ନୂଆଦିଲ୍ଲୀ : ଉତ୍ତରପୂର୍ବ ଦିଲ୍ଲୀରେ ହୋଇଥିବା ହିଂସାକାଣ୍ଡରେ ମୃତକଙ୍କ ସଂଖ୍ୟା 34କୁ ବୃଦ୍ଧି ପାଇଛି । ଆଜି ସକାଳ ପର୍ଯ୍ୟନ୍ତ ମୃତକଙ୍କ ସଂଖ୍ୟା 27 ରହିଥିବାବେଳେ ହିଂସାରେ ଗମ୍ଭୀର ରୂପେ ଆହତ ହୋଇଥିବା ଆଉ ସାତଜଣକଙ୍କ ମୃତ୍ୟୁଘଟିଛି । ଏହି ହିଂସାରେ 50ରୁ ଅଧିକ ପୋଲିସ୍ କର୍ମୀଙ୍କ ସମେତ ପ୍ରାୟ 200 ଲୋକ ଆହତ ହୋଇଛନ୍ତି ।
ମଙ୍ଗଳବାର ଦିନ ଉତ୍ତରପୂର୍ବ ଦିଲ୍ଲୀର ଚାନ୍ଦବାଗ୍, ଭଜନାପୁରା, ଗୋକଲପୁରୀ, ମୌଜପୁର, କର୍ଦ୍ଦମପୁରୀ ଓ ଜାଫରବାଦରେ ଭୀଷଣ ହିଂସା ହୋଇଥିଲା । ପୂର୍ବରୁ ରବିବାର ଓ ସୋମବାର ଦିନ ମଧ୍ୟ ଏହି ଅଞ୍ଚଳଗୁଡିକରେ ପ୍ରବଳ ହିଂସା ଅନୁଭୂତ ହୋଇଥିଲା । ପଥର, ଗୁଳି ଓ ଅନ୍ୟ ହତିଆର ଜରିଆରେ ଲୋକମାନେ ଆହତ ହୋଇଥିବାର ସୂଚନା ରହିଛି । ହିଂସା ମାମଲାରେ ପୋଲିସ୍ ଏପର୍ଯ୍ୟନ୍ତ 18ଟି ଏଫଆଇଆର୍ ଭିନ୍ନ ଭିନ୍ନ ଥାନାରେ ରୁଜୁ କରିଛି। ହିଂସା ଘଟଣାରେ 106ଜଣକୁ ଗିରଫ କରାଯାଇଛି । ସିସିଟିଭି କ୍ୟାମେରା ଜରିଆରେ ଚିହ୍ନିତ କରାଯାଇ ଅଭିଯୁକ୍ତଙ୍କୁ ଧରିବା ଲାଗି ଚେଷ୍ଟା ଜାରି ରହିଛି ।
ହିଂସା ଉପରେ ଅଙ୍କୁଶ ଲଗାଇବା ପାଇଁ ଉତ୍ତର ପୂର୍ବ ଦିଲ୍ଲୀରେ ବଡ ସଂଖ୍ୟାରେ ସୁରକ୍ଷା ବଳକୁ ନିୟୋଜିତ କରାଯାଇଛି । ରାଜଧାନୀରେ ସ୍ଥିତି ନିୟନ୍ତ୍ରିତ କରିବା ପାଇଁ ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍ଙ୍କୁ ଦାୟିତ୍ବ ଦିଆଯାଇଛି ।