ସମ୍ବଲପୁର: କଫ ସିରଫ ଚାଲାଣ ବେଳେ ପୋଲିସ ଓ ବେପାରୀଙ୍କ ମଧ୍ୟରେ ଗୁଳିବିନିମୟ। ସମ୍ବଲପୁର ଜିଲ୍ଲା ରେଙ୍ଗାଲିର ଜଙ୍ଗଲା-ପାଣ୍ଡଲୋଇ ରାସ୍ତାରେ ପୋଲିସର ଏନକାଉଣ୍ଟରରେ କଫ ସିରଫ ବେପାରୀ ପ୍ରୀତମ ବିଶ୍ୱାଳ ଆହତ ହୋଇଛନ୍ତି। ଆହତ ପ୍ରୀତମଙ୍କୁ ଚିକିତ୍ସା ପାଇଁ ହସ୍ପିଟାଲ ପଠାଯାଇଥିବା ସୂଚନା ମିଳିଛି।
ସୂଚନା ଅନୁସାରେ, ୨ଟି କାରରେ କଫ ସିରଫ ଚାଲାଣ ହେଉଥିବା ବେଳେ ପୋଲିସ ଯାଞ୍ଚ କରିଥିଲା। ଏହି ସମୟରେ ଗାଡ଼ି ଚାଳକ ଓ ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା। ପ୍ରଥମ କାରର ଡ୍ରାଇଭରକୁ ପୋଲିସ ଅଟକ ରଖିଥିବା ବେଳେ ଅନ୍ୟ ଜଣେ ଫେରାର ହୋଇଯାଇଛନ୍ତି। ଗୋଟିଏ ଦେଶୀ ବନ୍ଧୁକ ସହ ବିପୁଳ କଫ ସିରଫ ଜବତ ।
ଅନ୍ୟପଟେ, ନମ୍ବର ବିହୀନ ଦ୍ୱିତୀୟ କାରଟି ରାସ୍ତାକଡ଼ରେ ଥିବା ଗଛରେ ପିଟି ହୋଇଥିଲା। ପୋଲିସ ନିକଟକୁ ଗାଡ଼ି ଚାଳକ ଗୁଳିମାଡ଼ କରିଥିବା ଅଭିଯୋଗ ହୋଇଛି। ଆତ୍ମରକ୍ଷା ପାଇଁ ପୋଲିସ ପାଲଟା ଗୁଳି ଚଳାଇଥିବା ବେଳେ ପ୍ରୀତମ ବିଶ୍ୱାଳ ଆହତ ହୋଇଛନ୍ତି। ଘଟଣାକୁ ନେଇ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି।