ସୁପ୍ରିମକୋର୍ଟଙ୍କ ଛାଟ ହେଉ ବା ପ୍ରଶାସନର ତାଗିଦ୍, ଶ୍ରୀମନ୍ଦିରରେ ନୀତି ଶୃଙ୍ଖଳା କିଛି ବ୍ୟବସ୍ଥିତ ହୋଇ ପାରୁନାହିଁ। ଶ୍ରୀମନ୍ଦିର ଗାରଦର ତ୍ରୁଟି ଯୋଗୁ ପରମ୍ପରା ଭାଙ୍ଗିବାକୁ ଯାଉଥିଲା। ପୂଜାପଣ୍ଡା ସେବକମାନେ ଅଟକାଇଲେ। ଫଳରେ ପୂଜାପଣ୍ଡା ଓ ସୁଆରମାନେ ମୁହାଁମୁହିଁ ହୋଇଥିଲେ। ଯାହାଦ୍ବାରା ଠାକୁରଙ୍କ ନୀତି ୪୦ ମିନିଟ୍ ଧରି ଅଟକିଗଲା। ଏପରିକି ଏହି ତ୍ରୁଟି ଏବଂ ପରମ୍ପରା ମଧ୍ୟରେ ସମନ୍ବୟ ରଖିବାକୁ ସମର୍ଥ ହେଲାନାହିଁ ପ୍ରଶାସନ ଦ୍ବାରା ଗଠିତ ଶୃଙ୍ଖଳା କମିଟି। ଯାହାଦ୍ବାରା ଭୋଗ ବିଳମ୍ବ ହେଲା ଓ କଲବଲ ହେଲେ ଭକ୍ତ। ଗାରଦର ତ୍ରୁଟି ଥିବାରୁ ଏହି ବିଶୃଙ୍ଖଳାକୁ ରିପୋର୍ଟ ବି କଲାନି ଗାରଦ। ଶ୍ରୀମନ୍ଦିରରେ ଅନେକ ପରମ୍ପରା ରହିଛି। ସେଥିରୁ ଗୋଟିଏ ପରମ୍ପରା ହେଉଛି ଠାକୁରଙ୍କ ରହଣୀ ଭୋଗ। ଏହି ଭୋଗ ପାଇଁ ବାହାର ରୋଷରେ ପ୍ରସ୍ତୁତ ହୋଇଥାଏ ସାମଗ୍ରୀ। ସେଥିପାଇଁ ମଧ୍ୟ ନିର୍ଦ୍ଦିଷ୍ଟ ରୀତିନୀତି ରହିଛି। ପରମ୍ପରା ଅନୁଯାୟୀ, ଯେଉଁଦିନ ଠାକୁର ବାହାର ବିଜେ କରନ୍ତି, ଅର୍ଥାତ ରାମକୃଷ୍ଣ, ମଦନ ମୋହନ, ଶ୍ରୀଦେବୀ ଭୂଦେବୀ ବା ଶ୍ରୀ ସୁଦର୍ଶନ ବାହାରକୁ ବିଜେ କରନ୍ତି ତଥା ବାହାର ରୀତିନୀତିରେ ସାମିଲ୍ ହୁଅନ୍ତି, ସେହିଦିନ ହିଁ ବାହାର ରୋଷରେ ଭୋଗ ପ୍ରସ୍ତୁତ ହୋଇ ଲାଗିଥାଏ। ମାତ୍ର ସୁଆର ସେବକମାନେ ରହଣୀ ଭୋଗ କରିବାକୁ ଦାବି କରିଥିଲେ। ଠାକୁରଙ୍କର ବାହାର ବିଜେ ନୀତି ନଥିବା ବେଳେ ଗାରଦ ପକ୍ଷରୁ ବାହାର ରୋଷ ଚାବି ସେମାନଙ୍କୁ ଦିଆଯାଇଥିଲା। ଗାରଦ ସବୁ ଜାଣି ମଧ୍ୟ ବାହାର ରୋଷରେ ଭୋଗ ପ୍ରସ୍ତୁତ କରିବାକୁ ଦେବା ପରେ ସୁଆରମାନେ ରହଣୀ ଭୋଗ ଲାଗି କରିବାକୁ କହିଥିଲେ। ଏହାକୁ ବିରୋଧ କରିଥିଲେ ପୂଜାପଣ୍ଡା ସେବକ। ପ୍ରାୟ ୪୦ ମିନିଟ୍ ଧରି ଟଣାଓଟରା ଚାଲିଲା ପରେ ବାହାର ଭୋଗ ପ୍ରସ୍ତୁତି ବନ୍ଦ ରହିଲା । ନିଷ୍ପତ୍ତି ହେବା ପରେ ନୀତି ଚାଲିଥିଲା କିନ୍ତୁ ଠାକୁରଙ୍କ ଭୋଗ ଅଟକି ଗଲା, ଫଳରେ ଭକ୍ତମାନେ ଭୋଗ ପାଇଲେ ନାହିଁ । ଶ୍ରୀମନ୍ଦିରରେ ସଂସ୍କାର ଆଣିବା ପାଇଁ ଯଥେଷ୍ଟ ବ୍ୟବସ୍ଥା ଗ୍ରହଣ କରାଯାଉଥିବାବେଳେ ମନ୍ଦିର ଭିତରେ ପଣ୍ଡା ଓ ସୁଆରମାନଙ୍କ ଝଗଡ଼ା କିଛି ପରିବର୍ତ୍ତନ ହେଉପାରିନାହିଁ । ଏହାବ୍ୟତୀତ ନୀତି ସମନ୍ବୟ ରଖିବାକୁ ଥିବା କମିଟି ଉପରେ ମଧ୍ୟ ତା’ର ପାରିବାପଣିଆ ନେଇ ପ୍ରଶ୍ନ ଉଠିଛି । ଏ ପ୍ରସଙ୍ଗରେ ମନ୍ଦିର ପ୍ରଶାସନ ତଦନ୍ତ କରି ନୀତି ବିଶୃଙ୍ଖଳା ପାଇଁ ଦାୟୀ ଅଧିକାରୀ, କର୍ମଚାରୀ ଓ ସେବକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି ହେଉଛି ।
