ନୂଆଦିଲ୍ଲୀ : ଦେଶରେ କରୋନା ସଂକଟକୁ ନେଇ ପ୍ରଧାନମନ୍ତ୍ରୀ ପୁଣିଥରେ ଦେଶବାସୀଙ୍କୁ ସମ୍ବୋଧନ କରିଛନ୍ତି । ଦେଶରେ ଜାରି ରହିଥିବା କରୋନା ସ୍ଥିତିକୁ ଦେଖି ଲକ୍ ଡାଉନ୍ର ଅବଧିକୁ ପ୍ରଧାନମନ୍ତ୍ରୀ ଆଜି ବଢାଇଛନ୍ତି । ମେ 3 ପର୍ଯ୍ୟନ୍ତ ଦେଶରେ ଲକ୍ ଡାଉନ୍ର ଅବଧିକୁ ବୃଦ୍ଧି ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିଛନ୍ତି । କରୋନା ଲଢେଇ ପାଇଁ ଜାରି ରହିଥିବା 21 ଦିନିଆ ଲକ୍ ଡାଉନ୍ର ଆଜି ଶେଷ ଦିନ ରହିଥିଲା । ପୂର୍ବରୁ ମାର୍ଚ୍ଚ 24 ତାରିଖରୁ ଏପ୍ରିଲ୍ 14 ପର୍ଯ୍ୟନ୍ତ ଲକ୍ ଡାଉନ୍ର ଘୋଷଣା କରାଯାଇଥିଲା ।
ଆସନ୍ତାକାଲି ଦ୍ବିତୀୟ ଥର ଲକ୍ ଡାଉନ୍ ନେଇ ବିସ୍ତୃତ ଗାଇଡ୍ ଲାଇଜ ଜାରି ହେବ ବୋଲି ସୂଚନା ଦେଇଛନ୍ତି ପ୍ରଧାନମନ୍ତ୍ରୀ । ଏହି ଗାଇଡ୍ ଲାଇନ ଜରିଆରେ ଅତ୍ୟାବଶ୍ୟକ ଜିନିଷ ପାଇଁ କିଛି କୋହଳ କରାଯିବ । ଅତ୍ୟାବଶ୍ୟକ ସେବା ଓ ଚାଷୀମାନଙ୍କ ଜୀବିକାକୁ ଦୃଷ୍ଟିରେ ରଖି କିଛି କୋହଳ କରାଯିବ ।
ଦେଶରେ ଦ୍ବିତୀୟ ଥର ପାଇଁ ଜାରି କରାଯାଉଥିବା ଲକ୍ ଡାଉନ୍କୁ ନେଇ ପ୍ରଧାନମନ୍ତ୍ରୀ କିଛି ବିଶେଷ ସୂଚନା ଜାରି କରିଛନ୍ତି
- ଆସନ୍ତାକାଲି ଲକ୍ ଡାଉନ୍ ପାଇଁ ନୂତନ ଗାଇଡ୍ ଲାଇନ ଆସିବ
- ପୂର୍ବରୁ ଲାଗିଥିବା ଲକ୍ ଡାଉନ ଠାରୁ ଏହି ଲକ୍ ଡାଉନ୍ ଆହୁରି ଶକ୍ତ କରାଯିବ ବୋଲି କହିଛନ୍ତି ପ୍ରଧାନମନ୍ତ୍ରୀ ।
- ଏପ୍ରିଲ୍ 20 ତାରିଖରେ କରୋନା କଟକଣାର ସମୀକ୍ଷା କରାଯିବ ।
- ଏପ୍ରିଲ୍ 20 ତାରିଖ ପରଠାରୁ ଯେଉଁ ଅଞ୍ଚଳରେ କରୋନା ଜନିତ ନୂତନ ମାମଲା ଆସିବ ନାହିଁ, ତାକୁ ସର୍ତ୍ତମୂଳକ କୋହଳ କରାଯିବ ।
- ରାଜ୍ୟ, ଜିଲ୍ଲା ଓ ଥାନା ଭିତ୍ତିକ ଲକ୍ ଡାଉନ୍ ପାଳନର ସମୀକ୍ଷା କରାଯାଇ ମୂଲ୍ୟାଙ୍କନ କରାଯିବ ।
- ନୂଆ ମାମଲା ଆସିଲେ ମେ’ ତିନି ପର୍ଯ୍ୟନ୍ତ କଟକଣା ବଳବତ୍ତର ରହିବ ।
- ହଟସ୍ପଟ୍ ଚିହ୍ନିତ ସ୍ଥାନଗୁଡିକ ଉପରେ ଅଧିକ କଡା ନଜର ରଖାଯିବ ।
- ଘରୁ ବାହାରିବା ନିୟମ ଆହୁରି କଡାକଡି କରାଯିବ ।
ଆଜି ଦେଶବାସୀଙ୍କୁ ପୁଣିଥରେ ସମ୍ବୋଧନ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଦେଶରେ ଜାରି ରହିଥିବା ଲକ୍ ଡାଉନ୍ ଓ ସୋସିଆଲ ଡିଷ୍ଟାନ୍ସିଂର ଫଳ ମିଳିଛି । ପୂର୍ବରୁ କରୋନାକୁ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହିତ ଆଲୋଚନାରୁ ଲକ୍ ଡାଉନ୍ର ଅବଧିକୁ ବୃଦ୍ଧି କରିବା ନେଇ ପ୍ରସ୍ତାବ ଆସିଥିଲା ।