ପୁରୀ: ଶ୍ରୀକ୍ଷେତ୍ରରେ ଆଜିଠାରୁ ଶାରଦୀୟ ପାର୍ବଣର ପବିତ୍ର ଷୋଳପୂଜା (ଷୋଡ଼ଶ ଦିନାତ୍ମକ ପୂଜା) ଆରମ୍ଭ ହେବ। ପ୍ରସିଦ୍ଧ ଶ୍ରୀମନ୍ଦିର ପରିସରରେ ଶାରଦୀୟ ନବରାତ୍ରି ଅବସରରେ ପାଳିତ ହେଉଥିବା ଏହି ସ୍ୱତନ୍ତ୍ର ନୀତିକାନ୍ତି ଆଶ୍ୱିନ ମାସ କୃଷ୍ଣପକ୍ଷ ଅଷ୍ଟମୀ ତିଥିରୁ ଆରମ୍ଭ ହୋଇ ଆଶ୍ୱିନ ଶୁକ୍ଳପକ୍ଷ ନବମୀ ତିଥି ପର୍ଯ୍ୟନ୍ତ ମୋଟ ୧୬ ଦିନ ଧରି ଚାଲିବ। ଏହି ୧୬ ଦିନବ୍ୟାପୀ ପୂଜା ମାଧ୍ୟମରେ ମା’ ବିମଳାଙ୍କ ପୀଠରେ ସ୍ୱତନ୍ତ୍ର ନୀତିକାନ୍ତି, ଗୁପ୍ତ ଗୁଣ୍ଡିଚା ଯାତ୍ରା ଏବଂ ଚଣ୍ଡୀପାଠ ଆଦି ବିଧିବଦ୍ଧ ଭାବେ ସମ୍ପାଦିତ ହେବ। ଏହି ୧୬ ଦିନ ମଧ୍ୟରେ ମା’ ବିମଳାଙ୍କୁ ଭିନ୍ନ ଭିନ୍ନ ସୁନା ବେଶ ଓ ଦେବୀ ରୂପରେ ସଜ୍ଜିତ କରାଯାଏ। ଏହି ପବିତ୍ର ଶାରଦୀୟ ଷୋଳପୂଜା ପାଇଁ ଶ୍ରୀମନ୍ଦିର ପ୍ରଶାସନ ଓ ସେବାୟତମାନଙ୍କ ପକ୍ଷରୁ ସମସ୍ତ ନୀତିକାନ୍ତି ସୁଚାରୁରୂପେ ପରିଚାଳନା କରିବା ପାଇଁ ସ୍ୱତନ୍ତ୍ର ପ୍ରସ୍ତୁତି କରାଯାଇଛି।
