ନୂଆଦିଲ୍ଲୀ : ମଧ୍ୟପ୍ରଦେଶରେ ଗତ ଦୁଇ ଦିନ ହେବ ରାଜନୈତିକ ଅସ୍ଥିରତା ବଢି ଚାଲିଛି । ଏବେ କଂଗ୍ରେସ ଭାରତୀୟ ଦଳକୁ ଏନେଇ ଟାର୍ଗେଟ କରିଛି । ଗୁରୁବାର ସଂସଦ ପରିସରରେ ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା ଗୁଲାମ ନବୀ ଆଜାଦ କହିଛନ୍ତି ଯେ, ବିଜେପି ଦେଶର ଭିନ୍ନ ଭିନ୍ନ ଅଂଶରେ ଲୋକତନ୍ତ୍ରକୁ ଶେଷ କରିବାର କାର୍ଯ୍ୟ କରୁଛି । ଗତ କିଛି ଦିନ ମଧ୍ୟରେ ମଧ୍ୟପ୍ରଦେଶ-ରାଜସ୍ଥାନରେ ଏହାର ଉଦାହରଣ ଦେଖିବାକୁ ମିଳିଛି ।
ଗୁଲାମ ନବୀ ଆଜାଦ କହିଛନ୍ତି ଯେ, ରାଜ୍ୟସଭା ନିର୍ବାଚନ ପାଖେଇ ଆସିଲାଣି । ଏଥିପାଇଁ ବିଜେପି ଏହିପରି କାମ କରୁଛି । ଯେବେଠାରୁ ବିଜେପି କ୍ଷମତାକୁ ଆସିଛି, ଏହିପରି କାର୍ଯ୍ୟ କରୁଛି ।
କଂଗ୍ରେସ ନେତା ବିଜେପିକୁ ଟାର୍ଗେଟ କରି କହିଛନ୍ତି ଯେ, ଅରୁଣାଚଳ ପ୍ରଦେଶରେ କଂଗ୍ରେସ ସରକାରକୁ ହଟାଇ ଦିଆଗଲା । ରାଜ୍ୟପାଳଙ୍କ ଶକ୍ତିକୁ ଅପବ୍ୟବହାର କରାଗଲା । ସେହିପରି ମଣିପୁର ଓ ଗୋଆରେ ମଧ୍ୟ ସେହିପରି କରାଗଲା ।
ବିଜେପି ଉପରେ ଅଭିଯୋଗ ଲଗାଇ କଂଗ୍ରେସ ନେତା କହିଛନ୍ତି ଯେ, ବିଜେପିର ନୀତି ହେଉଛି ଯେ, ସେ ରାଜ୍ୟରେ ଅନ୍ୟ ଦଳର ସରକାର ଗଢିବାକୁ ଦେଉ ନାହିଁ । ମଧ୍ୟପ୍ରଦେଶ ଓ ରାଜସ୍ଥାନରେ ଯେବେଠାରୁ କଂଗ୍ରେସର ସରକାର ହୋଇଛି, ସେବେଠାରୁ ବିଜେପି ସେଠାରେ ରାଜନୈତିକ ଅସ୍ଥିର ସୃଷ୍ଟି କରୁଛି । ରାଜ୍ୟସଭାରେ ବିରୋଧୀ ସାଂସଦକୁ ଡରାଇବା ସହିତ ଜାତୀୟ ଏଜେନ୍ସିଗୁଡିକର ମଧ୍ୟ ଅପବ୍ୟବହାର କରାଯାଉଛି । ମଧ୍ୟପ୍ରଦେଶରେ ବିଧାୟକଙ୍କୁ ବିଜେପି କିଣିବାର ଯୋଜନା ପ୍ରସ୍ତୁତ କରୁଛି ବୋଲି କହିଛନ୍ତି କଂଗ୍ରେସ ନେତା । ସୂଚନାଯୋଗ୍ୟ, ମଧ୍ୟପ୍ରଦେଶରେ କଂଗ୍ରେସ ଦଳ ଭାରତୀୟ ଜନତା ଦଳ ଉପରେ ବିଧାୟକ କିଣିବାର ଅଭିଯୋଗ ଲଗାଇଛି ।