ନୂଆଦିଲ୍ଲୀ: ମହଙ୍ଗା ମାଡ଼ରୁ ମିଳୁନି ନିସ୍ତାର। ଘରର ରୋଷେଇ ଘରଠାରୁ ଆରମ୍ଭ କରି ହୋଟେଲ ଓ ରେଷ୍ଟୁରାଣ୍ଟର ଡାଇନିଂ ଟେବୁଲ୍ ପର୍ଯ୍ୟନ୍ତ ଏବେ ଦରବୃଦ୍ଧିର ପ୍ରଭାବ। ଯଦି ଆପଣ ସାଙ୍ଗସାଥୀଙ୍କ ସହ କଫି ପିଇବାକୁ କାଫେ ଯାଉଛନ୍ତି କିମ୍ବା ରେଷ୍ଟୁରାଣ୍ଟରେ ଦୋସା, ଇଡଲି ଓ ଅନ୍ୟାନ୍ୟ ଖାଦ୍ୟ ଖାଇବାକୁ ପସନ୍ଦ କରୁଛନ୍ତି, ତେବେ ଏବେ ଅଧିକ ଟଙ୍କା ଗଣିବାକୁ ପଡ଼ିପାରେ। କ୍ଷୀର, ଘିଅ, ବଟର, ପନିପରିବା, ଚାଉଳ, ଡାଲି ସହ ଗ୍ୟାସ୍ ଓ ଇନ୍ଧନ ଖର୍ଚ୍ଚ ବଢ଼ିବା ଯୋଗୁଁ ଦେଶର ଅନେକ ରେଷ୍ଟୁରାଣ୍ଟ ମେନୁ ଦରରେ ୫ରୁ ୧୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିବା ଆରମ୍ଭ କରିଛନ୍ତି। ଏହାର ସିଧାସଳଖ ପ୍ରଭାବ ପଡ଼ିବ ଗ୍ରାହକଙ୍କ ପକେଟ୍ ଉପରେ।
ଦୋସାଠୁ କଫି, ସବୁ ମହଙ୍ଗା; ରେଷ୍ଟୁରାଣ୍ଟ ମେନୁରେ ନୂଆ ଦର
ବାହାରେ ଖାଇବା ଏବେ ଆଉ ଶସ୍ତା ରହିବ ନାହିଁ। ରେଷ୍ଟୁରାଣ୍ଟ ପରିଚାଳକଙ୍କ କହିବା ଅନୁଯାୟୀ, ଖାଦ୍ୟ ପ୍ରସ୍ତୁତିରେ ବ୍ୟବହୃତ ଅଧିକାଂଶ ସାମଗ୍ରୀର ଦର ବଢ଼ିଛି। ଏହା ସହିତ ରୋଷେଇ ଗ୍ୟାସ୍, ବିଦ୍ୟୁତ୍, ଇନ୍ଧନ ଓ କର୍ମଚାରୀଙ୍କ ଖର୍ଚ୍ଚ ମଧ୍ୟ ବଢ଼ିବାରେ ଲାଗିଛି।
ଏଭଳି ସ୍ଥିତିରେ ପୁରୁଣା ଦରରେ ଖାଦ୍ୟ ବିକ୍ରି କରିବା ରେଷ୍ଟୁରାଣ୍ଟ ମାଲିକଙ୍କ ପାଇଁ କଷ୍ଟକର ହୋଇପଡ଼ିଛି। ଫଳରେ ଅନେକ ପ୍ରତିଷ୍ଠାନ ମେନୁ ଦର ବଢ଼ାଇଛନ୍ତି। ବିଶେଷକରି ଦକ୍ଷିଣ ଭାରତୀୟ ଖାଦ୍ୟ, କଫି, ଦୁଗ୍ଧଜାତ ପାନୀୟ ଓ ବିଭିନ୍ନ ମିଲ୍ ଉପରେ ଏହାର ପ୍ରଭାବ ଦେଖିବାକୁ ମିଳୁଛି।
ଘିଅ ଓ ବଟର ମହଙ୍ଗା, ଦୋସା ପ୍ରେମୀଙ୍କୁ ଝଟକା
ଦକ୍ଷିଣ ଭାରତୀୟ ଖାଦ୍ୟରେ ଘିଅ ଓ ବଟରର ବ୍ୟବହାର ଅଧିକ। ତେଣୁ ଏହି ଦୁଇ ସାମଗ୍ରୀର ଦରବୃଦ୍ଧି ଦୋସା, ବଟର ଦୋସା, ଘିଅ ଦୋସା ଓ ଅନ୍ୟାନ୍ୟ ଖାଦ୍ୟର ମୂଲ୍ୟକୁ ପ୍ରଭାବିତ କରିଛି। ଏହାର ପ୍ରଭାବ କେବଳ ଦୋସାରେ ସୀମିତ ନାହିଁ। କଫି, ଭାତ ଜାତୀୟ ଖାଦ୍ୟ ଓ ମଧ୍ୟାହ୍ନ ଭୋଜନ ମେନୁର ମୂଲ୍ୟ ଉପରେ ମଧ୍ୟ ଚାପ ପଡ଼ିଛି।
ରେଷ୍ଟୁରାଣ୍ଟ ବ୍ୟବସାୟୀଙ୍କ ମତରେ, ଗତ ୬ରୁ ୮ ମାସ ମଧ୍ୟରେ ଖାଦ୍ୟ ସାମଗ୍ରୀ ଓ ଅନ୍ୟାନ୍ୟ ଆବଶ୍ୟକ ଜିନିଷର ମୂଲ୍ୟ ପ୍ରାୟ ୧୫ରୁ ୨୦ ପ୍ରତିଶତ ବଢ଼ିଛି। କ୍ଷୀର, ପନିର, ଘିଅ, ବଟର ଓ ଅନ୍ୟାନ୍ୟ ଦୁଗ୍ଧଜାତ ଦ୍ରବ୍ୟର ଦର ବୃଦ୍ଧି ଏହି ଖର୍ଚ୍ଚକୁ ଆହୁରି ବଢ଼ାଇଛି।
ରେଷ୍ଟୁରାଣ୍ଟର ଖର୍ଚ୍ଚ ବଢ଼ିବା ପଛରେ କେବଳ ଦୁଗ୍ଧଜାତ ସାମଗ୍ରୀ ଦାୟୀ ନୁହେଁ। ଚାଉଳ, ଡାଲି, ଚିନି, ଖାଇବା ତେଲ ଓ ପନିପରିବାର ଦର ମଧ୍ୟ ବଢ଼ିଛି। ଏହାର ଅର୍ଥ, ଆପଣ ଯେଉଁ ଖାଦ୍ୟ ପାଇଁ ପୂର୍ବରୁ ୧୦୦ ଟଙ୍କା ଦେଉଥିଲେ, ସେହି ଖାଦ୍ୟ ପାଇଁ ଏବେ ୧୦୫ରୁ ୧୧୦ ଟଙ୍କା ଦେବାକୁ ପଡ଼ିପାରେ। ନିୟମିତ ରେଷ୍ଟୁରାଣ୍ଟ ଯାଉଥିବା ଲୋକଙ୍କ ମାସିକ ଖର୍ଚ୍ଚ ଏହାଦ୍ୱାରା ବଢ଼ିବା ନିଶ୍ଚିତ।
କ୍ଷୀର ଦର ବୃଦ୍ଧି ଯୋଗୁଁ କଫି ଓ ଚା’ ମଧ୍ୟ ମହଙ୍ଗା
ରେଷ୍ଟୁରାଣ୍ଟ ଶିଳ୍ପ ପାଇଁ କ୍ଷୀର ଏକ ଅତ୍ୟାବଶ୍ୟକ ସାମଗ୍ରୀ। ଚା’, କଫି, ମିଠା, ପନିର ଓ ବିଭିନ୍ନ ଦୁଗ୍ଧଜାତ ଖାଦ୍ୟ ପ୍ରସ୍ତୁତିରେ ଏହାର ବ୍ୟବହାର ହୋଇଥାଏ। ତେଣୁ କ୍ଷୀର ଦର ବଢ଼ିବାର ପ୍ରଭାବ ସିଧାସଳଖ ଭାବେ ହୋଟେଲ ଓ ରେଷ୍ଟୁରାଣ୍ଟ ଖର୍ଚ୍ଚ ଉପରେ ପଡ଼ୁଛି।
ନଭେମ୍ବର ୧୨ରୁ ଅମୂଲ କ୍ଷୀରର ଦର ଲିଟର ପିଛା ୨ରୁ ୪ ଟଙ୍କା ବଢ଼ାଇଛି। ମଦର ଡେରୀ ମଧ୍ୟ ଦିଲ୍ଲୀ-ଏନସିଆରରେ ଲିଟର ପିଛା ୨ରୁ ୪ ଟଙ୍କା ଦର ବୃଦ୍ଧି କରିଛି। ଅନ୍ୟପଟେ କର୍ଣ୍ଣାଟକରେ ନନ୍ଦିନୀ କ୍ଷୀର ଦର ଲିଟର ପିଛା ୮ ଟଙ୍କା ବଢ଼ିଥିବା ସୂଚନା ରହିଛି। ଏହି ଦରବୃଦ୍ଧି ଯୋଗୁଁ କଫି, ଚା’, ମିଠା ଓ ଅନ୍ୟାନ୍ୟ ଖାଦ୍ୟର ଉତ୍ପାଦନ ଖର୍ଚ୍ଚ ମଧ୍ୟ ବଢ଼ିବାର ଆଶଙ୍କା ରହିଛି।
ମେନୁ ଛୋଟ କରୁଛନ୍ତି ରେଷ୍ଟୁରାଣ୍ଟ ମାଲିକ, ଗ୍ରାହକଙ୍କ ବଜେଟ୍ ଉପରେ ଚାପ
ବଢ଼ୁଥିବା ଖର୍ଚ୍ଚ ଓ ଗ୍ରାହକଙ୍କ କ୍ରୟ କ୍ଷମତା ମଧ୍ୟରେ ସନ୍ତୁଳନ ରଖିବା ଏବେ ରେଷ୍ଟୁରାଣ୍ଟ ମାଲିକଙ୍କ ପାଇଁ ବଡ଼ ଚ୍ୟାଲେଞ୍ଜ ପାଲଟିଛି। ଦର ବଢ଼ାଇଲେ ଗ୍ରାହକ କମିବାର ଆଶଙ୍କା ରହୁଛି। ଅନ୍ୟପଟେ ଦର ନବଢ଼ାଇଲେ ବ୍ୟବସାୟର ଲାଭ କମିଯାଉଛି। ଏହି ସ୍ଥିତିରେ କିଛି ରେଷ୍ଟୁରାଣ୍ଟ ମେନୁରେ ଖାଦ୍ୟ ସଂଖ୍ୟା କମାଉଥିବାବେଳେ ଆଉ କିଛି ପରିବେଷଣର ପରିମାଣରେ ପରିବର୍ତ୍ତନ କରୁଛନ୍ତି।
ବଡ଼ ପରିମାଣରେ ସାମଗ୍ରୀ କିଣିବା, ଅନାବଶ୍ୟକ ଖର୍ଚ୍ଚ କାଟିବା ଭଳି ପଦକ୍ଷେପ ମଧ୍ୟ ନିଆଯାଉଛି। ତଥାପି ଖାଦ୍ୟ ଓ ଇନ୍ଧନ ଦର ଉଚ୍ଚା ରହିଲେ ଆଗାମୀ ଦିନରେ ବାହାରେ ଖାଇବା ଗ୍ରାହକଙ୍କ ପାଇଁ ଆହୁରି ମହଙ୍ଗା ହୋଇପାରେ। ସାରକଥା ହେଉଛି, ଏବେ କେବଳ ଘରର ବଜେଟ୍ ନୁହେଁ, ବାହାରେ ଖାଇବାର ବଜେଟ୍ ମଧ୍ୟ ନୂଆ କରି ହିସାବ କରିବାକୁ ପଡ଼ିବ।