ସମୀକ୍ଷା ବ୍ୟୁରୋ
ବାଣପୁର: ବିଶ୍ଵବ୍ୟାପୀ ମହାମାରୀ କରୋନା ପ୍ରଭାବରୁ ବାଦ ପଡ଼ିନାହିଁ ଖୋର୍ଦ୍ଧା ଜିଲ୍ଲାର ବାଣପୁର ସହର। ଦିନକୁ ଦିନ କରୋନାର ପ୍ରଭାବ ବୃଦ୍ଧିପାଉଥିବା ବେଳେ ବାଣପୁର ସହରରେ ଦେଖାଦେଇଛି ମାସ୍କର ଅଭାବ। ଡାକ୍ତରଖାନାରେ ମାସ୍କ ମିଳୁନଥିବା ବେଳେ ବଜାରରେ ଚଢାଦରରେ ବିକ୍ରି ହେଉଛି ମାସ୍କ, ଯାହାକୁ ସାଧାରଣ ଲୋକମାନେ କିଣିବାକୁ ଅସମର୍ଥ ପ୍ରକାଶ କରୁଛନ୍ତି। ଏପରି ସମୟରେ ଜନସାଧାରଣଙ୍କୁ ସମ୍ପୂର୍ଣ୍ଣ ନିଃଶୁଳ୍କ ଭାବେ ମାସ୍କ ଯୋଗାଇଦେବାକୁ ଅଣ୍ଟା ଭିଡିଛି ବାଣପୁର ସହରର ଅଗ୍ରଣୀ ମହିଳା ସିଲେଇ ତାଲିମ ଅନୁଷ୍ଠାନ ଦୀପକ ଫ୍ୟାସନ ଡ଼ିଜାଇନିଂ ସେଣ୍ଟର ଓ ଏବିଭିପି।
ବିଗତ ତିନି ଦିନ ହେଲା ଦିନରାତି ଏକ କରି ବହୁତ ପରିଶ୍ରମ କରି ଏହି ଅନୁଷ୍ଠାନର ଛାତ୍ରୀମାନେ ତିଆରି କରିଛନ୍ତି ପାଖାପାଖି ପନ୍ଦର ସହ ମାସ୍କ। ଆଜି ସକାଳେ ସରକାରୀ କଟକଣାକୁ ଆଖିରେ ରଖି ଦୀପକ ଫ୍ୟାସନ ଡିଜାଇନ ଓ ଏବିଭିପିର କିଛି କାର୍ଯ୍ୟକର୍ତ୍ତାଙ୍କ ସହଯୋଗରେ ବାଣପୁରର ବିଭିନ୍ନ ଅଞ୍ଚଳ ଯଥା ଲଡ଼ୁକେଶ୍ୱର ଵୃଦ୍ଧାଶ୍ରମ, ଶନି ମନ୍ଦିର, ପୋଲିସ ଷ୍ଟେସନ, ମେଡିକାଲ, କୁମାରାଙ୍ଗ ଛକ, ପଲଟନ ପଡିଆ, କଲେଜ ଛକ, ରଘୁନାଥ ସାହି ଆଦି ପ୍ରମୁଖ ଜାଗାରେ ଏହି ମାଗଣା ମାସ୍କ ବିତରଣ କରାଯାଇ କରୋନାର ପ୍ରତିକାର ପାଇଁ ବିଭିନ୍ନ ଉପାୟ ଅବଲମ୍ବନ ପାଇଁ ଜନସାଧାରଣଙ୍କୁ ସଚେତନ କରାଯାଇଥିଲା।
ସେହିପରି ଏବିଭିପି ତରଫରୁ ଜନସାଧାରଣଙ୍କୁ ଆସନ୍ତାକାଲି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନରେ ପାଳନ ହେବାକୁ ଥିବା ‘ଜନତା କର୍ଫ୍ୟୁ’କୁ ସମର୍ଥନ କରିବାପାଇଁ ସଚେତନ କରାଯାଇଛି। ଆସନ୍ତାକାଲି ସକାଳ ୭ ରୁ ରାତି ୯ ଟା ଯାଏଁ ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଇଥିଲା। ମହିଳା ଟେଲରିଂ ଅନୁଷ୍ଠାନର ନିର୍ଦେଶକ ଦୀପକ ପରିଡ଼ା, ଏବିଭିପି ଖୋର୍ଦ୍ଧା ଜିଲ୍ଲା ସହ ପ୍ରମୁଖ ସୀତାରାମ ଅଗ୍ରଓ୍ବାଲ ଓ ଏବିଭିପି ବାଣପୁର-ବାଲୁଗାଁ ନଗର ସମ୍ପାଦକ ବିକାଶ ସେଠୀଙ୍କ ମିଳିତ ପ୍ରୟାସରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
ଏହି କାର୍ଯ୍ୟକ୍ରମରେ ଟେଲରିଂ ଅନୁଷ୍ଠାନର ଛାତ୍ରୀମାନେ ଯଥା ପ୍ରଭାତୀ, ତପସ୍ୱିନୀ, ପ୍ରତିମା, ପ୍ରିୟଙ୍କା, ଦେବିକା,ଅନିତା, ସୁନିତା ଓ ଏବିଭିପି ର କାର୍ଯ୍ୟକର୍ତା ଯଥା ବିବେକ, ଅମୀୟ, ଅଜୟ, ସିଦ୍ଧାର୍ଥ, ରାଜେଶ, ସୁଜିତ, ବିକ୍ରମ, ଦୀପକ, ସୋମନାଥ, ରାକେଶ, ମନୋଜ ଆଦି ସହଯୋଗ କରିଥିଲେ। ଏହି ମହତ କାର୍ଯ୍ୟକ୍ରମ ପାଇଁ ସାରା ବାଣପୁର ଅଞ୍ଚଳବାସୀ ଉକ୍ତ ଅନୁଷ୍ଠାନ ଓ ଏବିଭିପିକୁ କୃତଜ୍ଞତା ଜ୍ଞାପନ କରିଛନ୍ତି।
