଛି, କିନ୍ତୁ ଆମର ମନୋବଳ ଉଚ୍ଚ ରହିଛି।
ପୂର୍ବତନ କେନ୍ଦ୍ର ମନ୍ତ୍ରୀ ରଭନୀତ ସିଂହ ବିଟ୍ଟୁ କହିଛନ୍ତି ଯେ, ସେ ଭଗବନ୍ତ ମାନଙ୍କୁ ଏକ ମଦ ବୋତଲ ଫେରାଇ ଦେଉଛନ୍ତି। ସେ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କୁ ତାଙ୍କ ମଦ ଉପଭୋଗ କରିବାକୁ କହିଥିଲେ ଏବଂ ଆମ ଆଦମୀ ପାର୍ଟି (AAP) ନେତା ଅରବିନ୍ଦ କେଜରିୱାଲଙ୍କୁ ଦିଲ୍ଲୀରୁ ପଞ୍ଜାବ ଚୋରି କରିବାକୁ ଅନୁମତି ଦେଇଥିବା ଅଭିଯୋଗ କରିଥିଲେ।
ରଭନୀତ ବିଟ୍ଟୁ ଦାବି କରିଛନ୍ତି ଯେ, ଶୁକ୍ରବାର (ସେପ୍ଟେମ୍ବର ୧୮) ପଠାନକୋଟର ମାଧୋପୁରରେ ବିଜେପିର ନିଶା ମୁକ୍ତ ପଞ୍ଜାବ ଯାତ୍ରାର ଶୁଭାରମ୍ଭରେ ଯୋଗ ଦେବାକୁ ଯାଉଥିବା ସମୟରେ ବାଟଲା ନିକଟରେ ତାଙ୍କ କାଫଲା ଉପରେ ଅଣ୍ଡା ଏବଂ ଟମାଟୋ ଫିଙ୍ଗାଯାଇଥିଲା। ସେ ଅଭିଯୋଗ କରିଛନ୍ତି ଯେ, ଆମ ଆଦମୀ ପାର୍ଟି ସମର୍ଥକମାନେ ତାଙ୍କ କାଫଲା ଉପରେ ଆକ୍ରମଣ କରିଥିଲେ ଏବଂ ଗାଡ଼ିଗୁଡ଼ିକୁ କ୍ଷତି ପହଞ୍ଚାଇଥିଲେ। ତଥାପି, ଆପ ଏହି ସମସ୍ତ ଅଭିଯୋଗକୁ ଖଣ୍ଡନ କରିଛି।