ନୂଆଦିଲ୍ଲୀ : ଦିଲ୍ଲୀ ହିଂସାକାଣ୍ଡ ମାମଲାରେ ଭାରତୀୟ ଜନତା ପାର୍ଟିର ସାଂସଦ ଗୌତମ ଗମ୍ଭୀର ବୟାନ ଦେଇ ହିଂସାକାଣ୍ଡ ପାଇଁ ଯିଏ ଦାୟୀ ତା’ ଉପରେ କାର୍ଯ୍ୟାନୁଷ୍ଠାନ କରିବାକୁ ଦାବି କରିଛନ୍ତି । ଗୌତମ ଗମ୍ଭୀର କହିଛନ୍ତି ଯେ, ଯିଏ ବି ଉତ୍ତେଜିତ ଭାଷଣ ଦେବ, ତା’ ଉପରେ କାର୍ଯ୍ୟାନୁଷ୍ଠାନ କରାଯିବ । କିଏ ଦେଇଛି, କେଉଁ ଦଳ ସହିତ ତା’ର ସମ୍ପର୍କ ରହିଛି ଏନେଇ କିଛି ପ୍ରଭାବ ପଡିବ ନାହିଁ ବୋଲି କହିଛନ୍ତି ଗୌତମ ଗମ୍ଭୀର ।
ପୂର୍ବ ଦିଲ୍ଲୀର ସାଂସଦ ଗୌତମ ଗମ୍ଭୀର ଆଜି ମୌଜପୁର ହିଂସାକାଣ୍ଡରେ ଆହତ ହୋଇଥିବା ଡିସିପି ଅମିତ ଶର୍ମାଙ୍କୁ ସାକ୍ଷାତ କରିଛନ୍ତି । ପଟପଡଗଞ୍ଜ ମ୍ୟାକ୍ସ ହସ୍ପିଟାଲ୍ରେ ପହଞ୍ଚି ତାଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚାରିଥିଲେ । ଦୁଇଦିନ ଧରି ଦିଲ୍ଲୀରେ ଚାଲିଥିବା ହିଂସାକୁ ନେଇ ବିଜେପି ସାଂସଦ ଗୌତମ ଗମ୍ଭୀର କହିଛନ୍ତି ଯେ, ଉତ୍ତର ପୂର୍ବ ଦିଲ୍ଲୀରେ ହେଉଥିବା ହିଂସାକାଣ୍ଡରେ ଯେଉଁମାନେ ସାମିଲ୍ ରହିଛନ୍ତି, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ସେ ଯେକୌଣସି ଦଳର ହୋଇଥାନ୍ତୁ ନା କାହିଁକି ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ । ଯଦି ଏହି କାଣ୍ଡରେ କପିଲ୍ ମିଶ୍ରାଙ୍କ ହାତ ରହିଥିବ, ତେବେ ତାଙ୍କ ବିରୋଧରେ ମଧ୍ୟ ମାମଲା ଦାଏର କରାଯିବ ।
ସୂଚନାଯୋଗ୍ୟ, ଜାନୁଆରୀ 22 ତାରିଖରେ ଶାହିନବାଗ୍ ପରେ ଜାଫରବାଦ ଓ ଚାନ୍ଦ ବାଗ୍ରେ ରାସ୍ତା ବନ୍ଦକୁ ନେଇ କପିଲ ମିଶ୍ରା ଧମକ ଦେଇ କହିଥିଲେ ଯେ, ଦିଲ୍ଲୀ ପୁଲିସ୍ ତିନି ଦିନ ଭିତରେ ରାସ୍ତାକୁ ଖାଲି କରାନ୍ତୁ । ଯଦି ତିନି ଦିନ ଭିତରେ ରାସ୍ତା ଖାଲି ନ ହେବ, ତେବେ ଆମେ ରାସ୍ତାକୁ ଓହ୍ଲାଇବୁ ଓ ପୁଲିସ୍ର କଥା ମଧ୍ୟ ଶୁଣିବୁ ନାହିଁ ବୋଲି କହିଥିଲେ । କପିଲ ମିଶ୍ରାଙ୍କ ଏହି ବୟାନ ପରେ ହିଂସା ଆରମ୍ଭ ହୋଇଥିଲା ।
